"ގާޒީ" ފެށުން ރަނގަޅުކޮށް ބެލުންތެރިންގެ ހިތްތަކުން ޖާގަ ހޯދައިފި

މީގެ ހަފުތާއެއް ކުރިން ރިލީޒުކުރި ބޮލީވޫޑްގެ ފިލްމެއް ކަމަށްވާ "ގާޒީ" ފެށުން ރަނގަޅުކޮށް ބެލުންތެރިންގެ ހިތްތަކުން ޖާގަ ހޯދައިފިއެވެ.

ފިލްމު ރިލީޒު ކުރިތާ ހަފުތާ އެއް ވެފައިވާއިރު މި ފިލުމަށް 19.40 ކްރޯޑް ރުޕީޒް ލިބިފައިވާ ކަމަށް ރިޕޯޓުތައް ބުނެއެވެ. އަދި ފިލްމު ރިލީޒް ކޮށްފައި ވަނީ ހިންދީ އަދި ޓެމިލް ބަހުންނެވެ.

ބޮލީވޫޑުގެ ޚަބަރުތައް ދިރާސާކުރާ ފަރާތެއް ކަމަށްވާ ތަރުން ބުނެފައި ވަނީ މި ފިލްމު ރިލީޒް ކުރިތާ ހަފްތާއެއް ވެފައިވާއިރު، އުންމީދު ކުރިވަރަށް ވުރެ މާ ބޮޑު ތަރުހީބެއް ފިލްމަށް ލިބެމުންދާ ކަމަށެވެ. އަދި ކުރިއަށް އޮތް ދުވަސްތަކުގައި ފިލްމަށް އިތުރު ކާމިޔާބީތައް ބޮކްސް އޮފީހުގައި ލިބިގެންދާނެ ކަމަށާއި ސަބަބަކީ ފިލްމުގެ ވާހަކަ މޮޅުވުން ކަމަށް ތަރުން ބުނެފައިވެއެވެ.

ހަނގުރާމައެއްގެ މަށްޗަށް ބިނާކޮށް އުފައްދާފައިވާ މި ފިލްމުގައި ފެނިގެންދާ މުހިންމު ތަރިންގެ ތެރޭގައި ތާޕްސީ ޕަންނޫ، އަތުލް ކުލްކަރުނީ އަދި ރާހޫލް ސިންގް ހިމެނެއެވެ.

"ގާޒީ"އަށް ބޮކްސް އޮފީހުގައި ރަނގަޅު ކާމިޔާބީއެއް ލިބެމުންދާއިރު މި ފިލްމާއެކު އެކުއެކީގައި ރިލީޒް ކުރި "ޝާދީ އެންޑް އިރާސާ" އަށް ވަނީ ނާކާމިޔާބީއާ ކުރިމަތިލާން ޖެހިފައެވެ.