ޖަލަށް ލައިގެން މި ސަރުކާރާއި ޑީލްއެެއް ނުހަދާނެ: އަލީ ޒާހިރު
ކިތަންމެ ބިރެއް ދެއްކިޔަސް މަޚްލޫފްގެ އަޒުމަކަށް ކުޑަވެސް ބަދަލެއް އައިސްފައި ނުވާކަން ފެނިއްޖެ
އެމްޔޫއޯއިން ހުކުރުދުވަހުގެރޭ އެމްޑީޕީ ހަރުގޭގައި ބޭއްވި ބޮޑު ތަރާވީހުގައި އަލީ ޒަހިރު ވާހަކަފުޅު ދައްކަވަނީ
ޖަލަށް ލައިގެން މި ސަރުކާރާއި އެއްވެސް ބޭފުޅަކު ޑީލްއެެއް ނުހަދާނެ ކަމަށް އަދާލަތު ޕަޓީގެ ނައިބު ރައީސް އަލީ ޒާހިރު ވިދާޅުވެއްޖެއެެވެ.
ގަލޮޅު ދެކުނު ދާއިރަގެ މެމްބަރު އަހުމަދު މަޚްލޫފް މިނިވަން ވުމުގެ އުފަލުގައި އެމްޔޫއޯއިން ހުކުރުދުވަހުގެރޭ އެމްޑީޕީ ހަރުގޭގައި ބޭއްވި ޖަލްސާގައި އަލީ ޒާހިރު ވިދަޅުވީ، ޖަލަށް ލައިގެން އޮބަހައްޓައިގެން ޚިޔާލު ފާޅުކުރުން ނުހުއްޓުވޭނެކަން މިހާރުވެސް މިވަގުތުވެސް ފެނިގެން އެބަދާކަމަށެވެ.
މަޚްލޫފަށް މަރުހަބާ ދަންނަވަމުން އަލީ ޒާހިރު ވިދާޅުވީ، މަޚްލޫފަށް އެނބުރި އައިސް ގުޅިވަޑައިގަތީތީ އުފާކުރާކަމަށެވެ.
އަދަބު ދީ ބިރުދައްކައިގެން އެބަޔަކު ގަބޫލުކުރާކަންކަން ނުހުއްޓުވޭނެ ރައީސް ޔާމީނަށް މަޚްލޫފަ ދައްކަވައިދީފިކަމަށާއި، ކިތަންމެ ބިރެއް ދެއްކިޔަސް މަޚްލޫފްގެ އަޒުމަކަށް ކުޑަވެސް ބަދަލެއް އައިސްފައި ނުވާކަން ފެނިއްޖެ ކަމަށް އަލީ ޒާހިރު ވިދާޅުވި އެވެ.
އަލީ ޒާހިރު ވިދަޅުވީ، މަޚްލޫފް ޖަލަށް ލުމާއެކު އެމްޔޫއޯއަށް ސްޕޯކްސް ޕާސަންއެއް އަލުން އައްޔަން ކުރުމަށް ވިސްނުން ގެންގުޅުކަމަށާއި، އެކަމުވެސް އެކަން ބަދަލުނުކުރީ މަޚްލޫފް އެނބުރި އައިސް އެމްޔޫއޯގެ މަސައްކަތާއި، ގުޅޭނެކަން ޔަގީންވާތީކަމަށެވެ.
"އެވަރުގެ ހިތްވަރު މަޚްލޫފްގެ އެބަހުރި، އެކަން އެނގެނީ ޖަލުގައި އޮންނަވައިވެސް ނެރުއްވަމުން ގެންދަވާ ބަޔާން ތަކުން، ރައީސް ޔާމީނު ދައްކާ ބިރަށް އެންމެ އިންޗިއެއްވެސް ފަހަތަށް ނުޖެހޭނެ" އަލީ ޒާހިރު ވިދާޅުވިއެވެ.
އަލީ ޒާހިރު ވިދާޅުވީ، އެބޭފުޅުން ފެށްޓެވި މަސައްކަތަށް އަހަރު ދެ އަހަރު ވީނަމަވެސް ހީނަރުނުވެ، ދަނީ އިތުރަށް ވަރުގަދަވަމުން ކަމަށާއި ސަރުކާރުދަނީ ބަލިކަށިވަމުން ކަމަށެވެ.
ބުދަ ދުވަހު ފުލުހުން ހައްޔަރުކުރި އެސްޓީއޯގެ ކުރީގެ އެމްޑީ އާދަމް އާޒިމް ހައްޔަރުކޮށް ޖަލަށްލަފައިވާއިރު، އާދަމް އާޒިމްގެ ހިތްވަރަށްވެސް ކުޑަވެސް ބަދަލެއްނައިސް ހުންނެވި ކަން އަލީ ޒާހިރު ފާހަގަކުރެއްވިއެެވެ.
ކުރީގެ ޑިފެންސް މިނިސްޓަރު ނާޒިމާއި އާޒިމް ޖަލަށް ލިޔަސް އެ ބޭފުޅުން ވެސް ސަރުކާރާއެކު ޑީލެއް ނުހަދާނެ ކަމަށް އަލީ ޒާހިރު ވިދާޅުވި އެވެ.
"އެބޭފުޅުން ތިއްބެވީ ޑީލް ހައްދަވާކަށް ނޫން އެއަށްވުރެ އެބޭފުޅުން މާ އަޒުމު ވަރުގަދަ، ޖަލަށް ލައިގެން އޮބަހައްޓައިގެން ޚިޔާލު ފާޅު ކުރުމެއް ދެން ނުހުއްޓުވޭނެ"އޭނާ ވިދާޅުވިއެވެ.
