ބޫތެފްލިކާ މަގާމުން ދުރުކުރަން އަލްޖީރިޔާ ސިފައިންގެ ވެރިޔާ ގޮވާލައިފި

އަލްޖީރިޔާގެ ރައީސް ކަމުގައި ހުންނެވި އަބްދުލްއަޒީޒް ބޫތެފްލިކާއަށް މަގާމުގެ މައްސޫލިއްޔަތު ނުއުފުއްލެވޭނެ ކަމަށް ބުނެ އެމަނިކުފާނު މަގާމުން ދުރުކުރަން ޖެހޭ ކަމަށް އެ ގައުމުގެ ސިފައިންގެ ވެރިޔާ ލެފްޓިނެންޓް ޖެނެރަލް އަހްމަދު ގާއެދް ސަލާހް ގޮވާލައްވައިފިއެވެ.

ޖެނެރަލް ސަލާހް މިހެން ގޮވާލެއްވީ އެ ގައުމުގެ ޓީވީއަކަށް ދިން އިންޓަވިއުއެއްގައެވެ. އޭނާ ވިދާޅުވީ އަލްޖިރިޔާ މިހާރު އޮތް ހާލަތުން ސަލާމަތް ވާން. ގާނޫނީ އިމުގެ ތެރެއިން ބޫތެފްލިކާ މަގާމުން ދުރުކުރަން އަވަސްވެގަންނަން ޖެހޭ ކަމަށެވެ. ބޫތެފްލިކާއަށް ވަފާތެރިކަމަށް ބެލެވިފައިވާ ޖެނެރަލް ސަލާހްއަކީ އެ ގައުމުގެ ޑެޕިއުޓީ ޑިފެންސް މިނިސްޓަރެވެ.

މީގެ ކުރިން ޖެނެރަލް ސަލާހް ވަނީ ރައްޔިތުންނާއި ސިފައިން އެ ގައުމުގެ ކުރިމަގާ ދޭތެރޭ އޮތީ ގުޅިފައިވާ ތަސައްވުރެއް ކަމަށް ވިދާޅުވެ، މިހާރު އެ ގައުމުގައި ކުރިޔަށްދާ ސިލްސިލާ މުޒާހަރާތަކުގެ ބައިވެރިންނާ އެކު ސިފައިން އޮތް ކަން ހާމަކުރައްވާފައެވެ. ނަމަވެސް މިހާ ފާޅުކަން ބޮޑު ގޮތެއްގައި ބޫތެފްލިކާ މަގާމުން ދުރުކުރަން ޖެހޭ ކަމަށް މިއީ އޭނާ ވިދާޅުވި ފުރަތަމަ ފަހަރެވެ.

ބޫތެފްލިކާ މަގާމުން ދުރުކުރަން ޖެހޭ ކަމަށް ޖެނެރަލް ސަލާހް ގޮވާލެއްވީ، އެމަނިކުފާނު އިތުރު ދައުރަކަށް ކުރިމަތި ނުލައްވާނެ ކަން އިއުލާން ކުރައްވާފައި ވަނިކޮށެވެ. އެ ގައުމުގައި ކުރިޔަށްދާ މުޒާހަރާތައް ފެށެން މެދުވެރިވީ ވެސް ބޫތެފްލިކާ އިތުރު ދައުރަކަށް ކުރިމަތިލައްވަން ނިންމެވުމާއި ގުޅިގެންނެވެ.

ބޫތެފްލިކާ ވެރިކަމަށް އައީ 1990ގެ އަހަރުތަކުގެ ތެރޭގައި އަލްޖީރިޔާގައި ކުރިޔަށް ދިޔަ ދާހިލީ ހަނގުރާމައަށް ފަހު، އެ ގައުމުގެ ސިފައިންގެ އެހީތެރިކަމާ އެކުގައެވެ. އެމަނިކުފާނަށް 2013ގައި ސްޓްރޯކެއް ޖެހިވަޑައިގެންނެވި ފަހުން އާއްމުންގެ ތެރެއިން ފެނިވަޑައިގެންފައި ވަނީ މަދު ފަހަރަކުއެވެ.