އެމްޑީޕީގެ ތިމަވެއްޓާ ބެހޭ ސިޔާސަތުގެ ދަށުން ވަރަށް ޚާއްސަ ޕްރޮގްރާމެއް މިރޭ!
13 މާރިޗު 2019 | ބުދަ 08:24އެޖެންޑާ 19 ގެ ސިޔާސަތުތައް ހާސިލުކުރުމަށް ޓެކްނޮލޮޖީ ބޭނުންކުރާނެ ގޮތްތައް ކިޔާދޭނެ
އެމްޑީޕީން ބޭއްވި ނޫސްވެރިންގެ ބައްދަލުވުން
އެމްޑީޕީގެ އެޖެންޑާ 19 ގެ ސިޔާސަތުތަކުގެ ދަށުން ތިމާވެށި ހިމާޔަތްކޮށް ރައްކާތެރިކުރުމާ ގުޅޭ ޚާއްސަ ޕްރޮގްރާމެއް ބުދަ ދުވަހުގެ ރޭ ބޭއްވުމަށް ވަނީ ހަމަޖެހިފައެވެ.
ބުދަ ދުވަހު ނޫސްވެރިންނާ ބައްދަލުކުރައްވައި އެ ޕާޓީގެ ޑެޕިއުޓީ ސެކެޓްރީ ޖެނެރަލް އަފްޝަން ލަތީފް ވިދާޅުވީ، މި ޕްރޮގްރާމަކީ އެޖެންޑާ 19 ގެ ސިޔާސަތުތައް ހާސިލުކުރުމަށް ޓެކްނޮލޮޖީ ބޭނުންކުރެވޭނެ ގޮތްތަކާ ގުޅޭ ގޮތުން މަޝްވަރާ ކުރުމަށް ބޭއްވޭ ޕްރޮގްރާމެއް ކަމަށާއި، މި ޕްރޮގްރާމްގެ ފުރަތަމަ ބައްދަލުވުމުގައި އަލިއަޅުވާލާނީ ތިމާވެށި ހިމާޔަތްކުރުމާ ގުޅޭ ދާއިރާއަށް ކަމަށެވެ.
"މިއީ އަޅުގަނޑުމެން ފަށާ އެޖެންޑާ 19ގެ ސިޔާސަތުތައް ހާސިލު ކުރުމަށް ޓެކްނޮލޮޖީ ބޭނުންކުރާނެ ގޮތްތަކާ މެދު ފަށާ ސިލްސިލާ ޕްރޮގްރާމްތަކެއް، މި ޕްރޮގްރާމްގެ އެންމެ ފުރަތަމަ ސެޝަން މިރޭ އޮންނާނެ، މިރޭގެ ސެޝަންގަ ބޮޑަށް އަލިއަޅުވާލާނީ އާރޓިފިޝަލް ފްލޯޓިންގް އިންޑަސްޓްރިއަލް އައިލެންޑްތައް ނުވަތަ ފްލޯޓިންގ އެއާޕޯރޓުތަކާ މިފަދަ ތަންތަން ތަރައްޤީ ކުރުމާމެދު ހުށައެޅޭ ހުށައެޅުންތަކަކަށް. މިކަމާ ގުޅޭގޮތުން ޕްރެޒެންޓޭޝަނެއް 'ޑަޗް ޑޮކްލޭންޑްސް' ކުންފުނިން ހުށައަޅާދޭނެ. މީ ތިމާވެއްޓާ ރައްޓެހި ގޮތްތަކަކަށް އިންޑަސްޓްރިއަލް އައިލެންޑްތަކާ އަދި އެއާޕޯރޓުތަކާ ތަރައްޤީ ކުރެވޭނެ އެކި ކަހަލަ ގޮތްތަކާ މެދު މައުލޫމާތު ދިނުމަށް ބޭއްވޭ އިވެންޓެއް،" އަފްޝަން ވިދާޅުވިއެވެ.
މި ޕްރްގްރާމް ބުދަ ދުވަހުގެ ރޭ 8:30 ގައި އާރޓިފިޝަލް ބީޗްގައި ފެށޭއިރު، ތިމާވެށި ހިމާޔަތްކުރުމަށް މަސައްކަތް ކުރައްވާ އެކި ޖަމިއްޔާތަކާއި، ވީހާ ވެސް ގިނަ ފަރާތްތައް މި ޕްރޮގްރާމްގައި ބައިވެރިވުމަށް އެމްޑީޕީން އެދެއެވެ.
މި ޕްރޮގްރާމްގައި މައުލޫމާތު ދޭ ކުންފުނި ކަމަށްވާ ޑަޗް ޑޮކްލޭންޑްސްއަކީ ތިމާވެށި ހިމާޔަތްކޮށް ތިމާވެއްޓާ ރައްޓެހި ގޮތްތަކަށް ތަރައްޤީގެ މަޝްރޫއުތައް ކުރިއަށް ގެންދިއުމަށް އެހީވެދޭ ކުންފުންޏެކެވެ.
އޭގެ އިތުރުން ވެސް އެމްޑީޕީގެ ގިނަ ކެމްޕެއިން ހަރަކާތްތަކެއް ކުރިއަށް ރޭވިފައިވާއިރު، ބުދަ ދުވަހުގެރޭ ކޮލަމްބޯގައި ދިރިއުޅޭ ދިވެހި ރައްޔިިތުންނާ ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ބައްދަލު ކުރުމަށް ވަނީ ހަމަޖެހިފައެވެ. އަދި މި ބައްދަލުވުމުގައި އެޑިއުކޭޝަން މިނިސްޓަރ އާއިޝަތު އަލީ އާއި، ފިނޭންސް މިނިސްޓަރ އިބްރާހިމް އަމީރުގެ އިތުރުން އާސަންދައިގެ މެނޭޖިންގ ޑިރެކްޓަރ މަރިޔަމް ޝަފީޤު ވެސް ބައިވެރިވެ ވަޑައިގަންނަވާނެއެވެ.
