އެޖެންޑާ 19 ގެ ވެށިފަހި ޕްރޮގްރާމްގެ މައުލޫމާތު ބައްދަލުވުމެއް މާދަމާރޭ ކާނިވަލްގައި
ބުދަ ދުވަހުގެ ރޭ 9:00 ގައި ކާނިވަލްގައި އިވެންޓް ފެށޭނެ
އެމްޑީޕީން ބޭއްވި ނޫސްވެރިންގެ ބައްދަލުވުން
އެޖެންޑާ 19 ގެ ބޯހިޔާވަހިކަމުގެ ސިޔާސަތުތަކުގެ ދަށުން ކުރިއަށް ގެންދާ "ވެށިފަހި" ޕްރޮގްރާމްގެ މައުލޫމާތު ބައްދަލުވުމެއް ބުދަ ދުވަހުގެރޭ ކާނިވަލް ސަރަހައްދުގައި ބޭއްވުމަށް ހަމަޖެހިފައިވާ ކަމަށް އެމްޑީޕީން ބުނެފިއެވެ.
އަންގާރަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ ޑެޕިއުޓީ ސެކްރެޓަރީ ޖެނެރަލް އަފްޝަން ލަތީފް ވިދާޅުވީ، އެޖެންޑާ 19 ގެ ދަށުން ހިންގާ ވެށިފަހި ޕްރޮގްރާމްގެ މައުލޫމާތު ރައްޔިތުންނަށް ފޯރުކޮށްދިނުމަށް ބާއްވާ މި ބައްދަލުވުމުގައި އެމްޑީޕީގެ ރައީސް މުހައްމަދު ނަޝީދާއި، މާލޭ ސިޓީ ކައުންސިލުގެ މޭޔަރ ޝިފާ މުހައްމަދު ވެސް ބައިވެރިވެ ވަަޑައިގަންނަވާނެ ކަމަށެވެ.
ބުދަ ދުވަހުގެ ރޭ 9:00 ގައި ކާނިވަލް ސަރަހައްދުގައި މި ބައްދަލުވުން ފެށިގެންދާއިރު، މިއީ ބޯހިޔާވަހިކަމަށް އެދިވަޑައިގެން ތިއްބެވި ބޭފުޅުންނަށް ވަރަށް މުހިއްމު މައުލޫމާތުތަކެއް ފޯރުކޮށްދެވޭނެ ބައްދަލުވުމެއް ކަމަށާއި، މި ބައްދަލުވުމަށް ވެށިފަހި ޕްރޮގްރާމްގައި ބައިވެރިވުމަށް އެދިލައްވާފައިވާ ފަރާތްތަކާއި، ފްލެޓާއި ގޯތި ލިބިވަޑައިގެންފައި ނުވާ ބޭފުޅުން ބައިވެރިވެ މައުލޫމާތު ސާފުކުރުމަށް އެ ޕާޓީން އެދިފައިވެއެވެ.
ބޯހިޔާވަހިކަމުގެ މައްސަލައަށް ހައްލެއް ގެންނާނެ ކަމަށް އެމްޑީޕީގެ އެޖެންޑާ 19 ގައި މުހިއްމު ސިޔާސަތުތަކެއް ކަނޑައަޅާފައިވާއިރު، މާލޭގެ ގޯތި ގެދޮރު ނެތް ހުރިހާ ފަރާތްތަކަށް ވެރިކަމުގެ ތެރޭގައި ބޯހިޔާވަހިކަން ފޯރުކޮށްދޭނެ ކަމަށް ސަރުކާރުން ވައުދުވެފައިވާނެ ކަމަށާއި، މާލެއަށް ޚާއްސަކޮށް، އަދި މާލޭގައި ދިރިއުޅޭ ރައްޔިތުންގެ ތެރެއިން ގޯތިގެދޮރު ނެތް ރައްޔިތުންނަށް ޚާއްސަކޮށްގެން ބޮޑު ހައުސިންގް ޕްރޮޖެކްޓެއް ދާދި އަވަހަށް އިއުލާނު ކުރެވިގެންދާނެ ކަމަށް ރައީސް ސޯލިހު ވެސް ވިދާޅުވެފައިވެއެވެ.
