"ޖަބް ހެރީ މެޓް ސޭޖަލް" ފެށުން ރަނގަޅުކޮށްފި

ޝާހްރުކް ޚާނާއި އަނުޝްކާ ޝަރުމާ ލީޑު ރޯލުން ފެނިގެންދާ "ޖަބް ހެރީ މެޓް ސޭޖަލް" ގެ ފެށުން ރަނގަޅުކޮށްފި އެވެ.

އޮގަސްޓް މަހުގެ 4 ވަނަ ދުވަހު މި ފިލްމު އިންޑިޔާގައި ރިލީޒްކުރުމުގެ ކުރިން ވަނީ އަރަބި ގައުމުތަކުގައި ރިލީޒް ކޮށްފައެވެ.

އިންޑިޔާގެ ސިނަމާތަކުން ވަނީ 40 އިންސައްތަ ފުލްވެފައެވެ. އަދި އަރަބި ސިނަމާތަކުގައި ވަނީ 25 އިންސައްތަ ފުލްވެފައެވެ. ރިޕޯޓްތައް ބުނާ ގޮތުން މި ފިލްމަކީ އިމްތިޔާޒްގެ އެހެން ފިމްލުތަކާއި ޙިލާފަށް ފިލްމުގެ މިއުޒިކް އެހާ މަޝްހޫރު ވެގެން ދިޔަ ފިލްމަކަށް ނުވި ނަމަވެސް ފިމްލު ބަލަން ވަތް ވަރު ވަނީ އިތުރުވެފައެވެ.

ހުކުރު އަދި ހޮނިހިރު ދުވަހަކީ ރަސްމީ ދުވަސް ކަމަށްވާތީވެސް ގިނަ އަދަދެއްގެ ބަޔަކު ވަނީ ފިމްލު ބަލަން ވަދެފައެވެ. އެހެންކަމުން ފުރަތަމަ ދުވަހު އެކަނިވެސް ފިލްމު ރިލާޒްކުރި އެކި ގައުމުތަކުން ޖުމްލަ 22.73 ކްރޯރް ރުޕީސް ވަނީ ލިބިފައެވެ.

މި ފިލްމު ޕްރޮމޯޝަންތަކުގައި މި ދެތަރިންވެސް ވަނީ އިންޑިޔާގެ އެކި ސިޓީތަކަށް ޒިޔާރަތްކޮށްފައެވެ. އެގޮތުން ގުޖުރާތު، ރާޖަސްތާން، ޕަންޖާބު އަދި ވަރަނަސީއަށް ވެސް ދަތުރުކޮށްފައެވެ. މިއީ ޝާހުއާއި އަނުޝްކާ އެކީގައި ފެންނާނެ 3 ވަނަ ފިލްމެވެ.

ބަތަލާ އަނުޝްކާ ޝަރްމާ ބޮލީވުޑަށް ތައާރަފުވެފައިވަނީ "ރަބްނޭ ބަނާދީ ޖޯޅީ" ކިޔާ ފިލްމަކުން ޝާހްރުކް ޚާނާ އެކު އެވެ. އެއަށް ފަހު މިދެތަރިން އެކުގައި ވަނީ "ޖަބް ތަކްހޭ ޖާން" އިން ވެސް ފެނިގެން ގޮސްފަ އެވެ.

އިމްތިޔާޒު އަލީ ޑައިރެކްޓްކޮށް، ރިލީޒްކުރުމަށް ތައްޔާރުވަމުންދާ ލޯބީގެ މި ފިލްމަކީ ޔޫރަޕްގެ އެކި ގައުމުތަކުގައި ޝޫޓްކޮށްފައިވާ ފިލްމެކެވެ.

މި ފިލްމުގެ ޝޫޓިން ކުރިއަށް ގެންގޮސްފައިވަނީ ޕްރާގް، އެމްސްޓެޑަމް، ވިއެނާ، ލިޒްބަން އަދި ބުޑަޕެސްޓްގައެވެ. ކުރިން މި ފިލްމަށް ކިޔަނީ "ދަ ރިންގް" ނުވަތަ "ރެހެނުމާ" އާއި "ރައުލާ" ކަމަށް އަޑުއެރި ނަމަވެސް ފިލްމަށް އެންމެފަހުން ދީފައިވާ ނަމަކީ "ޖަބް ހެރީ މެޓް ސޭޖަލް" އެވެ.

ދެހާސް ހަތް ވަނަ އަހަރު ނިކުތް ކާމިޔާބު ފިލްމު "ޖަބް ވީ މެޓް" އަކީ ވެސް އިމްތިޔާޒު ޑައިރެކްޓްކޮށްފައިވާ ފިލްމެކެވެ. އިމްތިޔާޒު، ޝާހްރުކާއި އަނުޝްކާގެ ފިލްމަށް ނަން ދީފައި މިވަނީ އެ ފިލްމުގެ ނަމާ ވަރަށް ވައްތަރު ނަމެކެވެ. މި ފިލްމުގައި ޝާހްރުކް ފެނިގެންދަނީ ޕަންޖާބީ ޓުއާ ގައިޑެއްގެ (ހެރީ) ރޯލުންނެވެ. އަދި އަނުޝްކާ ފެނިގެންދާނީ ގުޖްރާތަށް ނިސްބަތްވާ އަންހެން ކުއްޖެއްގެ (ސޭޖަލް) ރޯލުންނެވެ.

ސޭޖަލް ޔޫރަޕު ބަލައިލަން ކުރާ ދަތުރުގައި ހެރީއާ ދިމާވެ ދެމީހުންނަށް އެކަކު އަނެކަކު ދެކެ ލޯބިވެވި އެމީހުންގެ ލޯބީގެ ވާހަކަ ފިލްމުގައި ފެނިގެންދާނެ އެވެ.