ލިވަޕޫލް ދެކެ ބިރެއް ނުގަނޭ: ރިބެރީ
7 މާރިޗު 2019 | ބުރާސްފަތި 13:12ބަޔާން މިއުނިކް އޮތީ ރަނގަޅު ހާލަތެއްގައި
ފްރޭންކް ރިބެރީ
ލިވަޕޫލް ދެކެ ބަޔާން މިއުނިކް ބިރު ނުގަންނާނެ ކަމަށް ބަޔާން މިއުނިކްގެ ކުޅުންތެރިޔާ ފްރޭންކް ރިބެރީ ބުނެފިއެވެ.
ޗެމްޕިއަންސް ލީގުގެ ދެވަނަ ލެގުގައި ބަޔާން މިއުނިކް އާއި ލިވަޕޫލް ކުޅޭ މެޗަށް އެއްވެސް ބިރުވެރި ކަމެއް ނެތް ކަމަށާއި، ލިވަ ޕޫލް ދެކެ ބިރު ނުގަންނަ ކަމަށް ފްރޭންކް ރިބެރީ ބުނެފައި ވެއެވެ.
ބަޔާން މިއުނިކްގެ ކުޅުންތެރިޔާ ރިބެރީ ނޫސްވެރިންނާ ވާހަކަ ދައްކަމުން ބުނެފައި ވަނީ ބަޔާން މިއުނިކް އޮތީ ރަނގަޅު ހާލަތެއްގައި ކަމަށާއި، ލިވަޕޫލަކީ ވަރުގަދަ ޓީމެއް ނަމަވެސް އަމިއްލަ ދަނޑުގައި ކުޅެން ޖެހޭތީ އިތުރު ކަނބޮޑުވުންތަކެއް ނެތް ކަމަށެވެ.
ރިބެރީ ބުނެފައި ވަނީ، ލިވަޕޫލް މެޗަކީ މުހިންމު މެޗެއް ކަމަށާއި އެމެޗަށް ތައްޔާރު ކަމަށެވެ. އޭނާ އިތުރަށް ބުނީ ޗެމްޕިއަންސް ލީގުގައި ކުޅުމަކީ ހާއްސަ އުފަލެއް ލިބޭ ކަމެއް ކަމަށެވެ.
ރިބެރީ ބުނީ ޓީމެއްގެ ގޮތުގައި ކޯޗުގެ އިރުޝާދާ އެއްގޮތަށް ރަނގަޅަށް ކުޅެފި ނަމަ ކުއާޓާ ފައިނަލަށް ދެވިދާނެ ކަމަށާއި، އެއީ ޗެމްޕިއަންސް ލީގް ކާމިޔާބުކުރުމަށް ލިބޭ ރަނގަޅު ފުރުސަތެއް ކަމަށެވެ.
މި ދެ ޓީމު ފުރަތަމަ ލެގުގައި ލިވަޕޫލްގެ ދަނޑުގައި ކުޅުނު މެޗް ނިމުނީ ލަނޑެއް ނުޖެހިއެވެ. އެހެންކަމުން ދެ ޓީމަށް ވެސް ކުއާޓާ އަށް ދިއުމުގެ ފުރުސަތު އޮތީ އެއްވަރަށެވެ.
މި އަހަރު ފެށިގެން ކުޅުނު ހުރިހާ މުބާރާތަކުން ޖުމްލަ 11 މެޗު ކުޅުން އިރު ލިވަޕޫލަށް ކާމިޔާބު ކުރެވިފައި ވަނީ ހަތަރު މެޗެވެ. އެހެން ނަމަވެސް ބަޔާން މިއުނިކް ކުޅުނު މެޗުތަކުން ދެ މެޗު ފިޔަވައި ހުރިހާ މެޗެއް ވަނީ ކާމިޔާބުކޮށްފައެވެ.
