މެދު އާމްދަނީ ގައުމުތަކުގެ ތެރެއިން ދިވެހިރާއްޖެއަކީ ބޯހިޔާވަހިކަމުގެ މައްސަލަ އެންމެ ބޮޑަށް ދިމާވެފައިވާ ގައުމު ކަމަށް ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ބުދަ ދުވަހުގެ ރޭ ވެށިފަހި މާލެ ޕްރޮގްރާމްގައި ވާހަކަދައްކަވަމުން ނަޝީދު ވިދާޅުވީ ދައުލަތުގެ ބަޖެޓުން ރައްޔިތުންނަށް ބޯހިޔާވަހިކަން ފޯރުކޮށްދޭންޖެހޭ ކަމަށާއި، ދައުލަތުން ދަރަންޏަށް ފައިސާ ނަގައިގެން ވެސް ރައްޔިތުންނަށް މިއަދު ދިމާވެފައިވާ މިމައްސަލައަށް ހައްލު ހޯދަދޭންޖެހޭ ކަމަށެވެ. އަދި އެމްޑީޕީން މަސައްކަތް ކުރަނީ ބޯހިޔާވަހިކަން ބޭނުންވާ ހުރިހާ ރައްޔިތުންނަށް ވެސް ބޯހިޔާވަހިކަން ފޯރުކޮށްދޭން ކަމަށެވެ.

"އަޅުގަނޑުމެންގެ ބޭނުމަކީ މުޅި ޖުމްލަކޮށް އެންމެނަށް ވެސް އެނގިފަ ހުރުން މިވެނި ގޮތްތަކެއްވީމަ މިވެނި ކަމެއް ވާނޭ. އެއުސޫލުތައް އަޅުގަނޑުމެން ރަނގަޅަށް ކަނޑައެޅުން. މީހަކާ އިނީމަ ނުވަތަ ފުރާވަރަށް އެރީމަ ބޯހިޔާވަހިކަމެއް އޮންނަން ޖެހޭނޭ. އޭނައަށް އެކަން ދެންވާނެ ގޮތް ހޯދާދޭންޖެހޭނޭ."

ނަޝީދު ވިދާޅުވީ ދިވެހިރާއްޖޭއަކީ މެދު އާމްދަނީގެ ގައުމެއް ކަމަށާއި، ގައުމީ އުފެއްދުންތެރިކަމާއެކު ބޮލަކަށް ޖެހޭނީ ނިސްބަތް އެހާ ބޮޑު ގައުމެއް ކަމަށެވެ. ނަމަވެސް ގިނަ ރައްޔިތުން ބޯހިޔާވަހިކަން ހޯދުމަށް މިހައި ދަތިހާލުގައި އޮތް ގައުމެއް ނެތް ކަމަށް ނަޝީދު ވިދާޅުވިއެވެ.

ވެށިފަހި މާލެ ޕްރޮގްރާމަށް އަލިއަޅުއްވާ ލައްވާ ނަޝީދު ވިދާޅުވީ މިޕްރޮގްރާމްގެ ދަށުން ބޯހިޔާވަހިކަން ހޯދަން 8،000 އަށް ވުރެ ގިނަ މީހުން ފޯމް ހުށަހަޅާފައިވާ ކަމަށެވެ. އަދި ފްލެޓަށް ކުރިމަތިލި އެންމެންނަށް ފްލެޓް ލިބޭނެ ކަމަށް ނަޝީދު ވިދާޅުވިއެވެ.

މީގެ އިތުރުން ނަޝީދު ވިދާޅުވީ ވެށިފަހި މާލެ އަކީ ގުޅީފަޅުން ފެށިގެން ހުޅުމާލެއާ ހަމައަށް އެއްކޮށް ގުޅުވާލައި، އެ ހުރިހާ ތަންތަނުގައި ބޯހިޔާވަހިކަން ފޯރުކޮށް ދިނުން ކަމަށާއި, މިމަޝްރޫއިން މާލެ ސަރަހައްދުގައި ހުރި ބޯހިޔާވަހިކަމުގެ މައްސަލައަށް ހައްލު ލިބޭނެ ކަމަށެވެ.

ނަޝީދު ވިދާޅުވީ އެމަނިކުފާނުގެ ވެރިކަމުގައި މިޕްރޮގްރާމް ކުރިއަށް ނުގެންދެވުނީ ރައްޔިތުންގެ މަޖިލީހުގެ ތެރެއިން އެއްބާރުލުން ނުލިބިގެން ކަމަށާއި، ނަމަވެސް މިފަހަރު ރައްޔިތުންގެ މިހުވަފެން ހަގީގަތަކަށް ހެދުމަށް ކުރިއަށް އޮތް ރައްޔިތުންގެ މަޖިލިހުގެ އިންތިޚާބުގައި އެމްޑީޕީއަށް މެޖޯރިޓީ ލިބިގެން ކަމަށެވެ. އަދި  އެޖެންޑާ19 ތަންފީޒު ކުރެވިގެން ކަމަށް ނަޝީދު ވިދާޅުވިއެވެ.