ހައުސިންގ މިނިސްޓްރީގެ ޕާމަނަންޓް ސެކެޓްރީއަކަށް މޫސާ ޒަމީރު އައްޔަނުކޮށްފި
14 މާރިޗު 2019 | ބުރާސްފަތި 09:23މޫސާ ޒަމީރު ހަސަން އެ މަޤާމަށް އައްޔަނު ކުރެއްވެވީ ކޮމިޝަނުގެ ރައީސް ޑރ. ޢަލީ ޝަމީމް
ޕާމަނަންޓް ސެކެޓްރީ އައްޔަނުކުރުމަށް ބޭއްވި ރަސްމިއްޔާތުގައި މަގާމުގެ ލިޔުން ހަވާލުކުރަނީ
މިނިސްޓްރީ އޮފް ހައުސިން އެންޑް އަރބަން ޑިވެލޮޕްމަންޓްގެ ޕާރމަނަންޓް ސެކްރެޓަރީގެ މަގާމަށް މޫސާ ޒަމީރު ހަސަން މިއަދު ކޮމިޝަނުން ޢައްޔަން ކުރައްވައިފިއެވެ.
ބުރާަސްފަތި ދުވަހު ހައުސިން މިނިސްޓްރީގައި ބޭއްވި ރަސްމިއްޔާތެއްގައި މޫސާ ޒަމީރު ހަސަން އެ މަޤާމަށް އައްޔަނު ކުރެއްވެވީ ކޮމިޝަނުގެ ރައީސް ޑރ. ޢަލީ ޝަމީމެވެ. މި ރަސްމިއްޔާތުގައި ހައުސިން މިނިސްޓަރ އާމިނަތު އާތިފާ އާއި، އެ މިނިސްޓްރީގެ އިސް ބައެއް ވެރިންނާއި، އަދި ސިވިލް ސަރވިސް ކޮމިޝަނުގެ ބައެއް މެންބަރުން ބައިވެރިވެ ވަޑައިގެންނެވިއެވެ.
މި ރަސްމިއްޔާތުގައި ވާހަކަފުޅު ދައްކަވަމުން ސިވިލް ސާވިސް ކޮމިޝަނުގެ ރައީސް ވަނީ ދިވެހި ސިވިލް ސަރވިސްގެ ގަވާއިދާ އެއްގޮތަށް އަދި މިނިސްޓަރގެ ލަފަޔާ އެކު މިނިސްޓްރީގެ މަސައްކަތްތައް ހިންގަވާ ދެއްވުމަށް މޫސާ ޒަމީރު ހަސަން އަރިހުން އެދިވަޑައިގެންފައެވެ. އަދި އޮފީސް ހިންގެވުމުގައި ސިވިލް ސާރވިސްގެ މުވައްޒަފުންނާއި ގުޅިގެން އެކުއެކީގައި މިނިސްޓްރީ އަށް ސަރުކާރުން ކަނޑައަޅުއްވަވާފައިވާ އިހްތިސޯސް އާއި ސިޔާސަތު ތަންފީޒުކޮށް ދެއްވުމުގައި ތެދުވެރިކަމާއި ނަޒާހަތްތެރިކަމާއި އެކު މަސައްކަތް ކޮށްދެއްވުމަށް ވެސް ކޮމިޝަނުގެ ރައީސް އެދިވަޑައިގެންނެވިއެވެ.
މޫސާ ޒަމީރު ޙަސަންއަކީ 19 އަހަރު ސަރުކާރަށް ހިދުމަތް ކުރައްވާފައިވާ ބޭފުޅެކެވެ. އެގޮތުން 1990 ވަނަ އަހަރު މޯލްޑިވްސް ޕަބްލިކް ސަރވިސް އާއި ގުޅިވަޑައިގެންނެވި ޒަމީރު ވަނީ މިނިސްޓްރީ އޮފް ޓޫރިޒަމްގެ ހެޑް އޮފް ދަ ޕްލޭނިންގް ޑިވިޝަންގެ ޑެޕިއުޓީ ޑިރެކްޓަރ ޖެނެރަލްގެ މަގާމާއި، ރީޖަނަލް އެއަރޕޯރޓްތަކުގެ ޑެޕިއުޓީ ޑިރެކްޓަރ ޖެނެރަލް ކަމުގެ މަގާމް ވެސް އަދާކުރައްވާފައެވެ. އަދި ދިވެހިރާއްޖޭގެ ހަތަރު ވަނަ މާސްޓަރ ޕްލޭން އެކުލަވާލުމުގައި އޭނާ ވަނީ ހާއްސަ ރޯލެއް އަދާކުރައްވާފައެވެ.
މޫސާ ޒަމީރު ޙަސަން ވަނީ ބެޗްލަރ އޮފް އޮނާރސް އިން އެންވާރަމެންޓަލް ސައިންސް ގެ ރޮގުން ޑިގްރީ އެއް އިނގިރޭސި ވިލާތުގެ ޔުނިވަރސިޓީ އޮފް ދަ ވެސްޓް އިންގްލޭންޑް އިން ފުރިހަމަކުރައްވާފައެވެ. އަދި މެލޭޝިއާގެ އިންޓަރނޭޝަނަލް އިސްލާމިކް ޔުނިވާރސިޓީ އިން ވަނީ އަރބަން އެންޑް ރީޖަނަލް ޕްލޭނިންގްގެ ރޮގުން މާސްޓާރސް ޑިގްރީ ފުރިހަމަކުރައްވާފައެވެ.
