އަންހެން ސިފައިންގެ ޝަރަފުގައި ހިނގާލުމެއް ބާއްވައިފި
29 މާރިޗު 2019 | ހުކުރު 14:04ރައީސް ސާލިހު މި ހިނގާލުން ބައްލަވާލެއްވި
ޕެރޭޑް ކޮމާޑަރ މޭޖަރ ހައްވާ ޝެނީން ރައީސަށް ރިޕޯޓްކުރައްވަނީ
ދިވެހި އަންހެން ސިފައިންގެ ޚިދުމަތަށް 30 އަހަރު ފާހަގަކުރުމަށް ޝަރަފުގެ ހިނގާލުމެއް ބާއްވައިފިއެވެ.
ހުކުރު ދުވަހުގެ ހަވީރު 16:15 ގައި ސިފައިންގެ މައި މަރުކަޒުންނުކުމެގެން އައިސް ދިވެހި ރާއްޖޭގެ ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ ރައީސް ޖުމްހޫރިއްޔާ ދިރިއުޅުއްވާ ރިޔާސީ ގަނޑުވަރު މުލީއާގެ ސަރަހައްދަށް މަޑުކޮށް އެމަނިކުފާނަށް ރިޕޯޓް ކުރެއްވުމާއިއެކު، މި ޝަރަފުގެ ހިނގާލުން ރަސްމީކޮށް ފެށިގެންދިޔައެވެ.
މި ހިނގާލުމުގެ ޕެރޭޑް ކޮމާޑަރަކަށް ހުންނެވީ، މޭޖަރ ހައްވާ ޝެނީންއެވެ.
އަންހެނުންގެ ދުވަހާއިވެސް ގުޅުވައިގެން، ދިވެހި އަންހެން ސިފައިންގެ 30 އަހަރުގެ ޚިދުމަތް ފާހަގަކުރުމަށް ކުރިއަށް ގެންދިޔަ މި ހިނގާލުން ކުރިއަށް ގެންގޮސްފައިވަނީ ބަންޑާރަކޮށިން ނިކުމެގެން އަމީރުއަޙްމަދު މަގުން އިރަށްގޮސް، މެދުޒިޔާރަތްމަގުން އިރަށްގޮސް ޝަހީދު ޢަބްދުﷲ ޒުޙައިރު ހިނގުމުން އުތުރަށްގޮސް ބޮޑުތަކުރުފާނުމަގުން އިރަށް ގޮސް މޫންލައިޓް ހިނގުމުން ދެކުނަށެެވެ. ހިނގާލުން ނިންމާލާފައިވަނީ، ބޮޑުތަކުރުފާނުމަގުން ހުޅަނގަށްގޮސް ކަޅުތުއްކަލާކޮށްޓަށެވެ.
ޝަރަފުގެ މިހިނގާލުން ބައެއް ސަރަހައްދުތަކުގައި ހުއްޓާ، ސިފައިންގެ ބޭންޑުގައި ރާގުތަށް ކުޅެމުންދިޔައެވެ. އެގޮތުން މުލީއާގޭ ކުރިމަތީގައާއި، ރޯޝަނީ މަގާއި ބޮޑުތަކުރުފާނުމަގު ގުޅޭ ކަންމަތީގައާއި ސެނަހިޔާ ކުރިމަތީގައާއި ސްވިމިންގ ޓްރެކް ސަރަހައްދުގެ އިތުރުން ވިލާކޮލެޖް ކައިރީގައާއި މާލޭ ކުޅިވަރު އެކުވެނި ސަރަހައްދައް ހުއްޓާ ސިފައިންގެ ބޭންޑުން ރާގުތަށް ކުޅެމުންދިޔައެވެ.
މި ޝަރަފުގެ ހިނގާލުމުގައި މިހާރު ސިފައިންގެ ޚިދުމަތުގައި ތިއްބެވި އަންހެން ސިފައިންގެ އިތުރުން ސިފައިންގެ ޚިދުމަތަށް އެންމެ ފުރަތަމަ ވެންނެވި 65 އަންހެން ސިފައިންގެ ތެރެއިން 40 ކަނބަލުން ވަނީ ބައިވެރިވެވަޑައިގަންނަވާފައެވެ.
ސިފައިންގެ އެންމެ މަތީވެރިޔާ ރައީސުލްޖުމްހޫރިއްޔާ އިބުރާހިމް މުހައްމަދު ސާލިހާއި އެމަނިކުފާނުގެ އަނބިކަނބަލުންނާއި، ޑިފެންސް މިނިސްޓަރ މާރިޔާގެ އިތުރުން ޗީފް އޮފް ޑިފެންސް ފޯސް މޭޖަރ ޖެނެރަލް އަބުދުﷲ ޝަލާމްގެ އިތުރުން ސިފައިންގެ އިސް ބޭފުޅުން މި ހިންގާލުން ބައްލަވާލެއްވިއެވެ.
