އީސީގެ މެންބަރު ކަމަށް ދެ ވަނަ ދައުރަކަށް ހަބީބު އައްޔަން ކުރައްވައިފި
ޙަބީބު މެންބަރުކަމުގެ ދައުރު ހަމަވެފައިވާނީ ބުދަ ދުވަހަށް
އީސީގެ މެންބަރުކަމަށް ޢައްޔަން ކުރެއްވިކަމުގެ ލިޔުން، ރައީސުލްޖުމްހޫރިއްޔާ އިސްމާޢީލް ޙަބީބާ ހަވާލުކުރަށްވަނީ
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، އިލެކްޝަންސް ކޮމިޝަންގެ މެންބަރުކަމަށް އިސްމާޢީލް ޙަބީބު ޢަބްދުއްރަޙީމް ބުދަ ދުވަހު ޢައްޔަން ކުރައްވައިފިއެވެ.
އިލެކްޝަންސް ކޮމިޝަންގެ މެންބަރުކަމަށް ޢައްޔަން ކުރެއްވިކަމުގެ ލިޔުން، އިސްމާޢީލް ޙަބީބު ޢަބްދުއްރަޙީމާ ރައީސުލްޖުމްހޫރިއްޔާ ހަވާލުކުރެއްވީ، އެކަމަށްޓަކައި ބުދަ ދުވަހު މެންދުރުފަހު ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތެއްގައެވެ.
އެ ރަސްމިއްޔާތުގައި ލިޔުން ހަވާލު ކުރެއްވުމުގެ ކުރިން، ރައީސުލްޖުމްހޫރިއްޔާ އާއި ސުޕްރީމް ކޯޓުގެ ފަނޑިޔާރު އޮނަރަބަލް އަލްއުސްތާޛު ޢަބްދުލްޣަނީ މުޙައްމަދުގެ ކުރިފުޅުމަތީގައި، އިސްމާޢީލް ޙަބީބު ޢަބްދުއްރަޙީމް އިލެކްޝަންސް ކޮމިޝަނުގެ މެންބަރުކަމުގެ ހުވައި ކުރައްވައި، ހުވައިގެ އިޤުރާރުގައި ސޮއި ކުރެއްވިއެވެ.
ޙަބީބު އީސީގެ މެމްބަރު ކަމަށް ކުރިމަތިލެއްވި 16 ބޭފުޅުންގެ ތެރެއިން، އެންމެ މަތިން މާކްސް ލިބިވަޑައިގެންނެވި ހަބީބު އެ ކޮމިޝަންގެ މެމްބަރުކަމަށް އައްޔަން ކުރުމަށް މަޖިލީހުން ފާސްކުރީ މިދިޔަ ހަފްތާގެ ބުދަ ދުވަހުއެވެ. އޭނާ އެ މަގާމަށް އައްޔަން ކުރުމަށް މަޖިލީހުން ފާސްކުރީ އެ ދުވަހު ވޯޓުގައި ބައިވެރިވެވަޑައިގެންނެވި 58 މެމްބަރުންގެ އިއްތިފާގުންނެވެ.
