މަޖިލީހުން އެދުނީ އިތުބާރު ނެތްކަމުގެ މައްސަލައިގެ ހުކުމް މުރާޖައާކޮށް ދިނުމަށް: އަމީން އާންމު
އެ މައްސަލަ ބަލަމުންދާ ކަމަށް ސުޕްރީމް ކޯޓުން މަޖިލީހަށް ވަނީ އަންގާފައި
ރައްޔިތުންގެ މަޖިލީހުގެ ގަވާޢިދަށް ބަދަލު ގެންނަން އާންމުކޮމިޓީން ވަނީ ފާސްކޮށްފައި
އިތުބާރު ނެތް ކަމުގެ މައްސަލަތައް ރައްޔިތުންގެ މަޖިލީހުން ކުރިއަށް ގެންދިއުމާ ގުޅޭ އިސްތިޝާރީ ލަފައަކަށް އެދިފައިނުވާ ކަމަށާއި، މަޖިލިހުން އެދުނީ ހުކުމް މުރާޖައާކޮށް ދިނުމަށް ކަމަށް މަޖިލީހުގެ އަމީންއާންމު ފާތިމަތު ނިއުޝާ ވިދާޅުވެއްޖެއެވެ.
މަޖިލީހުން އެކަމަށް ހުށަހެޅުމުން އެ މައްސަލަ މިހާރު ބަަލަމުންދާ ކަމަށް ސުޕްރީމް ކޯޓުން އަންގާފައިވާ ކަމަށް ވެސް ނިއުޝާ ވިދާޅުވި އެވެ.
މީގެ ދެ އަހަރު ކުރިން، 2017 ވަނަ އަހަރު ސުޕްރީމް ކޯޓުގެ ފުލް ބެންޗުން ކުރި ހުކުމުގައި ވަނީ އެކަށީގެންވާ ސަބަބެއް ނެތި، ސިޔާސީ ގޮތުން، އިތުބާރު ނެތްކަމުގެ ވޯޓެއް ނުނެގޭނެ ކަމަށާއި އިތުބާރު ނެތްކަމުގެ ވޯޓުތަކަކީ އެކަށީގެންވާ ސަބަބުތަކަކަށް ބިނާވެފައިވާ އިތުބާރު ނެތްކަމުގެ މައްސަލައަކަށް ވާންޖެހޭނެ ކަމަށެވެ. އިތުބާރު ނެތްކަމަށް މަޖިލީހުން ފާސް ކުރިޔަސް އެކަމުގައި ފަހުގެ ނިންމުން ނިންމާނީ ސުޕްރީމް ކޯޓުން ކަމަށް ހުކުމުގައި ކަނޑައަޅާފައިވެ އެވެ.
މިގޮތަށް ހުކުމުގައި ކަނޑައަޅާފައި އޮތްއިރު، އެމްޑީޕީން ބުނެފައިވަނީ މަޖިލީހުގެ ގަވާއިދަށް ކޮމިޓީން ބަދަލު ގެނައިރު، ސުޕްރީމް ކޯޓުގެ ހުކުމަށް ރިއާޔަތްކޮށްފައިނުވާ ކަމަށެވެ. ކޮމިޓީން ކުއްލިއަކަށް ގަވާއިދަށް ބަދަލު ގެންނަން މަސައްކަތް ކުރުމުން ކޮމިޓީގައި ހިމެނިވަޑައިގަންނަވާ އެމްޑީޕީގެ މެމްބަރުން ބުނެފައިވަނީ އެ މައްސަލަ ދިރާސާކުރަން އިތުރު ވަގުތު ބޭނުންވާ ކަމަށާއި ކުއްލިއަކަށް މަޖިލީހުގެ ގަވާއިދަށް ބަދަލުގެނައުމަކީ ބުއްދިވެރިކަމެއް ނޫން ކަމަށެވެ.
އިތުބާރު ނެތް ކަމުގެ މައްސަލަތަކުގައި އަމަލު ކުރާނެ ގޮތް، މަޖިލީހުގެ ގަވާއިދުގައި ކަނޑައެޅުމަށް ކޮމެޓީން ފާސްކޮށްފައި ވަނީ ޑިފެންސް މިނިސްޓަރު މާރިޔާ އަހުމަދު ދީދީގެ އިތުބާރު ނެތް ކަމުގެ މައްސަލައެއް މަޖިލީހަށް ހުށަހަޅާފައި ވަނިކޮށެވެ. މާރިޔާގެ އިތުބާރު ނެތް ކަމަށް ހުށަހެޅީ ޕީޕީއެމްގެ 14 މެމްބަރަކު ސޮއިކޮށް، ފެބްރުއަރީ 25 ވަނަ ދުވަހުއެވެ.
