ކުރީގެ ރައީސް އަބްދުﷲ ޔާމީންގެ ވެރިކަމުގައި ނާއިންސާފުން ފްލެޓުތައް ދޭން ނިންމި މީހުންގެ މައްޗަށް ޖިނާއީ ދައުވާ ކުރެވޭނެ ކަމަށް ގަބޫލުފު ކުރައްވާ ކަމަށް އިކޮނަމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.

ރާއްޖެޓީވީގެ "ފަލަސުރުހީ ޕްރޮގްރާމް"ގައި ވާހަކަފުޅު ދައްކަވަމުން މިނިސްޓަރު ފައްޔާޒު ވިދާޅުވީ ސަރުކާރު ޒިންމާދާރު ކުރުވުމަށް، އިދިކޮޅުގައި ތިބިގެން މައްސައްކަތް ކުރިއިރު، ސިޔާސީ ބޭނުމަށްޓަކާ ކޮރަޕްޝަން ހިންގާފައިވާތަން ފެނުނު ކަމަށެވެ. ހައްގުވެރި ފަރާތްތައް ތިއްބައި ހައްގު ނޫން ބަޔަކަށް، ފްލެޓް ދިން ކަން، ލިސްޓަށް ބެލުމުން އެނގޭ ކަމަށާއި ސަރުކާރުން އެކަން ހިނގި ގޮތް ބެލުމަށް ފަހު، ރައްޔިތުންނަށް އެކަން ކިޔައިދޭންޖެހޭ ކަމަށް ފައްޔާޒު ވިދާޅުވިއެވެ.

"އެކަންކަން ގެންގޮސްފައި އޮތީ ސިޔާސީ ބޭނުމަަށްޓަކާ ކޮރަޕްޝަން ހިމެނޭ ގޮތަށް. ކަނޑައެޅިގެން އެނގޭ ހައްގު ނޫން ފަރާތްތަކަށް ކަން ދީފައި އޮތީ. ހައްގުވެރި ފަރާތްތައް ތިއްބާ. އެބޭފުޅުން ނެރުއްވި ކްރައިޓީރިއާތަކުގެ ތެރެއިން، އެހެންވީމަ ދައުވާ ކުރެވޭނެ ކަމަށް އަޅުގަނޑު ގަބޫލު ކުރަނީ،" ފައްޔާޒު ވިދާޅުވިއެވެ.

ޔާމީންގެ ވެރިކަމުގެ ފަހުކޮޅުގައި އަވަސް އަރުވާލައިގެން ފްލެޓްތައް ބަހައި ނިންމާލި މައްސަލާގައި އޭރުގެ ހައުސިން މިނިސްޓަރު ޑރ. މުހައްމަދު މުއިއްޒަށް ފާޑުކިޔުން އަމާޒުވުމުން، އޭނާ ވިދާޅުވެފައި ވަނީ ފްލެޓްތައް ދީފައި ވަނީ ހައްގުވެރިންނަށް ކަމަށެވެ. ފްލެޓް ލިބުނު މީހުންގެ ނަންތައް އޭރުގެ ސަރުކާރުން އާންމު ނުކޮށް، ސިއްރު ކޮށްފައިވާއިރު، ޕޮއިންޓް ދިން ގޮތް ކިޔައިދޭން އޭރުގެ ސަރުކާރުން ވަނީ ދެކޮޅު ހަދާފައެވެ.

ނަމަވެސް ރައީސް ސޯލިހު އުފެއްދެވި ކޮމެޓީން އާންމު ކުރި ފްލެޓް ލިބުނު މީހުންގެ ލިސްޓުތަކުން އެނގޭ ގޮތުން، ރައްޔިތުންގެ މަޖިލީހުގެ ޕީޕީއެމް ބައެއް މެމްބަރުންގެ އާއިލީ ގިނަ ބަޔަކަށް ފްލެޓް ދިންކަން ވަނީ ފަޅާއަރާފައެވެ.  އެގޮތުން ޕީޕީއެމްގެ ކުރީގެ ސެކްރެޓަރީ ޖެނެރަލް، ނިލަންދޫ ދާއިރާގެ މެންބަރު އަބްދުﷲ ހަލީލްގެ އަނބިކަނބަލުންނާއި އެއްބަނޑުއެއްބަފާ ކޮއްކޮއިންނާއި އެ މީހުންގެ އަނބިންނާއި ފިރިން ހިމެނޭ ގޮތަށް 12 މީހަކަށް ފްލެޓް ވަނީ ދީފައެވެ.