އެސްއެމްއީ ބޭންކާ އެކު ޤައުމުގެ އިޤްތިޞާދަށް އިންޤިލާބީ ބަދަލުތަކެއް އަންނާނެ: ރައީސް ސޯލިހް
18 މާރިޗު 2019 | ހޯމަ 05:26އެސްއެމްއީ ބޭންކްގެ އަމާޒަކީ، ރައްޔިތު މީހާގެ އަތްމަތި ތަނަވަސްކޮށްދީގެން ޤައުމުގެ އިޤްތިޞާދު ވަރުގަދަ ކުރުން
ރައީސް އިބްރާހިމް މުހައްމަދު ސޯލިހް - އެސްއެމްއީ ބޭންކެއް ހުޅުވުމަކީ އެމަނިކުފާނުގެ ވައުދެއް
އެސްއެމްއީ ބޭންކާ އެކު ޤައުމުގެ އިޤްތިޞާދަށް އިންޤިލާބީ ބަދަލުތަކެއް އަންނާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެ އެވެ.
އެސްއެމްއީ ބޭންކް އިފްތިތާހްކޮށްދެއްވުމަށް ފަހު ވާހަކަފުޅު ދައްކަވަމުން ރައީސް އިބްރާހިމް މުހައްމަދު ސޯލިހް ވިދާޅުވީ، އެސްއެމްއީ ބޭންކް ތައާރަފްކުރުމަށް ނިންމީ، ރައްޔިތުން ބާރުވެރި ކުރުވައި، ޤައުމީ އާމްދަނީން، ސީދާ ރައްޔިތު މީހާގެ ޖީބަށް ވަންނަ މިންވަރު އިތުރުކުރުމުގެ ސިޔާސަތުގެ ދަށުށް ކަމަށެވެ. އަދި އެ ސިޔާސަތުގެ އަމާޒަކީ، ރައްޔިތު މީހާގެ އަތްމަތި ތަނަވަސްކޮށްދީގެން ޤައުމުގެ އިޤްތިޞާދު ވަރުގަދަ ކުރުން ކަމަށް އެމަނިކުފާނު ވިދާޅުވިއެވެ.
ރައީސް ސޯލިހް ވިދާޅުވީ، ރާއްޖޭގެ ވިޔަފާރި މާޙައުލުގައި ޙަރަކާތްތެރިވާ، ގާތްގަނޑަކަށް 93 އިންސައްތަ ވިޔަފާރިއަކީ، ކުދި އަދި މެދު ފަންތީގެ ވިޔަފާރިތައް ކަމަށާއި، އެ ނިސްބަތުން ބަލާ ނަމަ، ޤައުމީ އިޤްތިޞާދުގެ މައިބަދައަކީ އެ ބާވަތުގެ ވިޔަފާރިތައް ކަމަށެވެ. އަދި ޢަދަދުން ބަލާ ނަމަ، ބޮޑެތި ވިޔަފާރިތަކުގެ ކެޕިޓަލް ޢަދަދު ނުވަތަ ރައުސްމާލް އެތައް ބިލިއަނަކުން ގުނާލެވޭ ކަމަށާއި، އެކަމަކު ވަޒީފާގެ ފުރުސަތުތައް އެންމެ ގިނައިން އުފައްދައިދެނީ ކުދި އަދި މެދު ފަންތީގެ ވިޔަފާރިތައް ކަމަށް ރައީސް ސޯލިހް ވިދާޅުވިއެވެ.
"އެކަން އެހެން އޮތްއިރު، އަމިއްލަ ދިރިއުޅުމެއް ފަށަން ބޭނުންވި އެތައް ޒުވާނުންނެއް މިއަދުވެސް ތިބީ، ދާނެ ދިމާލެއް ނޭނގި، ޙަޔާތުގެ ހަތަރު އަނގޮޅިއަކަށް ހުއްޓިފައި. ގެވެހި އެތައް އަންހެނުންނެއް ތިބީ، އެ މީހުންގެ މަސައްކަތްތެރިކަމުގެ ހުނަރުން އާމްދަނީ ހޯދޭނެ އެއްވެސް ގޮތެއް ނެތިފައި. ނުކުޅެދުންތެރިކަން ހުންނަ މީހުންގެ ތެރޭގައި ވެސް އާމްދަނީ ހޯދަން ބޭނުންވާ ކިތަންމެ ބަޔަކު އެބަތިބި."
