ލަވްޔާތްރީގެ ފެށުން ރަނގަޅެއް ނޫން!
މިހާތަނަށް އާމްދަނީގެ ގޮތުގައި ލިބިގެން ގޮސްފައިވަނީ 7.75 ކްރޯޑް
އާޔޫޝް ޝަރްމާ، ސަލްމާން ޚާން ވަރީނާ ހުސައިން
މިދިޔަ ހުކުރު ދުވަހު ރިލީޒްކުރި ބޮލީވުޑްގެ ފިލްމް " ލަވްޔާތްރީ" ގެ ފެށުން އެހާ ރަނގަޅު ނޫން ކަމަށް ރިޕޯޓްތައް ބުނެފިއެވެ.
ސަލްމާން ޚާންގެ ޅިޔަނު އާޔޫޝް ޝަރްމާ އަދި ވަރީނާ ހުސައިން ބޮލީވުޑަށް ތަޢާރަފް ވެގެންދިޔަ "ލަވްޔާތްރީ" މިފިލްމަށް މިހާތަނަށް އާމްދަނީގެ ގޮތުގައި ލިބިގެން ގޮސްފައިވަނީ 7.75 ކްރޯޑް އިންޑިއަން ރުޕީސްއެވެ.
މި ފިލްމަށް ކުރިން ދީފައިވާ ނަމަކީ "ލަވްރާތްރީ"އެވެ. ނަމަވެސް ފިލްމް ރިލީޒް ކުރަން ކުޑަ ދުވަސް ކޮޅަކަށް ވެފައި ވަނިކޮށް ފިލްމްގެ ޕްރޮޑިސަރ ސަލްމާން ޚާން ވަނީ ފިލްމްގެ ނަން "ލަވް ޔާތްރީ" އަށް ބަދަލު ކޮށްފައެވެ.
ފިލްމް ގެ ނަން ބަދަލު ކޮށްފައިވަނީ ވިޝްވާ ހިންދޫ ޕަރިޝާދުން ފިލްމަށް ދީފައިވާ ނަމާމެދު ނުރުހުން ފާޅުކޮށް މުޒާހަރާ ކުރުމުންނެވެ. އެމީހުން ފިލްމާމެދު ނުރުހުންފާޅުކުރީ އެ ފިލްމުގެ ނަން ހިންދޫންގެ އެ ފެސްޓިވަލްގެ މާނަ އޮޅުވާލާފައިވާ ކަމަށް ބުނެއެވެ. އޭގެ ފަހުން ވިޝްވާ ހިންދޫ ޕަރިޝާދުންވަނީ ފިލްމާ ދެކޮޅަށް ޕެޓިޝަނެއްވެސް ކުރިން ހުށަހަޅާފައެވެ.
ޕީޓީއައި ނޫސް އޭޖެންސީން ރިޕޯޓްކޮށްފައިވާ ގޮތުގައި ބިހާރުގެ ކޯޓަކުންވަނީ އެ ފިލްމުގެ ނަމާއި ހިމަނާފައިވާ މައުލޫމާތުގެ ސަބަބުން ހިންދޫންނަށް ކުރި އަސަރުގެ ސަބަބުން ސަލްމާން ޚާންއާއި ފިލްމުގެ ކާސްޓުންގެ މައްޗަށް ފަސްޓް އިންފޮމޭޝަން ރިޕޯޓްގެ ގޮތުގައި މައްސަލަ ހުށަހެޅުމަށް ކުރިން ވަނީ އަންގާފައެވެ.
