ފުލުހުންގެ ތާރީހަށް އަހުލުވެރިކުރުވުމުގެ ޕްރޮގްރާމެއް ފަށައިފި
މާރޗް މަހުގެ 13 ވަނަ ދުވަހު މި ޕްރޮގްރާމް ފަށާފައި ވަނީ
ފުލުހުންގެ މުއައްސަސާގައި މަސައްކަތްކުރާ މުވައްޒަފުން ފުލުހުންގެ ތާރީޚަށް އަހުލުވެރިކުރުމަށް ކުރިއަށްގެންދާ ޕްރޮގްރާމުގެ ތެރެއިން
ފުލުހުންގެ މުއައްސަސާގައި މަސައްކަތް ކުރާ މުވައްޒަފުންނާއި މުވައްޒަފުންގެ އާއިލާތަކަށް ފުލުހުންގެ ތާރީޚާ ގުޅޭ މައުލޫމާތު ދިނުމުގެ ޕްރޮގްރާމެއް ފަށައިފިއެވެ.
މާރޗް މަހުގެ 13 ވަނަ ދުވަހު ފެށި މި ޕްރޮގްރާމަކީ މާރޗު 29 ވަނަ ދުވަހު ފާހަގަކުރުމަށް ހަމަޖެހިފައިވާ ފުލުހުންގެ 86 ވަނަ އަހަރީ ދުވަހާ ގުޅުވައިގެން ފުލުހުންގެ ތާރީޚާ ގުޅޭ މަޢުލޫމާތުދީ ފުލުހުންގެ މުއައްސަސާގައި މަސައްކަތްކުރާ ހުރިހާ މުވައްޒަފުންނަކީ ފުލުހުންގެ ތާރީޚަށް އަހުލުވެރިވެފައިވާ ބަޔަކަށް ހެދުމުގެ މަޤުޞަދުގައި ޕޮލިސް ހެރިޓޭޖް ސެންޓަރުން އިންތިޒާމްކޮށްގެން ކުރިއަށް ގެންދާ ޕްރޮގްރާމެކެވެ.
މި ޕްރޮގްރާމުގެ ދަށުން ފުލުހުންގެ މުއައްސަސާގެ އެކި ޑިޕާޓްމަންޓްތަކުގައި މަސައްކަތްކުރާ މުވައްޒަފުންނަށް މަޢުލޫމާތު ދިނުމަށް ހަމަޖެހިފައިވާ ކަމަށް ފުލުހުން ބުނެއެވެ. މި ޕްރޮގްރާމުގައި ފުލުހުންގެ ޚިދުމަތް ރާއްޖޭގައި ފެށިގެން އައި ގޮތާއި ފުލުހުންގެ ޚިދުމަތްތަކަށް އައިސްފައިވާ ބަދަލުތަކާއި އެކި ދުވަސްވަރު ފުލުހުން ބޭނުންކޮށްފައިވާ ތަކެއްޗާއި ގުޅޭ ގޮތުން މަޢުލޫމާތު ދިނުމަށް ހަމަޖެހިފައިވާ ކަމަށް ވެސް ފުލުހުން ބުނެއެވެ.
