ގެސްޓް ހައުސް ޓޫޫރިޒަމާ ބެހޭ އެމްޑީޕީގެ ޕެނަލް ޑިސްކަޝަނެއް މިރޭ ހުޅުމާލޭގައި
27 މާރިޗު 2019 | ބުދަ 11:34ޕެނަލް ފެށޭނީ ބުދަ ދުވަހުގެރޭ 9:00 ގައި
ހުޅުމާލެގައި ހިންގާ ގެސްޓްހައުސްތަކެއް
އެމްޑީޕީގެ އެޖެންޑާ 19 ގެ ހަރަކާތްތަކުގެ ތެރެއިން ގެސްޓް ހައުސް ޓޫރިޒަމަށް އަމާޒުކޮށް ބާއްވާ ޚާއްސަ ޕެނަލް ޑިސްކަޝަނެއް މިރޭ ހުޅުމާލޭގައި ބޭއްވުމަށް ހަމަޖެހިފައިވާ ކަމަށް އެ ޕާޓީން ބުނެފިއެވެ.
ބުދަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ ޑެޕިއުޓީ ސެކެޓްރީ ޖެނެރަލް އަފްޝަން ލަތީފް ވިދާޅުވީ، އެޖެންޑާ 19 ގެ ދަށުން ގެސްޓް ހައުސް ޓޫރިޒަމަށް އަމާޒުކޮށް ބާއްވާ މި ޕެނަލް ޑިސްކަޝަން އޮންނާނީ ބުދަ ދުވަހުގެރޭ 9:00 ގައި ހުޅުމާލޭގެ "ޕްރޯ އެކްސްކާރޝަން ވޯޓަރ ސްޕޯރޓްސް"ގެ ބީޗު ސަރަހައްދުގައި ކަމަށެވެ.
އަފްޝަން އިތުރަށް ވިދާޅުވީ، މި ޕެނަލްގައި މައުލޫމާތު ދެއްވާނީ އައްޑޫ މީދޫ ދާއިރާގެ އެމްޑީޕީ ކެންޑިޑޭޓް ރޮޒެއިނާ އާދަމް އާއި، ބިލެއްދޫ ދާއިރާގެ އެމްޑީޕީ ކެންޑިޑޭޓް އަހުމަދު ހަލީމް (ދޮންބިލެއް) އާއި، ގެސްޓް ހައުސް ވިޔަފާރިއާ ގުޅޭ ތަޖުރިބާކާރެއް ކަމަށްވާ އަބްދުﷲ ރަޝީދު ކަމަށެވެ.
އެމްޑީޕީގެ އެޖެންޑާ 19 ގެ ދަށުން ގިނަ ކެމްޕެއިން ހަރަކާތްތަކެއް ކުރިއަށްގެންދާއިރު، ކޮންމެ ބުދަ އަދި ހޮނިހިރު ދުވަހުގެ ރޭ ރާއްޖެޓީވީން އެޖެންޑާ19 ކިޔާ ޕްރޮގުރާމެއް ގެނައުމުގެ އިތުރުން، ކޮންމެ ބުރާސްފަތި އަދި ހޮނިހިރު ދުވަހު އެމްޑީޕީގެ ޕެނަލް ޑިސްކަޝަންތައް ކުރިއަށްގެންދެއެވެ. މި ޕެނަލް ޑިސްކަޝަންތަކުގައި ސުވާލު ކުރުމުގެ ފުރުސަތު ހުރިހާ ފަރާތްތަކަށް ވެސް ހުޅުވާލާއިރު، އެކި މައުޟޫތަކަށް ބަހުސް ކުރުމުގެ އިތުރުން އެޖެންޑާ 19 ގެ މައުލޫމާތުތައް ހިމެނޭ ލީފްލެޓްތައް ވެސް ބަހައެވެ.
