ޅ. ހިންނަވަރު ހޮސްޕިޓަލް އިމާރާތް ޑިޒައިންކޮށް ބީއޯކިޔު ހަދާނެ ފަރާތެއް ހޯދުމަށް އިއުލާން ކޮށްފިއެވެ.
މިނިސްޓްރީ އޮފް ހެލްތުން އަންގާރަ ދުވަހު ކޮށްފައިވާ އިއުލާންގައި ވަނީ މި ކަމަށް ޝައުގުވެރިވާ ފަރާތްތައް މި ހިނގާ މާރޗް މަހުގެ 21 ވާ ބުރާސްފަތި ދުވަހުގެ ހެނދުނު 10:00 އަށް އެ މިނިސްޓްރީ އަށް ވަޑައިގެން މައުލޫމާތު ސާފުކުރެއްވުމަށް ފަހު 28 މާރޗް 2019 ވާ ބުރާސްފަތި ދުވަހުގެ ހެނދުނު 11:00 އަށް އެ މިނިސްޓްރީ އަށް އަންދާސީ ހިސާބު ހުށަހެޅުމަށް އެދޭ ކަމަށެވެ.
މައުލޫމާތު ސާފުކުރަން ނުދާ ފަރާތްތަކާއި ގަޑިއަށް އަންދާސީ ހިސާބު ހުށަނާޅާ ފަރާތްތަކުގެ އަންދާސީ ހިސާބު ބަލައިނުގަނެވޭނެ ކަމަށް މިނިސްޓްރީން މއުލޫމާތު ދެއެވެ.
މި ސަރުކާރުން ހިންނަވަރުގައި ހޮސްޕިޓަލެއް އެޅުމަށް ނިންމާފައިވާ އިރު ކުރީގެ ރައީސް އަބްދުﷲ ޔާމީންގެ ސަރުކާރުގައި ހިންނަވަރުގެ ސިއްހީ މަރުކަޒުގެ އާ އިމާރާތެއް އެޅުމަށް މަސައްކަތް ފަށާފައި ވެއެވެ. ހިންނަވަރަށް އުފަން ހެލްތު މިނިސްޓަރު އަބްދުﷲ ނާޒިމް ވަނީ އެ އިމާރާތުގެ ބިންގާ ވެސް އަޅުއްވައިދެއްވާފައެވެ. އަދި ދެ ކުންފުންޏަކާ މަސައްކަތް ހަވާލުކޮށްގެން އެތައް އަހަރެއްވީ އިރު ވެސް އެ އިމާރާތުގެ ތަނބުތަކުގެ ބައެއް ޖެހުން ފިޔަވައި އިތުރު މަސައްކަތެއް ކޮށްފައެއް ނުވެއެވެ.
