ކެޓްރީނާ އަނެއްކާވެސް އައު ކާރެއް ގަނެފި
18 މާރިޗު 2019 | ހޯމަ 16:45މި ކާރުގެ އަގު ގާތްގަނޑަކަށް އިންޑިއަން ރުޕީސްގެ 49 ލައްކަ އާއި 65 ލައްކާއާއި ދެމެދުގެ އަގަކަށް އަރާނެ
ކެޓްރީނާ ކެއިފް
ބޮލީވުޑްގެ ތަރި ކެޓްރީނާ ކެއިފް އަނެއްކާ ވެސް އައު ކާރެއް ގަނެފިއެވެ.
"މިޑް ޑޭ" ގައި ރިޕޯޓް ކޮށްފައިވާ ގޮތުން ކެޓްރީނާ ގަނެފައިވަނީ "ރޭންޖް ރޯވާ" ކާރެކެވެ.
ކެޓްރީނާގެ އަމިއްލަ "އައުޑި" ކާރެއް އޮންނައިރު އަލަށް ގަނެފައިވާ ކާރަށް ވެސް ހަމަ އެއް ރަޖިސްޓްރޭޝަން ނަމްބަރެއް ވަނީ ހޯދާފައެވެ.
ކެޓްރީނާ އަލަށް ގަނެފައިވާ "ރޭންޖް ރޯވާ" ކާރުގެ އަގު ގާތްގަނޑަކަށް އިންޑިއަން ރުޕީސްގެ 49 ލައްކަ އާއި 65 ލައްކާއާއި ދެމެދުގެ އަގަކަށް އަރާނެ ކަމަށް ރިޕޯޓްތައް ބުނެއެވެ.
ދާދިފަހުން ކެޓްރީނާ ވަނީ ދަބްނަގް ޓުއާގައި ދުބާއި ދިއުމަށް ފަހު އެނބުރި އިންޑިއާއަށް ގޮސްފައެވެ. ދުބާއީއަށް ކެޓްރީނާ އާއި ސަލްމާން ޚާން އަދި ޖެކުލިން ފެނާންޑޭޒްގެ އިތުރުން ވެސް ގިނަ ތަރިން ތަކެއް ޝޯ ހުށަހެޅުމަށް ދިޔަ ނަމަވެސް މޫސުން ގޯސް ވުމުގެ ސަބަބުން މި ޝޯ ވަނީ ކެންސަލް ކޮށްފައެވެ.
ކެޓްރީނާ އެންމެ ފަހުން ފެނިގެން ގޮސްފައިވަނީ އާމިރު ޚާން އާއި އަމީތާބް ބަޗަން އާއިއެކު "ތަގްސް އޮފް ހިންދުސްތާން" އިންނާއި ޝާހުރުކް ޚާން އާއި އެކު "ޒީރޯ" އިންނެވެ.
މި ދެ ފިލްމަށް ވެސް ބޮކްސް އޮފީހުގައި މާބޮޑު އާމްދަނީއެއް ލިބިގެން ގޮސްފައެއް ނުވެއެވެ. ކެޓްރީނާ ދެން އެންމެ އަވަހަށް ފެނިގެންދާނީ ސާލްމާން ޚާން އާއި އެކު އަލީ އައްބާސް ޒަފަރުގެ ފިލްމް "ބާރަތް" އިންނެވެ. މި ފިލްމްގައި ސުނިލް ގްރޯވާ، ތައްބޫ، ދިޝާ ޕަޓާނީ އަދި ޖެކީ ޝްރޮފް ފެނިގެން ދާނެއެވެ.
