ކަރަންޓު ދަންތުރަ ޖެހި މީހާ އެ ކުރީ ގާނޫނީ ކުށެއް: ފުލުހުން
21 މާރިޗު 2019 | ބުރާސްފަތި 19:54މަރުވީ ކަރަންޓު ދަންތުރައިގައި ޖެހިގެން
މަރުވެފައި އޮއްވާ ފެނުނު ސިމާދު
މިދިޔަ ފެބްރުއަރީ މަހުގެ ތެރޭގައި ގއ.ވިލިނގިލީ އޮޑިހަރުގެއެއްގެ ތެރޭގައި މަރުވެފައި އޮއްވާ ފެނުނު ހުސައިން ސިމާދު މަރުވެފައިވަނީ ކަރަންޓު ދަންތުރަ އެއްގައި ޖެހިގެން ކަމަށާއި އަދި އެކަހަލަ ދަންތުރަ ޖެހުމަކީ ގާނޫނީ ކުށެއް ކަމަށް ފުލުހުން ހާމަކޮށްފިއެވެ.
ބުރާސްފަތި ދުވަހު އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމެއްގައި ފުލުހުންގެ ސީރިއަސް އެންޑް އޯގަނައިޒްޑް ކްރައިމް ޔުނިޓުގެ އިސްވެރިޔާ ސުޕްރިންޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ މި މައްސަލައާއި ގުޅިގެން މިހާތަނަށް އެއްވެސް މީހަކު ހައްޔަރު ކުރެވިފައި ނުވާއިރު، މި މައްސަލައިގައި ޝައްކު ކުރެވެނީ އޮޑިހަރުގެ ބެލެހެއްޓުމާއި ހަވާލުވެގެން ހުރި ގއ.ވިލިނގިލީ ސައިސަން، ސައީދު ހަސަނަށް ކަމަށެވެ.
ސައީދު ހަސަންއަކީ މިހާރުވެސް ފެނަކައިގައި މަސައްކަތް ކުރަމުންދާ ކަރަންޓުގެ މަސައްކަތުގެ 40 އަހަރުގެ ތަޖުރިބާ ހުރި މީހެއް ކަމަށްވެސް ފުލުހުން ވަނީ ބުނެފައެވެ. ސިމާދު މަރުވެފައި އޮއްވާ ފެނިގެން ގއ.ވިލިނގިލީ ފުލުހުންނަށް ރިޕޯޓް ކުރީވެސް އޭނައެވެ.
މީހަކު މަރުވެފައި އޮތްކަމަށް ރިޕޯޓް ކޮށްގެން ފުލުހުން އެ ސަރަހައްދަށް ގޮސް ބެލިބެލުމުން އެ ހަރުގޭގެ އުތުރު ފަރާތު މެދަކާ ހަމައިން މީހަކު އޮތް ކަމަށް ފުލުހުންނަށް ފާހަގަ ކުރެވިފައިވާ ކަމަށާއި އެ މީހާގެ ހަށިގަނޑުގެ ކުޑަކަޅުވާއާ ހަމައިން އެތެރެ އޮތީ ޓިނުގަނޑުގައި އަޅާފައިވާ ބާގަނޑެއްގެ ތެރޭގައި ކަމަށް ފުލުހުން ވަނީ ބުނެފައެވެ. ފުލުހުންނަށް ފެނުނު އިރު ސިމާދުގެ ހަށިގަނޑު އޮތީ ހަރުދަނޑިވެ ހިނިއަރާފައެވެ.
މި މައްސަލައިގައި ފުލުހުންނަށް ޝައްކު ކުރެވޭ ކަންތައްތަކެއް ހުރުމުން އޮޑިހަރުގެ ކޯޓު އަމުރެއްގެ ދަށުން ބަލާފާސްކުރި އިރު އެ ބާގަނޑާ ދިމާލުން ކަރަންޓުގައި ޖެހޭގޮތަށް އޮތް ދެ ނަރު ފެނިފައިވާ ކަމަށާއި، އެ ނަރު އޮތީ ސިމާދުއާ 40 ފޫޓޫ ދުރަށް އެއްލާލާފައި ކަމަށް ފުލުހުންގެ ތަހުގީގަށް ފާހަގަކުރެވިފައިވެއެވެ. އަދި ސިމާދުގެ ހަށިގަނޑުން ނަރުގަނޑު ޖެހި ފިހިފައިވާ ތަންތަންވެސް ފެންނަން ހުރިކަމަށް ފުލުހުން ބުންޏެވެ. މީގެ އިތުރުން އެ ތަނުގެ ސަރކިޓް ބްރޭކަރ ހުރީ ނިއްވާލާފައި ކަމަށާއި އެއީ މީހަކު ގަސްތުގައި ކޮށްފައި ހުރި ކަމެއް ކަމަށްވެސް ފުލުހުން ވަނީ ބުނެފައެވެ.
ފުލުހުން ބުނީ މި އޮޑިހަރުގެއިން ވައްކަން ކޮށްގެން މީގެ ކުރިންވެސް އެތައް ފަހަރަކު ރިޕޯޓް ކޮށްފައިވާ ކަމަށެވެ. އަދި މި ހާދިސާ ހިނގުމުގެ ދެ މަސް ކުރިންވެސް އެތަނުން ވައްކަން ކޮށްފައިވެއެވެ. ނަމަވެސް ވައްކަން ކުރި ބާގަނޑު ހުރީ ވަރަށް އާދައިގެ ގޮތަކަށް ބަންދުކޮށްފައި ކަމަށާއި މިއީ ވަގުން ވަންނަށް މަގުފަހިވާ ގޮތަށް ކޮށްފައިވާ ކަމެއް ކަމަށް ވެސް ފުލުހުންނަށް ބެލެވިފައިވާ ކަމަށް އެ އިދާރާއިން ވަނީ މައުލޫމާތު ދީފައެވެ.
ސިމާދުގެ މަރުގެ މައްސަލައިގައި ސައީދު ހަސަން ހައްޔަރުކޮށްފައި ނުވަނީ ކީއްވެގެންތޯ ނޫސްވެރިއަކު ކުރި ސުވާލަކަށް ޖަވާބު ދެއްވަމުން ޝީފާއު ވިދާޅުވީ މައްސަލައިގައި ހެކި ފޮރުވެން އޮތް ކަމަށް ގަބޫލު ނުކުރައްވާ ކަމަށާއި އަދި މައްސަލައިގައި ދައުވާ ކުރަން ފޮނުވާފައި ނުވަނީ ތަހުގީގުގައި ފުރިހަމަ ކުރަން ޖެހޭ ކަންތައްތަކެއް ހުރުމުން ކަމަށެވެ. މި މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރަމުންދާ ކަމުގެ ޔަގީންކަންވެސް އޭނާ ވަނީ އަރުވާފައެވެ.
އިންސާނާގެ ފުރާނަޔަށް ފަރުވާލެއް ނެތި ކުރާ އަމަލަކުން މީހަކު މަރުވުމަކީ ދިވެހިރާއްޖޭގެ ގާނޫނުލްއުގޫބާތުގެ 112ވަނަ މާއްދާގެ ދަށުން ކުށެކެވެ. މި ކުށަކީ ޖިނާޔަތުގެ 4 ވަނަ ދަރަޖައިގެ ކުށެކެވެ.
