ޕްރެސިޑެންޓް ކަޕް ކެންސަލްކޮށް، އަންނަ އަހަރު މާލޭ ލީގު ނުބާއްވަން ނިންމައިފި

މި އަހަރުގެ ޕްރެޒިޑެންޓްސް ކަޕް ނުބާއްވައި އަދި އަންނަ އަހަރު މާލޭ ލީގު ނުބާއްވަން ނިންމައިފިއެވެ.

އެފްއޭއެމްގެ ސީޒަން ކަލަންޑަރަށް ކޮންމެ ސީޒަނަކަށް ވެސް ބަދަލުތަކެއް އަންނަމުންދާ އިރު، މާލޭ ލީގާ އެކު އަލުން ދިވެހި ޕްރިމިއާ ލީގު ކުޅެން ފެށީ މިދިޔަ ސީޒަންގައެވެ.

ދިވެހި ޕްރިމިއާ ލީގު ފެށިގެން ހަ ހަފްތާގެ ކުޅުން ނިމިފައިވާ އިރު، ސާފް ޗެމްޕިއަންޝިޕަށް ލީގު ދެ މަހެއްހާ ދުވަހަށް މެދުކަނޑާލުމާ ވެސް އެކުގައި ލީގުގެ ފޯރި ކުޑަވެ، އަތޮޅު ތެރޭގެ ބައެއް ޓީމުތަކުގެ އިތުރުން މާލޭގެ ކްލަބުތަކަށް ވެސް މާލީ ދަތިތަކާ ވަނީ ކުރިމަތިލާން ޖެހިފައި ވެއެވެ.

އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ، ސީޒަން ކަލަންޑަރަށް ބަދަލުތަކެއް ގެނެސްފައި ވަނީ ކްލަބުތަކާ މަޝްވަރާ ވެސް ކޮށް، ކްލަބުތަކަށް ވެސް ފަސޭހަވާނެ ގޮތަކަށް ކަމަށެވެ.

ބައްސާމް ވިދާޅުވީ އަންނަ އަހަރުގެ މާލޭ ލީގު ނުބާއްވާނެ ކަމަށާއި، ސީޒަން އޯޕެނިންގައި ކުޅެވޭ މެޗު ވެސް ހޯމް އެންޑް އަވޭ އުސޫލުން ކުޅެވޭ ދެ މެޗެއްގެ ގޮތުގައި ކުރިއަށް ގެންދިއުމަށް ވިސްނާފައިވާ ކަމަށެވެ.

ބައްސާމް ވިދާޅުވީ އޭގެ މައިގަނޑު ބޭނުމަކީ އަތޮޅު ތެރޭގެ ފުޓުބޯޅައަށް ހެޔޮ ގޮތްތަކެއް ހޯދުން ކަމަށާއި، އެފްއޭއެމް އިން މިހާރު ވެސް އަތޮޅު ތެރެއަށް ފޯކަސް ކޮށްގެން ކުރިއަށްގެންދާ މުބާރާތްތަކުގެ ފޮނި މީރުކަން ވެސް ފެންނަމުންދާ ކަމަށެވެ.

އެފްއޭއެމްގެ އެސިސްޓެންޓް ޓެކްނިކަލް ޑިރެކްޓަރު އިހުސާން އަބްދުލްޣަނީ (ސާންތި) މިއަދުގެ ޕްރެސްގައި ވިދާޅުވީ އަންނަ އަހަރުގެ ސީޒަން ފަށާނީ ޔޫތު ޗެމްޕިއަންޝިޕުން ކަމަށެވެ.

ކުރިއަށް އޮތް ސީޒަންތައް ފަށާނެ ބޮޑު މުބާރާތަކަށް ވާނީ ޕްރެޒިޑެންޓް ކަޕް ކަމަށާއި، އޭގެ އެންމެ ބޮޑު ފައިދާއަކީ އޭއެފްސީ ކަޕަށް ތައްޔާރުވާ ޓީމުތަކަށް ވެސް މެޗުތަކެއް ލިބިގެން ދިޔުން ކަމަށް ސާންތި ފާހަގަކުރެއްވިއެވެ.

ސާންތި އިތުރަށް ފާހަގަކުރެއްވީ އަންނަ އަހަރު ސީޒަންގެ ކަލަންޑަރުގެ ތެރެއިން އަންނަ ފީފާ ބްރޭކްތަކަށް ބަރާބަރަށް ލީގު މެދު ކަނޑާލާނެ ކަމަށާއި، ގައުމީ ޓީމަށް އެ ދުވަސްތައް ހުސްކުރުމުގެ ވިސްނުން އެބަހުރި ކަމަށެވެ.

އެފްއޭއެމް އިން މިއަދު ބޭއްވި ޕްރެސްގައި އަންނަ ސީޒަންގެ ލީގަށް ގެނައި ބަދަލުތަކާ އެކު، ޓީމުތަކަށް ގެންނަން ޖެހޭ ބަދަލުތައް ވެސް ވަނީ ހިއްސާކޮށްފައެވެ.

އަންނަ އަހަރު ކަލަންޑަރު ތެރޭގައި 36 ދުވަސް ގައުމީ ޓީމަށް ހުސްވާނެ ކަމަށާއި، އަންނަ އަހަރު ގައުމީ ޒުވާން ޓީމަށް ގިނަ މުބާރާތްތަކެއް ހުރި ކަމަށް ވެސް ސާންތި ފާހަގަކުރެއްވިއެވެ.