ފުވައްމުލަކު ސިޓީ ރިންގް ރޯޑު ހެދުމުގެ މަސައްކަތާއި ސ. ހުޅުމީދޫ ބަހާއުއްދީން މަގު ހެދުމުގެ މަސައްކަތް އެމްޓީސީސީއާ ހަވާލުކޮށްފިއެވެ.

މިނިސްޓްރީ އޮފް ޕްލޭނިން އެންޑް އިންފްރާސްޓްރަކްޗާ (ޕްލޭނިންގ މިނިސްޓރީ)ގައި ބޭއްވި ރަސްމިއްޔާތެއްގައި މި ދެ މަސައްކަތް ކުރުމުގެ އެއްބަސްވުމުގައި އެމްޓީސީސީގެ ފަރާތުން ސޮއިކުރެއްވީ ސީއީއޯ ހަސަން ޝާހު އެވެ. ޕްލޭނިން މިނިސްޓްރީގެ ފަރާތުން ސޮއިކުރެއްވީ އެ މިނިސްޓްރީގެ ޕާމަނަންޓް ސެކްރެޓަރީ ޒީނިޔާ ހަމީދެވެ.

ފުވައްމުލަކު ރިންގް ރޯޑް ތަރައްގީ ކުރުމުގެ މަސައްކަތަށް 32،042،893.70 (ތިރީސް ދެ މިލިއަން ސާޅީސް ދެހާސް އަށްސަތޭކަ ނުވަދިހަ ތިން ރުފިޔާ ހަތްދިހަ ލާރި) ރުފިޔާ ހަރަދުވާނެއެވެ. މި މަސައްކަތުގެ ދަށުން ފުވައްމުލަކު ރިންގްރޯޑުގެ 2.7 ކިލޯ މީޓަރުގެ ސަރަހައްދުގައި ރަނގަޅު ފެންވަރަކަށް ތާރު އަޅައި މަގު ބައްތި ޖެހުމުގެ އިތުރުން ސައިޑް ވޯކް ހެދުމުގެ މަސައްކަތް ކުރާނެއެވެ. މި މަސައްކަތް ނިންމުމަށް ދީފައި ވަނީ 240 ދުވަހެވެ.

މީގެ އިތުރުން ހުޅުމީދޫ ބަހާއުއްދީން މަގު ހެދުމުގެ މަޝްރޫއަށް 32.7 މިލިއަން ރުފިޔާ ހަރަދުވާނެ ކަމަށް ލަފާ ކުރެވޭއިރު މި މަސައްކަތުގެ ދަށުން ބަހާއުއްދީނު މަގުގެ 2.02 ކިލޯމީޓަރުގެ ސަރަހައްދެއްގައި ރަނގަޅު ފެންވަރަށް ތާރުއަޅައި، މަގުބައްތި ޖެހުމުގެ އިތުރުން ސައިޑްވޯކް ހަދާނެއެވެ.

މި މަސައްކަތް ނިންމުމަށް ކޮންޓްރެކްޓް ކޮށްފައި ވަނީ 240 ދުވަހެވެ.

މީގެ އިތުރުން މިއަދު ވަނީ ގއ. ކަނޑުހުޅުދޫ ބަނދަރު ހެދުމުގެ މަސައްކަތް ވެސް އެމްޓީސީސީއާ ހަވާލުކޮށްފައެވެ. މި މަސައްކަތުގެ ދަށުން އެ ރަށުގައި 414 މީޓަރުގެ އެއްގަމު ތޮށި ލުމުގެ އިތުރުން 40 މީޓަރުގެ ބޭރު ތޮއްޓެއް ވެސް ލާނެއެވެ.

މީގެ އިތުރުން 100 މިޓަރުގެ ރިވެޓްމެންޓް ޖަހައި، ނެރު ބައްތި ޖަހައި، ބަނދަރު ސަރަހައްދުގައި ވެސް ބައްތި ޖަހާނެއެވެ. އަދި އެއްގަމު ތޮއްޓާ އިންވެގެން ޕޭމެންޓް ހަދަން ވެސް ވަނީ ނިންމައިފައެވެ.

މި މަސައްކަތް ނިންމުމަށް ދީފައި ވަނީ 350 ދުވަހެވެ. ކޮންޓްރެކްޓްގެ އަގަކީ 35.93 މިލިއަން ރުފިޔާއެވެ.