ކެޓްރީނާ ބެޑް ރެސްޓްގައި
އަނިޔާވީ ކަނދުރާ މައްޗަށް ބަރު އެއްޗެއް ޗެއްޓިގެން
ކެޓްރީނާ ކައިފް
ބޮލީވުޑް އެކްޓްރެސް ކެޓްރީނާ ކައިފް އޭނާ އެންމެ ފަހުން ކުޅުނު ފިލްމް "ޖައްގާ ޖާސޫސް" އަންނަ އެޕްރީލް މަހު ރިލީޒް ކުރުމަށް ހަމަޖެހިފައިވާއިރު ފިލްމުގެ އެންމެ ފަހުގެ ތައްޔާރީތައް ވަމުން ދަނިކޮށް ކެޓްރީނާއަށް އަނިޔާ ވެއްޖެއެވެ.
ރިޕޯޓްތައް ބުނާ ގޮތުން "ޖައްގާ ޖާސޫސް"ގެ ސެޓްގައި ކެޓްރީނާ މަސައްކަތް ކުރަމުން ދަނިކޮށް އޭނާގެ ކަނދުރާ މައްޗަށް ބަރު އެއްޗެއް ވެއްޓިގެންނެވެ.
ކެޓްރީނާގެ ކަނދުރާއާއި ބުރަކައްޓަށް އަނިޔާވުމާ ގުޅިގެން ކުއްލި ގޮތަކަށް މެޑިކަލް ޗެކަޕް ހެދުމަށްފަހު އޭނާ ބެޑްރެސްޓް ކުރުމަށް ވަނީ ލަފާ ދީފައެވެ.
މީގެ އިތުރުން މިދުވަސްކޮޅު ހެލިފެލިވެ އެއްވެސް ބުރަ މަސައްކަތް ނުކުރުމަށް ވެސް ވަނީ އަންގާފައެވެ.
އަނޫރާގް ބަސޫ ޑައިރެކްޓް ކުރާ މި ފިލްމްގައި ކެޓްރީނާ އާއި އެކު ލީޑްރޯލުން ފެނިގެން ދަނީ އޭނާގެ ކުރީގެ ލޯބި ވެރިޔާ ރަންބީރު ކަޕޫރެވެ.
އަންނަ އެޕްރީލް މަހު ގެ 7 ވަނަ ދުވަހު "ޖައްގާ ޖާސޫސް" ރިލީޒް ކުރުމަށް ހަމަޖެހިފައިވާއިރު ކެޓްރީނާ ދެން މަސައްކަތް ހަމަޖެހިފައިވަނީ ސަލްމާން ޚާން އާއި އެކު "ޓައިގާ ޒިންދާހޭ" ގައެވެ.
އަދި ރަންބީރު ކަރޫރް ދަނީ ސަންޖޭދަތުގެ ހަޔާތުހެ މައްޗަށް ބިނާކޮށް ތައްޔަރުކުރާ ފިލްމްގެ މަސައްކަތްތައް ކުރަމުން ނެވެ.
