ސީރިޔާގައި ތިބި އައިއެސްގެ ހަނގުރާމަވެރިން މިހާރު ބަލިކުރެވި އެ ޖަމާއަތުގެ ފަސް އަހަރުވީ "ޚިލާފަތު" ނިމުމަކަށް ގެނެވިފައިވާ ކަމަށް ކުރުދީން އިސްވެ އުފައްދާފައިވާ ސީރިއަން ޑެމޮކްރެޓިކް ފޯސަސް (އެސްޑީއެފް) އިން ބުނެފިއެވެ.

އައިއެސްގެ ބާރުގެ ދަށުގައި އެންމެ ފަހުން އޮތް ބަގޫޒްގައި އެސްޑީއެފްގެ ހަނގުރާމަވެރިން ގެންދަނީ ކާމިޔާބީގެ ދިދަ ނަގަމުންނެވެ.

އައިއެސް ފައްސާލެވުނުކަމަށް ބުނެ އުފާ ފާޅުކުރަމުންދާއިރު އެ ޖަމާއަތަކީ ދުނިޔޭގެ ސަލާމަތަށް އޮތް ބިރެއްގެ ގޮތުގައިވަނީ އިންޒާރުކުރެވިފައެވެ.

އައިއެސްގެ ހަނގުރާމަވެރިން އަދި އެ ސަރަހައްދުގައި އުޅެމުން ދާއިރު ނައިޖީރިއާއިން ފެށިގެން ފިލިޕީންސާ ހަމައަށް ހުރި ގައުމުތަކުގައި އެ ޖަމާއަތް ހަރަކާތްތެރިއެވެ.

އައިއެސްގެ ބާރު އެންމެ ގަދަކޮށް އޮތް ދުވަސްވަރު އެ ޖަމާއަތުގެ އަތްދަށުގައި އިރާގާއި ސީރިޔާގެ 88،000 އަކަ ކިލޯ މީޓަރުގެ ސަރަހައްދެއް އޮތެވެ.

ދުނިޔޭގެ ބޮޑެތި ބާރުތަކުގެ އެހީއާއެކު އިރާގާއި ސީރިއާގެ ފައުޖުތަކުން ފަސް އަހަރު ވަންދެން ހަނގުރާމަކޮށް އައިއެސް ބަލިކުރެވިފައި ވާއިރު އެ ޖަމާއަތުގެ ހަނގުރާމަވެރިން މިހާރު ތިބީ އިރާގާއި ސީރިޔާގެ ސަރަހައްދީ ރޮނގުގައި އޮތް ދެތިން ސަތޭކަ މީޓަރުގެ ސަރަހައްދެކެވެ.

ސީރިޔާއާއި އިރާގުގެ ސަރަހައްދީ ރޮނގުގެ ކައިރީގައި އޮންނަ ބަގޫޒް އަވަށަކީ އިސްލާމިކް ސްޓޭޓް އޮފް އިރާޤް އެންޑް ލެވަންޓް (އައިސިލް ނުވަތަ އައިސިސް) އެންމެ ފަހުން ތިބި ސަރަހައްދުކަމަށް ވާއިރު އެ ސަރަހައްދުން އެ ޖަމާއަތް ފައްސާލުމަށް އެސްޑީއެފްއިން ހަމަލާތައް ފަށާފައިވަނީ މާޗް މަހުއެވެ.

އައިއެސްއާ ދެކޮޅަށް އެމެރިކާ އިސްވެ އުފައްދާފައިވާ އަސްކަރީ ކޯލިޝަނުން ހަމަލާ ދޭން ފަށާފައި ވަނީ 13 ޖޫން 2014 ގައެވެ.