އިލެކްޝަންސް ކޮމިޝަން (އީސީ)ގެ މެމްބަރު ކަމަށް ދެ ވަނަ ދައުރަކަށް ކުރިމަތިލެއްވި އެ ކޮމިޝަންގެ މެމްބަރު އިސްމާއިލް ހަބީބް ކޮމިޝަނުގެ މެމްބަރުކަމަށް އައްޔަން ކުރަން ފެންނަ ކަމަށް މަޖިލީހުން ފާސްކޮށްފިއެވެ.

މަޖިލީހުގައި ބުދަ ދުވަހު ނެގި ވޯޓުގައި ހަބީބަށް ލިބިވަޑައިގެންނެވީ 58 ވޯޓެވެ.

އީސީގެ މެންބަރު ކަމަށް ކުރިމަތިލި ފަރާތްތަކަށް ރުހުން ދިނުމުގެ މައްސަލަ އަންގާރަ ދުވަހު ވެސް ތާވަލްކުރި އެވެ. ނަމަވެސް ވޯޓަށް ނާހައި އެ ޖަލްސާ ނިންމާލާފައި ވަނީ އީސީގެ މެމްބަރު ކަމަށް ކުރިމަތިލެއްވި ފަރާތްތަކުގެ ތެރެއިން، ހަބީބަށް އެންމެ މަތިން މާސް ލިބިވަޑައިގެންނެވި ކޮމެޓީ ރިޕޯޓާ މެދު، އެމްޑީޕީން ސުވާލު އުފެއްދުމުނެވެ. އެމްޑީޕީން ބުނެފައިވަނީ އެ ރިޕޯޓަކީ ކޮމިޓީން ފާސްކޮށްފައިވާ ރިޕޯޓެއް ނޫން ކަމަށެވެ. ނަމަވެސް ބުދަ ދުވަހުގެ ޖަލްސާގައި މަޖިލީހުގެ ރައީސް ގާސިމް އިބްރާހީމް ވިދާޅުވީ އެ ރިޕޯޓްގައި އެއްވެސް މަައްސަލައެއް ނެތް ކަމަށް ވިދާޅުވެ ކޮމިޓީގެ މުގައްރިރު ސިޓީއެއް ފޮނުއްވާފައިވާ ކަމަށެވެ. 

އީސީގެ މެމްބަރު ކަމަށް ކުރިމަތިލި 16 މީހުން މަޖިލީހަށް ހާޒިރުކޮށް އިންޓަވިއު ކުރީ މިނިވަން މުއައްސަސާތަކުގެ ކޮމެޓީންނެވެ. ހަބީބަށް ލިބިވަޑައިގެންނެވީ 90.28 ޕަސެންޓް މާކުހެވެ. ދެ ވަނައަށް އެންމެ މަތިން މާކްސް ލިބިވަޑައިގެންނެވީ ހ. އަމްސާވިލާ، އަހުމަދު މޫސާއަށެވެ. އޭނާއަށް ލިބިވަޑައިގެންނެވީ 75.57 ޕަސެންޓެވެ.

އީސީގެ މެމްބަރު ކަމަށް ކުރިމަތިލެއްވި ފަރާތްތަކަށް އިންޓަވިއުކުރުމަށް ފަހު، މަޖިލީހުގެ ތަޅުމަށް ފޮނުވާފައިވާ ކޮމެޓީ ރިޕޯޓުގައި ބުނެފައި ވަނީ 75 ޕަސެންޓަށް ވުރެ މަތިން މާކްސް ލިބިވަޑައިގެންނެވި ބޭފުޅުންނަކީ އީސީގެ މެމްބަރު ކަމަށް އައްޔަން ކުރުމަށް ރުހުން ދިނުމަށް އެކަށީގެންވާ ބޭފުޅުން ކަމަށެވެ.

އީސީގެ މެމްބަރު ކަމަށް ކުރިމަތިލެއްވި 16 ބޭފުޅުންގެ ތެރެއިން 75 ޕަސެންޓަށް ވުރެ މަތިން މާކްސް ލިބިވަޑައިގެންނެވީ ހަބީބާއި އަހުމަދު މޫސާއަށް އެކަންޏެވެ. އެ މަގަމަށް ކުރިމަތިލެއްވި އީސީގެ ކުރީގެ މެމްބަރު އަލީ މުހައްމަދު މަނިކަށް ލިބިވަޑައިގެންނެވީ 68.33 ޕަސެންޓް މާކްސްއެވެ.

އީސީގެ މެމްބަރު ކަމަށް ކުރިމަތިލެެއްވި ބޭފުޅުންނާ އިންޓަވިއު ކުރެއްވުމަށް ފަހު، މާކްސް ދީފައި ވަނީ ތައުލީމީ ފެންވަރާއި މަސައްކަތުގެ ތަމްރީނާއި މަސައްކަތުގެ ތަޖުރިބާ އާއި ލީޑާޝިޕާއި ނަޒާހަތްތެރިކަމަށް ބެލުމަށްފަހުގައެވެ.

އިލެކްޝަންސް ކޮމިޝަނަށް މެމްބަރަކު އައްޔަން ކުރަނީ އެ ކޮމިޝަންގެ މެމްބަރަކަށް މިހާރު ހުންނެވި އިސްމާއިލް ހަބީބުގެ މަގާމުގެ މުއްދަތު މި މަހުގެ 13 ވަނަ ދުވަހު ހަމަވާތީއެވެ.

ހަބީބް އަށް އެންމެ މަތިން މާކްސް ލިބުނު އިރު ފާއިތުވި ފަސް އަހަރުގެ ތެރޭގައި ހަބީބް ހިމެނިވަޑައިގަންނަވާ އިލެކްޝަންސް ކޮމިޝަންގެ މެންބަރުންނަށް ބޮޑެތި ފާޑުކިޔުންތަކެއް އަމާޒުވިއެވެ.