ގިނަ އަދަދެއްގެ މަސްތުވާތަކެއްޗާއިއެކު މީހަކު ހައްޔަރުކޮށްފި
29 މާރިޗު 2019 | ހުކުރު 04:58މި މައްސަލާގައި ހައްޔަރު ކޮށްފައިވަނި 38 ދިވެހި ފިރިހެނެއް
މައްސަލައެއްގައި ފުލުހުން އަތުލައިގެންފައިވާ މަސްތުވާތަކެތި
ލ. ގަމުގައި މަސްތުވާތަކެތީގެ ވިޔަފާރި ފުޅާދާއިރާއެއްގައި ކުރަމުންގެންދާ މީހަކު, ގިނަ އަދަދެއްގެ މަސްތުވާތަކެއްޗާއި އެކު އެރަށުން ހައްޔަރުކޮށްފި އެވެ.
ރާއްޖެ.އެމްވީއަށް މައުލޫމާތުދެއްވަމުން ފުލުހުންގެ މީޑިއާ އޮފިޝަލް ވިދާޅުވީ ފުލުހުން މަސްތުވާތަކެއްޗާއި ދެކޮޅަށް ފުލުހުން ކުރަމުންދާ މަސައްކަތުގެ ތެރެއިން ލ. ގަން ޕޮލިސް ސްޓޭޝަނުން ހިންގި އޮޕަރޭޝަނެއްގައި ގިނަ އަދަދެއްގެ މަސްތުވާތަކެއްޗާއެކު އެ ރަށުން 38 ދިވެހި ފިރިހެނަކު ހައްޔަރުކޮށްފައިވާ ކަމަށެވެ.
އޭނާ ހައްޔަރުކޮށްފައިވަނީ ލ. ގަމުގައި ފުލުހުންގެ އިންޓެލިޖެންސަށް ލިބުނު މަޢުލޫމާތަކާއި ގުޅިގެން އިންޓެލިޖެންސާއި ލ. ގަން ޕޮލިސް ސްޓޭޝަން ގުޅިގެން ހިންގި އޮޕެރޭޝަނެއްގައެވެ.
ފުލުހުން ބުނީ ކޯޓު އަމުރެއްގެ ދަށުން އޭނާ ފުލުހުން ހައްޔަރުކުރި ކަމަށާއި އެވަގުތު އޭނާ ލައިގެންހުރި ޖީންސްގެ ޖީބުން ރަބަރު ޕެކެޓެއް ނަގައި އެއްލާލި ކަމަށެވެ. އަދި ފުލުހުންގެ ބެލުމުގެ ދަށަށް ގެނެސް އޭނާގެ ހާޒިރުގައި ޕެކެޓް އެއްލާލިދިމާ ބަލައިފާސްކުރިއިރު ރަބަރު ޕެކެޓް ތެރެއިން މަސްތުވާތަކެތިކަމަށް ޝައްކުކުރެވޭ އެއްޗެއްހުރި 19 ރަބަރު ޕެކެޓާއި މަސްތުވާތަކެތި ބަންދުކުރުމަށް ބޭނުކުރާ ޒާތުގެ ރަބަރު ޕެކެޓްތަކެއް ފެނިފައިވާ ކަމަށެވެ.
މިމައްސަލައާ ގުޅިގެން އޭނާ ދިރިއުޅެމުންދާ ގެއާދިމާ ވަލުތެރެއިން މަސްތުވާތަކެތިކަމަށް ޝައްކުކުރެވޭ އެއްޗެއްހުރި ރަބަރުޕެކެޓަކާއި، ބަނގުރާ ކެއްކުމަށް ބޭނުންކުރާ ސާމާނު ފެނިފައިވާ ކަމަށް ވެސް ފުލުހުން ބުނެއެވެ.
އެސަރަޙައްދުން ބަނގުރާކަމަށް ޝައްކުކުރެވޭ އެއްޗެއްހުރި 20 ލީޓަރުގެ 05 ހަމާއި، 500 އެމް.އެލްގެ ފުޅިއަކާއި، 1.5 އެމް.އެލްގެ ފުޅިއެއް ފެނިފައިވެއެވެ. މީގެއިތުރުން ބަނގުރާކަމަށް ޝައްކުކުރެވޭ އެއްޗެއްހުރި 5 ލީޓަރުގެ ފުޅިއެއްގެ އިތުރުން ހުސްކޮށްހުރި 20 ލީޓަރުގެ 33 ހަން ފެނިފައިވާކަމަށް ފުލުހުން ބުންޏެވެ.
ގަމު މެޖިސްޓްރޭޓް ކޯޓުން ވަނީ އޭނާގެ ބަންދަށް 15 ދުވަސް ޖަހާފައެވެ. މި މައްސަލަ ލ. ގަން ޕޮލިސް ސްޓޭޝަނުން ދަނީ ތަހުޤީޤުކުރަމުން ކަމަށް ފުލުހުން ބުނެއެވެ.
