އިންޓަރނޭޝަނަލް ކްރިމިނަލް ކޯޓުން ފިިލިޕީންސް ވަކިވެއްޖެ
18 މާރިޗު 2019 | ހޯމަ 08:40ފިލިޕީންސްގެ މައްސަލަ ބަލަން ފެށީ ފެބްރުއަރީ 2018 ގައި
އައިސީސީގެ މެމްބަރުކަމުން ވަކި ވިޔަސް އޭގެ ކުރިން ހުށަހެޅިފައިވާ މައްސަލަތކުގައި ދައުވާ ކުރެވޭނެ
އިންޓަރނޭޝަނަލް ކްރިިމިނަލް ކޯޓުން ފިލިޕީންސް ރަސްމީކޮށް ވަކިވެއްޖެއެވެ.
ފިލިޕީންސުން އެ ކޯޓުން ވަކިވެފައި މި ވަނީ މަސްތުވާ ތަކެއްޗާ ދެކޮޅަށް ކުރަމުންދާ ހަނގުރާމައިގައި ޝަރީއަތަކާ ނުލައި މީހުން މަރަމުންދާ މައްސަލައިގައި އެ ގައުމުގެ މައްސަލަ ބަލާ ކަމަށް އެ ކޯޓުން އަންގާފައިވަނިކޮށެވެ.
ފިލިޕީންސަކީ ހަނގުރާމައިގެ ޖަރީމާތަކަށް ދައުވާ ކުރެވޭ ދުނިޔޭގެ ދާއިމީ ހަމައެކަނި ޓްރައިބިއުނަލުން ވަކިވި ދެވަނަ ގައުމެވެ. މީގެ ކުރިން ބުރުންޑީ ވެސް ވަނީ އެ ކޯޓުން ވަކިވެފައެވެ.
"ސެކްރެޓަރީ ޖެނެރަލް ...ވަނީ 17 މާރިޗުން ފެށިގެން ފިލިޕީންސް ވަކިވިކަން ގުޅުންހުރި ހުރިހާ ދައުލަތަކަށް އަންގާފައި" އދ.ގެ ތަރުޖަމާނު އެރީ ކަނެކޯ އޭއެފްޕީ ނިއުސް އޭޖެންސީގައި ހުކުުރު ދުވަހު ވިދާޅުވިއެވެ.
އައިސީސީގައި ބައިވެރިވުމުގެ ގަރާރުގައި ވާ ގޮތުން އެ ކޯޓުގެ މެމްބަރުކަމުން ވަކިވެވޭނީ ވަކިވުމަށް އެދި ސެކްރެޓަރީ ޖެނެރަލަށް ލިޔުމުން ހުށަހަޅާތާ އެއް އަހަރު ފަހުންނެވެ.
މީގެ އިތުރުން މެމްބަރުކަމުން ވަކިވާއިރު އެ ގައުމަކާ ދެކޮޅަށް ހިނގާ މައްސަލައެއް އޮތް ނަމަވެސް އެ މައްސަލައެއް ކުރިޔަށް ގެންދާނެއެވެ.
އައިސީސީގެ މި އުސޫލާ އެކު، ފިލީޕީންސްގެ ރައީސް ރޮޑްރިގޯ ޑުޓާޓެ މަސްތުވާ ތަކެއްޗާ ދެކޮޅަށް ފައްޓާވާފައިވާ ހަނގުރާމައިގައި ހިންގާފައިވާ ކަމަށް ތުހުމަތުކުރެވޭ ޖަރީމާތާއްް 2018 ފެބުްރުއަރީ މަހުން ފެށިގެން ވަނީ ތަހުގީގުކުރަން ފަށާފައެވެ.
