ކުރީގެ ރައީސް މުހައްމަދު ނަޝީދު މިނިވަން ކުރުމަށް އެމްޑީޕީން ކުރި މަސައްކަތްތަކަށް ހިތްވަރު ލިބުނީ އެމްޑީޕީގެ ކެންޑިޑޭޓެއްގައި ގޮތުގައި ރައްޔިތުންގެ މަޖިލީހުގެ އިންތިޚާބުގައި ތޮއްޑޫ ދާއިރާއަށް ވާދަކުރައްވާ ހަސަން ޝިޔާން (ގިޓާ)ގެ ސަބަބުން ކަމަށް ރައީސް އޮފީހުގެ މިނިސްޓަރު މުހައްމަދު ޝިފާޒު ވިދާޅުވެއްޖެއެވެ.

އަންގާރަ ދުވަހު ތޮއްޑޫގައި ބޭއްވި އެމްޑީޕީގެ ކެންޕޭން ޖަލްސާގައި މިނިސްޓަރު ޝިފާޒު ވިދާޅުވީ މިދިޔަ ހަތަރު އަހަރުގެ ތެރޭގައި އެއްއަޒުމެއްގައި އެއްރޫހެއްގައި އެއްއަޑަކުން ކުރަމުން ދިޔަ މަސައްކަތަކީ ރައީސް ނަޝީދު މިނިވަން ކުރުމުގެ މަސައްކަތް ކަމަށާއި، އެކަން ކާމިޔާބު ކުރެވުނީ ގިނަ ބަޔަކު މިމަސައްކަތުގައި ދެމިތިބުމުން ކަމަށެވެ. 

މިނިސްޓަރު ޝިފާޒު ވިދާޅުވީ އެތައް ގޮންޖެހުންތަކާއެކު ވެސް މިމަސައްކަތް ކުރުމަށް ލިބުނު އެންމެ ބޮޑު ހިތްވަރަކީ ޝިޔާން ކަމަށެވެ. 

މިނިސްޓަރު ޝިފާޒު ވިދާޅުވީ އިންސާފު ގާއިމްކުރުމަށް މާލޭގައި ތިން އިރު މުޒާހަރާކުރި ކަމަށާއި، 24 ގަޑިއިރު ތެރޭގައި ތިން ހަތަރު ފަހަރު ސުލްހަވެރި ސިޔާސީ ހަރަކާތް ހިންގާ ކަމަށެވެ. އެގޮތުން ޝިޔާންއަކީ ކޮންމެތަނެއްގަ ހުއްޓަސް އެމްޑީޕީގެ ހަރަކާތުގައި ބައިވެރިވާ މީހެއް ކަމަށާއި، އެހެން މީހުންނަށް ހިތްވަރުދިނުމުގައި މިސާލެއް ކަމަށެވެ.

"މީހުން އެއްކުރަންޖެހޭ، ހިނގާލުންތައް ބާއްވަންޖެހޭ، މުޒާހަރާތައް ރާވަންޖެހޭ. ކުއްލިއަކަށް މީހުން އެއްކުރަންޖެހުނަސް އެންމެ ފުރަތަމަ އަޅުގަނޑު ހިތަށް އަންނަ ނަމަކީ ހަސަން ޝިޔާން. ހަމައެއާއެކު ޒަރީރު. ޒަރީރު އުޅަނދު ހަމަޖައްސާނެ. ޝިޔާން މީހުން އެއްކޮށްދޭނެ. މިދެއަތޮޅުން. ޚާއްސަކޮށް މިދެދާއިރާއިން. ފަސޭހަ ކަމާއެކު މާލެއަށް ބުނި އަދަދެއް ބުނި ވަގުތަކު. މިއީ ހަގީގަތަކުގައި ތިބޭފުޅުން ކުރެއްވި ބުރަ މަސައްކަތް" މިނިސްޓަރު ޝިފާޒު ވިދާޅުވިއެވެ.

މިނިސްޓަރު ޝިފާޒު ވިދާޅުވީ ދެވަނަ ފަހަރަށް ވެރިކަމަށް އައީ 7 އަހަރު މަގުމަތީގަ ތިބުމަށް ފަހު ކަމަށާއި، އަބަދުވެސް މަސައްކަތް ކުރަމުންއައީ ވެރިކަމުގެ ނިޒާމެއް ތޯހިރު ކުރުމުގެ މަސައްކަތް ކަމަށެވެ.

މިނިސްޓަރު ޝިފާޒު ވިދާޅުވީ އެމްޑީޕީގެ ކެންޑިޑޭޓުންނަކީ އެމްޑީޕީއަށާއި، ޕާޓީގެ ސިޔާސަތަށް ބޯލަބާ ބައެއް ކަމަށެވެ. އަދި މަސައްކަތް ކުރާނީ ޕާޓީގެ ގަވާއިދާ އެއްގޮތަށް ކަމަށެވެ. ނަމަވެސް އެހެން ޕާޓީތަކުގެ ކެންޑިޑޭޓުންނަށް ޕާޓީގެ އިތުރުން ވަކި މީހުންނަށް ބޯލަބައިގެން މަސައްކަތް ކުރާ ކަމަށެވެ.

މިނިސްޓަރު ޝިފާޒު ވިދާޅުވީ އުސޫލާ ހަމަހަމަކަމާއެކު މަސައްކަތްތައް ކުރިއަށް ގެންދިއުމަށާ މަޖިލިސް އިންތިޚާބުގެ މެޖޯރިޓީ ހޯދަންޖެހޭ ކަމަށާއި، އެޖެންޑާ19 ތަންފީޒު ކުރެވިގެންދާނެކަމާ މެދު ޝައްކު ނުކުރާ ކަމަށެވެ.