ޤައުމީ ތަރައްޤީގެ ވާހަކަ ދެއްކުމުގައި މިވީހާ ޒަމާނެއް ފާއިތުވެގެން ދިޔައީ، މުޖްތަމަޢުގެ އެކި ފަންތިތަކަށް އަޅައިލާނެ މީހަކު ނެތި ކަމަށާއި، އެ މީހުންގެ އަތުގައި ހިފައިގެން ކޮޅަށް ނަގައިދިނުމުގެ ސިޔާސީ ހިތްވަރާއި އަޒުމް ނެތުމުން، ޤައުމީ ތަރައްޤީގެ އެ މުހިންމު ބައިވެރިން ތިބީ، ޤައުމީ އުފެއްދުންތެރިކަމުން ހަވާސާ ކުރެވިފައިކަމަށް ރައީސް ސޯލިހް ވިދާޅުވި އެވެ. އަދި މިއަދު ފަށާ އެސްއެމްއީ ބޭންކުގެ ޚިދުމަތާ އެކު، ޒުވާން އެތައް ވިޔަފާރިވެރިންނެއް އުފެދިގެންދާނެ ކަމަށާއި، ދިވެހި އަންހެނުންގެ ހުނަރުވެރި އުފެއްދުންތަކުން، ޤައުމީ އިޤްތިޞާދަށް އިންޤިލާބީ ބަދަލުތަކެއް ގެނުވާނެ ކަމަށް އެމަނިކުފާނު ވިދާޅުވި އެވެ. އޭގެ އިތުރުން ހަމައެފަދައިން މިއީ، ގޭގައި ތިބެގެން އާމްދަނީ ހޯދަން ބޭނުންވާ މީހުންނަށް ދެވޭ ވަރަށް ބޮޑު އެހީއަކަށް ވެސް ވާނެ ކަމަށް ރައީސް ސޯލިހް ވިދާޅުވި އެވެ.
އެ މޭރުމުން ވާހަކަ ކުރިއަސްގެންދަވަމުން ރައީސް ސޯލިހް ވދިާޅުވީ، އެސްއެމްއީ ލޯންގެ 20 އިންސައްތަ ޚާއްޞަކޮށްފައިވާނީ އަންހެނުންނަށާއި ޒުވާނުންނަށް އަދި ނުކުޅެދުންތެރިކަން ހުންނަ މީހުންނަށް ކަމަށެވެ. އެއާއެކު އެސްއެމްއީ ލޯނަކީ، އޭގެ ބެހެނިވެރިންގެ އިޖްތިމާޢީ ނިސްބަތަށް ބަލާއިރު، މުޅި ޤައުމުގެ ތިން ބައިކުޅަ ދެބަޔަށް ވުރެ ވެސް ގިނަ މީހުންނަށް އެހީތެރިވެދޭނެ ލޯން ސްކީމަކަށް ވާނެ ކަމަށް ރައީސް ވިދާޅުވިިއެވެ.
"ރާއްޖޭގެ އިޤްތިޞާދީ އޮނިގަނޑު، މާ ކުރިންސުރެ އަތުރާލެވިފައި އޮތީ، ބޮޑެތި ވިޔަފާރިތަކަށް ހުރިހާ ކަމެއް ފަހިވާ ގޮތަށް. އެހެންކަމުން، އަލަށް ފަށަން ބޭނުންވާ، ކުދި އަދި މެދު ފަންތީގެ ވިޔަފާރިތަކަށް ލޯނާއި ފައިސާގެ އެހީ ހޯދުމަކީ، ރާއްޖޭގެ މާލީ ނިޒާމުގެ ތެރެއިން އެހާ ފަސޭހައިން ކުރެވޭ ގޮތަށް އޮތް ކަމެއް ނޫން."
ރައީސް ސޯލިހް ވިދާޅުވީ ޤައުމުގެ މިހާރުގެ ޙާލަތަށް ބަލާއިރު، ކުދި އަދި މެދު ފަންތީގެ ވިޔަފާރިތައް މިހާރަށް ވުރެ ގިނަވެ، މިހާރަށް ވުރެ ހަލުވި ދުވެއްޔެއްގައި ހިނގައިގަނެގެން މެނުވީ، ޖަޒީރާ ރާއްޖެއަކަށް ބޭނުންވާ ތަރައްޤީއާއި ކުރިއެރުން ހޯދުން ދަތިވާނެކަމަށެވެ. އަދި އެސްއެމްއީ ބޭންކެއް އުފެއްދީ އެފަދަ ވިޔަފާރިތަކަށް ފަސޭހައިން ލޯނު ލިބޭނެ ގޮތެއް ހޯދައިދިނުމުގެ މަޤްޞަދުގައިކަމަށް އެމަނިކުފާނު ވިދާޅުވި އެވެ.
