އަހަރުތަކަކަށް ފަހު ހިންނަވަރުގައި އެމްޑީޕީގެ މައްޗަށް ޕީޕީއެމް ކުރި ހޯދައިފި

ޅ. ހިންނަވަރުގައި އަހަރުތަކަކަށް ފަހު ފުރަތަމަ ފަހަރަށް އިންތިޚާބެއްގައި އެމްޑީޕީގެ މައްޗަށް ޕީޕީއެމުން ކުރި ހޯދައިފިއެވެ.

ހިންނަވަރު ފާހަގަކުރެވިފައި ވަނީ އެމްޑީޕީގެ ވަރުގަދަ މަރުކަޒެއްގެ ގޮތުގައެވެ. ނަމަވެސް ހޮނިހިރު ދުވަހު ބޭއްވި ލޯކަލް ކައުންސިލް އިންތިޚާބުގައި އެކަން ވަނީ ބަދަލުވެގެން ގޮސްފައެވެ. ރަށު ކައުންސިލްގެ ފަސް ގޮނޑީގެ ތެރެއިން ހަތަރު ގޮނޑި ކާމިޔާބުކުރާނެ ކަމަށް ވަގުތީ ނަތީޖާތަކުން ދައްކަނީ ޕީޕީއެމްއެވެ.

މިހާތަނަށް ސާފުވި ވޯޓަށް ބަލާއިރު ހިންނަވަރުގެ އެމްޑީޕީ ކެނޑިޑޭޓް ގޮސްފައި ވަނީ ފަސް ވަނައަށެވެ. ވަގުތީ ނަތީޖާ ދައްކާ ގޮތުން މިހާތަނަށް ސާފުވި ވޯޓުން ފިރާޒް އިސްމާއީލް އަށް ލިބިފައި ވަނީ 1254 ވޯޓެވެ. މި ދާއިރާ އިން އެންމެ ގިނަ ވޯޓު މިހާތަނަށް ލިބިފައި ވަނީ ޕީޕީއެމްގެ ކެންޑިޑޭޓް އަބްދުﷲ އިބްރާހީމަށެވެ. އޭނާ އަށް 1388 ވޯޓު ލިބުނު އިރު އެ ޕާޓީގެ ސޯލިހް އިބްރާހީމް އަށް 1376 ވޯޓު، ރިޝްވާން އާދަމް އަށް 1363 ވޯޓު އަދި އާދަމް އަނީސް އަށް 1361 ވޯޓު ލިބިފައިވާ ކަމަށް ވަގުތީ ނަތީޖާތަކުން ދައްކައެވެ.

ރަށު ކައުންސިލް ގެއްލުނު ނަމަވެސް އަތޮޅު ކައުންސިލްގެ ހިންނަވަރު ދާއިރާގައ، މިހާތަނަށް ލިބިފައިވާ ނަތީޖާތަކުން ކުރި ލިބިފައި ވަނީ އެމްޑީޕީ އަށެވެ. އެ ގޮތުން މާލެ އާއި ހިންނަވަރުގެ ފޮށިން އެމްޑީޕީގެ ކެންޑިޑޭޓް ޝިހާން ހަސަން އަށް 612 ވޯޓު ލިބިފައިވާ އިރު ޕީޕީއެމްގެ ކެންޑިޑޭޓް އިބްރާހީމް އާތިފް އަށް މި ދެ ފޮށިން ލިބިފައި ވަނީ 509 ވޯޓެވެ.

ރައްޔިތުންގެ މަޖިލީހުގެ އިންތިޚާބުގައި މިހާތަނަށް އިބޫ ވަނީ ހަ ފަހަރެއްގެ މަތިން ގޮނޑި ދިފާއުކުރައްވާފައެވެ. އަދި ކައުންސިލް އިންތިހާބުގައި ފާއިތުވި ދެ ދައުރު ވެސް ކުރި ހޯދާފައި ވަނީ އެމްޑީޕީންނެވެ.

އައްޑޫ ސިޓީ އާއި ފުވައްމުލަކު އަދި މާލެ ފަދަ އާބާދީ ބޮޑު ސަރަހައްދުތަކުން އެމްޑީޕީން ކުރި ހޯދައި، ކުރިން ޕީޕީއެމްގެ ދާއިރާތައް ވެސް އެމްޑީޕީން ކާމިޔާބުކޮށްފައިވާ އިރު އަބަދު ވެސް އެމްޑީޕީގެ ވަރުގަދަ ދާއިރާއެއްގެ ގޮތުގައި އޮތް ހިންނަވަރު އެމްޑީޕީ ބަލިވުމުން ގިނަ ބަޔަކު ދަނީ އެކަމާ މެދު ސުވާލު އުފައްދައި ފާޑުކިޔަމުންނެވެ. އެގޮތުން ޕީޕީއެމަށް ތާއީދުކުރާ ފަރާތްތަކުން ބުނެފައި ވަނީ މިއީ އެންމެ ފަހުގެ ރައްޔިތުންގެ މަޖިލީހުގެ އިންތިހާބުގައި އިބޫއާ ވާދަކުރައްވައި ހަނި ގޮތަކަށް ނާކާމިޔާބީއާ ކުރިމަތިލައްވަން ޖެހިވަޑައިގެންނެވި އަދި މިހާރު ހެލްތު މިނިސްޓަރަކަށް ހުންނެވި އަބްދުﷲ ނާޒިމް އިބްރާހީމްގެ ބުރަ މަސައްކަތުން ހޯއްދެވި ކާމިޔާބީއެއް ކަމަށެވެ. އެގޮތުން ނާޒިމް ގެންދަވަނީ ރަށުގެ ކުރިއެރުމަށް މަސައްކަތްތައް ކުރައްވަމުން ކަމަށާއި ހާއްސަކޮށް އިންތިޚާބު ކައިރިވެފައި ވަނިކޮށް ބޭންކް އޮފް މޯލްޑިވްސް (ބީއެމްއެލް)ގެ ސެލްފް ސާވިސް ބޭންކިންގެ ނިޒާމެއް ހުޅުވިގެން ދިއުމަކީ ވެސް އެ ދާއިރާ ބަދަލުވުމަށް މެދުވެރިވި ސަބަބެއް ކަމަށް އެ ފަރާތްތަކުން ދަނީ ބުނަމުންނެވެ. ކޮންމެއަކަސް މި ނަތީޖާއަކީ ކުރިއަށް އޮތް އިންތިހާބުތަކުގައި އެމްޑީޕީން ވެސް އަދި ހަ ވަނަ ދައުރެއް ފުރުއްވަމުން ގެންދަވާ އިބޫ އަށް ވެސް ބޮޑު ގޮންޖެހުމަކަށް ވާނެ ކަމެކެވެ.