ރަޝްފޯޑްގެ އެއްބަސްވުން އެއް އަހަރަށް އިތުރުކުރަނީ

މެންޗެސްޓާ ޔުނައިޓެޑަށް ކުޅެމުން އަންނަ އިނގިރޭސި ފޯވާޑް މާކަސް ރަޝްފޯޑް އެ ކްލަބާއެކު ހަދާފައިވާ އެއްބަސްވުން އެއް އަހަރަށް އިތުރުކުރަން އުޅޭ ކަމަށް ރިޕޯޓްތައް ބުނެފިއެވެ.

ރިޕޯޓްތައް ބުނާގޮތުން އުމުރުން 21 އަހަރުގެ ރަޝްފޯޑްގެ އެއްބަސްވުން އިތުރުކުރުމަށް މިހާރު ހަމަޖެހިފައިވަނީ އެއް އަހަރަށެވެ. އަދި އެކަމަށް ރަޝްފޯޑްވެސް އެއްބަސްވެފައިވާ ކަމަށް ރިޕޯޓްތައް ބުނެއެވެ.

މި ސީޒަނަށްފަހު ޔުނައިޓެޑާއެކު ރަޝްފޯޑް ހަދާފައިވާ އެއްބަސްވުން ހަމަވާއިރު، ރިޕޯޓްތައް ބުނާ ގޮތުން އޭނާއާ ފުރަތަމަ މަޝްވަރާ ކުރެވުނީ އެއްބަސްވުން ފަސް އަހަރަށް އިތުރުކުރާށެވެ. ނަމަވެސް ފަހުން ނިމިފައި ވަނީއެއް އަހަރަށް އިތުރުކުރަން ކަމަށް ރިޕޯޓްތައް ބުނެއެވެ.

ރަޝްފޯޑް ހޯދަން ދުނިޔޭގެ ނަން މަޝްހޫރު ގިނަ ކްލަބްތަކުން އަންނަނީ މަސައްކަތް ކުރަމުންނެވެ. އޭގެ ތެރެއިން ރެއާލް މެޑްރިޑުން އަންނަނީ ވަރަށް ބޮޑަށް އޭނާ ހޯދަން މަސައްކަތް ކުރަމުންނެވެ.

ޔުނައިޓެޑުގެ ފުރަތަމަ 11 އިން ޖާގަ ލިބުން ކުރިން ދަތިވެފައިވާ ރަޝްފޯޑަށް އާ ކޯޗު ސޮލްޝެއާ ޓީމާ ހަވާލުވިފަހުން މިހާރު ފުރަތަމަ 11 އިން ފުރުސަތު ލިބުން ވަނީ ގިނަވެފައެވެ.

މެންޗެސްޓާ ޔުނައިޓެޑުން 2015 ވަނަ އަހަރުގެ ސީޒަނުގައި ސީނިއާ ކެރިޔަރު ފެށި ރަޝްފޯޑް ވަނީ ޔުނައިޓެޑަށް ކުޅުނު 161 މެޗުގައި 44 ލަނޑު ކާމިޔާބުކޮށްފައެވެ.

ރަޝްފޯޑް ވަނީ ޔުނައިޓެޑާއެކު އެފްއޭ ކަޕް، ލީގް ކަޕް، އެފްއޭ ކޮމިއުނިޓީ ޝިލްޑް އަދި ޔުއެފާ ޔޫރޮޕާ ލީގުވެސް ކާމިޔާބުކޮށްފައެވެ.

އިންގްލޭންޑް ގައުމީ ޓީމާއެކު ނިމިގެންދިޔަ ފީފާ ވޯލްޑް ކަޕްގެ ހަތަރުވަނަ ހޯދި ރަޝްފޯޑް ވަނީ އެޓީމަށް ކުޅުނު 31 މެޗުގައި ހަ ލަނޑު ކާމިޔާބުކޮށްފައެވެ.