އައްޑޫ އާއި ފުވައްމުލުކުގެ ކުނި މެނޭޖު ކުރުމުގެ އެއްބަސްވުމުގައި ސޮއިކޮށްފި
19 މާރިޗު 2019 | އަންގާރަ 09:12ކުނިން ހަކަތަ އުފައްދަން މަގުފަހި ކޮށްދިނުމަކީ މި ސަރުކާރުގެ ވައުދެއް
ކުނި މެނޭޖް ކުރުމުގެ އެއްބައްވުމުގައި ސޮއިކުރުމުގެ ރަސްމިއްޔާތުގެ ތެރެއިން
އައްޑޫ ސިޓީ އާއި ފުވައްމުލަކު ސިޓީގެ ކުނި މެނޭޖް ކުރުމަށާއި ކުނިން ހަކަތަ އުފައްދައިދޭ ފެސިލިޓީއެއް ގާއިމް ކުރުމުގެ އެއްބަސްވުމެއްގައި ކޮރެއާގެ "ލޮޓަސް – ކުންވާ ޖޮއިންޓް ވެންޗަރ" ކުންފުންޏާ އެކު ސޮއިކޮށްފިއެވެ.
ބުރާސްފަތިި ދުވަހު އައްޑޫސިޓީ ނޭޗަރ ޕާރކުގައި ކުރިއަށްދިޔަ ސޮއިކުރުމުގެ ރަސްމިއްޔާތުގައި މި ފެސިލިޓީ ގާއިމުކުރުމަށް މިނިސްޓްރީގެ ފަރާތުން އެއްބަސްވުމުގައި ސޮއި ކުރެއްވީ މިނިސްޓަރ އޮފް އެންވަޔަރަމަންޓް ޑރ. ހުސައިން ރަޝީދު ހަސަންއެވެ. ލޮޓަސް ކުންފުނީގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ ރައީސް ލިންޑޮން ޔިލްއެވެ.
ސޮއި ކުރުމުގެ ރަސްމިއްޔާތުގައި އައްޑޫ މޭޔަރު އަބްދުﷲ ސޯދިގް (ސޯބެ) އާއި ފުވައްމުލަކުގެ މޭޔަރު އަބްދުﷲ ފަލާހް ޝަރީފް ވެސް ބައިވެރިވަޑައިގެންނެވިއެވެ.
މި ފެސިލިޓީގައި ގާއިމްކުރާ "ވޭސްޓް ޓު އެނަރޖީ" ޕްލާންޓަކީ އިންސިނިރޭޓަރަކާއި ވޭސްޓް ހީޓް ބޮއިލަރގެ އިތުރުން ސްޓީމް ޓަރބައިންއަކާއި އަދިވެސް އިތުރު ބައެއް ބައިތައް ހިމެނޭ ގޮތަށް ތައްޔާރުކުރެވޭ ޕްލާންޓެކެވެ.
މި އެއްބަސްވުމުގެ ދަށުން އައްޑޫ ސިޓީ ހިތަދޫގައި ގާއިމުކުރެވޭ ވޭސްޓް މެނޭޖްމަންޓް ފެސިލިޓީއަށް ބޭނުންވާ އިކުއިޕްމަންޓްތައް ޑިޒައިންކޮށް، ސަޕްލައިކޮށް އަދި އިންސްޓޯލްކުރުމުގެ މަސައްކަތް ލޮޓަސް ކުންވާ ޖޮއިންޓް ވެންޗަރ ކުންފުންޏާ ވަނީ ހަވާލުކުރެވިފައެވެ. މި މަޝްރޫއު ނިމޭނެ ކަމަށް އަންދާޒާކޮށްފައި ވަނީ 2021 ވަނަ އަހަރަށެވެ.
މި ރަސްމިއްޔާތުގައި ވާހަކަފުޅު ދައްކަވަމުން އެންވަޔަރަމްންޓް މިނިސްޓަރު ވިދާޅުވީ މި ފެސިލިޓީގައި ދުވާލަކު 1.5 މެގަވޮޓްގެ ކަރަންޓް އުފެއްދޭނެ ކަމަށެވެ. މީގެ ތެރެއިން އެއް މެގްވޮޓް ކަރަންޓް އައްޑޫގެ ރަށްތަކަށް ދެވޭ އިރު ބާކީ 500 ކިލޯވޮޓް ބޭނުންކުރާނީ ޕްލާންޓް ހިންގުމަށް ކަމަށް ވެސް މިނިސްޓަރ ވިދާޅުވިއެވެ. މީގެ އިތުރުން މި ޕްލާންޓްގެ ސަބަބުން ކަރަންޓު އުފެއްދުމަށް ބޭނުންކުރާ ޑީސަލްގެ މިންވަރު ދަށްވެ ތިމާވެށީ ރައްކާތެރިކުރަން ކުރާ މަސައްކަތްތަށް އިތުރުވެގެން ދާނެ ކަމަށް ވެސް މިނިސްޓަރ ވަނީ ފާހަގަކުރައްވާފައެވެ. ކުނިން ހަކަތަ އުފެއްދުމަށް މަގު ފަހި ކޮށްދިނުމަކީ މި ސަރުކާރުގެ ވައުދެކެވެ.
އައްޑޫ ސިޓީ އާއި ފުވައްމުލަކު ސިޓީ ހިމެނޭ ގޮތަށް ދެކުނުގެ ސަރަހައްދުގައި އުފެދޭ ކުނި މެނޭޖްކުރުމަށް ގާއިމުކުރާ ރީޖަނަލް ވޭސްޓް މެނޭޖްމަންޓް ފެސިލިޓީ މަޝްރޫއަކީ 16 މިލިއަން ޑޮލަރު (246 މިލިއަން ރުފިޔާ)ގެ މަޝްރޫއެކެވެ. މިއީ ސަރުކާރުން ނަގާ ގްރީން ޓެކްސް ފަންޑުން ހިންގާ ފުރަތަމަ ޕްރޮޖެކްޓެވެ.
