ވެރިކަމުގެ ފުރަތަމަ ދުވަސްކޮޅު ނިންމުނު ނިންމުމަކަށް އަދިވެސް ހިތާމަކުރަން: ރައީސް ސޯލިޙް
27 މާރިޗު 2019 | ބުދަ 06:40އެނިންމެވުން ނުނިންމެވުނު ނަމައޭ ހިތްޕުޅަށް އަރާވަޑައިގަންނަވާކަމަށް ވިދާޅުވި
ރައީސް އިބްރާހިމް މުހައްމަދު ސޯލިޙް
ވެރިކަމަށް ވަޑައިގެންނެވިތާ ކުރީކޮޅުގައި ނިންމެވުނު ނިންމެވުމަކާއިމެދު ހިތާމަ ކުރައްވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިޙް ވިދާޅުވެއްޖެއެވެ.
ރައީސް ސޯލިޙްގެ ވެރިކަމުގައި ކަންކަން ކުރައްވަމުން ގެންދަވާ ދުވެލި ލަސްކަމަށް ބައެއް ފަރާތްތަކުން ވާހަކަ ދައްކަމުންދާތީ ރާއްޖެޓީވީގެ ފަށާއިރު ޕްރޮގްރާމްގައި އެކަމާއި ގުޅިގެން ކުރި ސުވާލަކަށް ޖަވާބު ދެއްވަމުން އެމަނިކުފާނު ވިދާޅުވީ އެމަނިކުފާނު އެއްވެސް އިރެއްގައި މާ އަވަސް އަރުވާލައްވައިގެން ކަންކަން ނުނިންމަވާ ކަމަށެވެ. ގޮތް ނިންމެވުމުގެ ކުރިން ކަންކަމާއި ވިސްނަވައި އެކަމުގައި އޮންނަ އެންމެ ރަނގަޅު ގޮތަކީ ކޮބައިތޯ ބައްލަވާ ކަމަށް ވެސް އެމަނިކުފާނު ވިދާޅުވިއެވެ.
އެހެންނަމަވެސް ވެރިކަމުގެ ކުރީ ކޮޅު ޤާނޫނީ އިމުގެ ތެރެއިން ނަމަވެސް ނިންމެވުނު ނިންމެވުމަކުން މިއަދާއި ހަމައަށް ވެސް ހިތާމަކުރައްވާ ކަމަށާއި އެނިންމެވި ނިންމެވުން އެގޮތަށް ނުނިންމެވުނު ނަމައޭ ހިތްޕުޅަށް އަރާވަޑައިގެންނަވާ ކަމަށް ރައީސް ސޯލިޙް ވިދާޅުވިއެވެ.
ރައީސް ސޯލިހު ވިދާޅުވީ ނިންމެވުމެއް ނިންމެވުމަށް ފަހު އެކަން ފަހުން ބަދަލުކުރަން ޖެހިވަޑައިގަތުމުން ލިބޭ ގެއްލުން މާބޮޑު ކަމަށެވެ.
ވެރިކަމުގެ 100 ދުވަހުގެ ތެރޭގައި ކުރަން ނިންމާފައިވާ ވަރަށް ގިނަ ކަންކަން ކާމިޔާބު ކަމާއިއެކު ނިންމިފައިވާކަން ފާހަގަ ކުރައްވަމުން ރައީސް ސޯލިޙް ވިދާޅުވީ ސަރުކާރު ހިނގާ ދުވެލި މަޑުު ނޫން ކަމަށެވެ.
