ރައީސް އަލިފުށީ ސްކޫލްގެ މަލްޓި ޕާރޕަސް ހޯލްގެ ބިންގާ އަޅުއްވާދެއްވައިފި
މިއީ 2019ވަނަ އަހަރުގެ ބަޖެޓުގައި ހިމެނިފައިވާ މަޝްރޫއެއް
ރައީސް ސޯލިހު އަލިފުށީ ސްކޫލްގެ މަލްޓި ޕާރޕަސް ހޯލްގެ ބިންގާ އަޅުއްވައިދެއްވަނީ
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ރ. އަލިފުއްޓަށް ކުރައްވަމުން ގެންދަވާ ދަތުރުފުޅެއްގައި، އެ ރަށު ސްކޫލްގެ މަލްޓި ޕާރޕަސް ހޯލުގެ ބިންގާ އަޅުއްވާދެއްވައިފިއެވެ.
ހޮނިހިރު ދުވަހު އަލިފުށީ ސްކޫލްގައި ބޭއްވި ރަސްމިއްޔާތެއްގައި، ސްކޫލް ހޯލުގެ ބިންގާ އަޅުއްވައިދެއްވީ ރައީސް ސޯލިހު އާއި އަލިފުށީ ސްކޫލްގެ ޕްރިންސިޕަލެވެ.
ބިންގާ އެޅެމުގެ ރަސްމިއްޔާތުގައި އަލިފުށީ ސްކޫލްގެ ޓީޗަރުންނާއި ދަރިވަރުންގެ އިތުރުން އަލިފުށީ ދާއިރާގެ މެމްބަރު މުހައްމަދު ހުސައިން ރަޝީދާއި ރ. އަތޮޅު ކައުންސިލްގެ ރައީސް އަލީ ޝާހިދު ވެސް ބައިވެރިވެވަޑައިގެންނެވިއެވެ. މި ރަސްމިއްޔާތު ނިންމަވާލެއްވުމަށް ފަހު ރައީސް ވަނީ އެ ސްކޫލް ބައްލަވާލައްވައި އިއްޒަތްތެރިން ސޮއިކުރައްވާ ފޮތުގައި ސޮއިކުރައްވާފައެވެ.
އިއްޒަތްތެރިން ސޮއިކުރައްވާ ފޮތުގައި ރައީސް ސޮއިކުރައްވަނީ
އަލިފުށީ ސްކޫލްގައި މަލްޓި ޕާރޕަސް ހޯލަކީ 2019 ވަނަ އަހަރުގެ ބަޖެޓުގައި ހިިމެނެފިއިވާ މަޝްރޫއެކެވެ. މި މަޝްރޫއަށް ހޭދަކުރަން ބަޖެޓުގައި ކަނޑައަޅާފައި ވަނީ އެއް މިލިއަން ރުފިޔާއެވެ. އަންނަ އަހަރުގެ ދިރާސީ އަހަރުގެ ދެވަނަ ސެމިސްޓަރގެ ކިޔެވުން ފެށެންވާ އިރަށް މި މަޝްރޫއު ނިންމާލެވޭ ވަރު ވާނެ ކަމަށް ކައުންސިލުން ވަނީ މައުލޫމާތު ދީފައެވެ.
