މަޖިލިސް އިންތިހާބުގެ ކުރިން އައިޑީކާޑު ހެއްދޭނީ 25 މާރޗްގެ ކުރިން
މުއްދަތުގެ ފަހުން ހުށައަޅާ އައިޑީކާޑުތައް ހެއްދުމުގައި ދަތިތަކެއް ދިމާވެ އައިޑީކާޑު ނުހެދި ލަސްވެދާނެ ކަމަށް ވެސް އެ އިދާރާއިން ވަނީ ބުނެފަ
ޑިޕާޓްމަންޓް އޮފް ނެޝަނަލް ރެޖިސްޓްރޭޝަން ބޭރުގައި މީހުން ކިޔުގައި
ކުރިޔަށް އޮތް ރައްޔިތުންގެ މަޖިލިސް އިންތިހާބުގެ ކުރިން ދިވެހި ރައްޔިތެއްކަން އަންގައިދޭ ކާޑު ހެއްދޭނެ އެންމެ ފަހުގެ ތާރީހަކީ 25 މާރޗް 2019 ކަމަށް ޑިޕާޓްމަންޓް އޮފް ނެޝަނަލް ރެޖިސްޓްރޭޝަންއިން އަންގައިފިިއެވެ
އެ ޑިޕާޓްމަންޓުން ކުރި އިއުލާނެއްގައި ބުނެފައިވަނީ މުއްދަތު ހަމަވާން ކައިރިވެފައިވާ އައިޑީކާޑުތަކާއި ގެއްލުމެއްލިބި ހަލާކުވުމުގެ ސަބަބުން ހަދަންޖެހިފައިވާ އައިޑީކާޑުތައް 25 މާރިޗް 2019 ގެ ކުރިން ހެއްދެވުމަށް ހާއްސަ ސަމާލުކަމެއް ދެއްވުމަށް ވަނީ އެދިފައެވެ. އަދި މި މުއްދަތުގެ ފަހުން ހުށައަޅާ އައިޑީކާޑުތައް ހެއްދުމުގައި ދަތިތަކެއް ދިމާވެ އައިޑީކާޑު ނުހެދި ލަސްވެދާނެ ކަމަށް ވެސް އެ އިދާރާއިން ވަނީ ބުނެފައެވެ.
ކޮންމެ އަހަރަކުވެސް އިންތިހާބާ ދިމާކޮށް ގިނަ އަދަދެއްގެ އައީޑީ ކާޑު ހައްދަން ނުވަތަ އާކުރަން ހުށައެޅުމާއި ގުޅިގެން އެ ޑިޕާޓްމަންޓަށް ގިނަ އަދަދެއްގެ ދަތިތަކާއި ކުރިމަތިވާ ކަމަށް ޑީއެންއާރްއިން ވަނީ މައުލޫމާތު ދީފައެވެ.
އެޕްރީލް 6 ވަނަ ދުވަހު ބާއްވަން ހަމަޖެހިފައިވާ ރައްޔިތުންގެ މަޖިލީހުގެ އިންތިހާބުގައި 264،589 މީހުން ވޯޓުލުމުގެ ހައްގު ލިބިފައިވާ ކަމަށް އީސީން ވަނީ މައުލޫމާތު ދީފައެވެ. އިންތިހާބުގައި 87 ދާއިރާއަކަށް 393 ކެންޑިޑޭޓުން ވާދަކުރާއިރު މިފަހަރުގެ އިންތިހާބުގައި ޖުމްލަ 507 ވޯޓު ފޮއްޓެއް ބެހެއްޓުމަށް ވަނީ ނިންމާފައެވެ.
