ސާރޖިއޯ ރާމޯސް ނެތުމުން ރިއަލް މެޑްރިޑަށް ގެއްލުން ވާނެ: ކޯޗް އެރިކް

އަންގާރަ ދުވަހުގެ މެޗުގައި ރިއާލް މެޑްރިޑްގެ ކެޕްޓަން ސާރޖިއޯ ރާމޯސް ނެތްތަން ދައްކާނެ ކަމަށް ގަބޫލު ކުރާކަމަށް އަޔަކްސްގެ ކޯޗް އެރިކް ޓެން ހެގް ބުނެފިއެވެ.

ސަންޓިއޭގޯ ބާރނަބެއު ސްޓޭޑިއަމްގައި އަޔަކްސްއާއި ދެކޮޅަށް ކުޅުނު މެޗުގައި ގަސްތުގައި ހޯދި ރީނދޫ ކާޑާއެކު ޔޫއެފާއިން ވަނީ އެއް މެޗަށް ރާމޯސް ސަސްޕެންޑް ކޮށްފައެވެ.

ރެއާލް މެޑްރިޑް 2-1 އިން ކުރީގައި އޮއްވާ މެޗުގެ 89 ވަނަ މިނެޓުގައި ރާމޯސްއަށް ރެފްރީ ރީނދޫ ކާޑު ދެއްކީ އަޔަކްސްގެ ކެސްޕާ ޑޯލްބާގަށް ކުރި ފައުލަކަށެވެ. އެ ކާޑާ އެކު ދެ ވަނަ ލެގަށް އޭނާ ސަސްޕެންޑްވިއެވެ.

މި ކާޑާ ގުޅިގެން މިހާރުވެސް ދެ ވަނަ ލެގަށް ސަސްޕެންޑްވެފައިވާ ރާމޯސްއަށް ޔުއެފާގެ އަދަބާ އެކު، ކުއާޓާ ފައިނަލަށް މެޑްރިޑް ދަތުރުކޮށްފި ނަމަ ފުރަތަމަ ލެގުގައި ނުކުޅެވޭނެއެވެ.

އަޔަކްސްގެ ކޯޗް އެރިކް ޓެން ހެގް ބުނީ، ރާމޯސް ނެތުމުން ރިއާލްއަށް ވަރަށް ބޮޑު ގެއްލުމެއް ދައްކާނެ ކަމަށެވެ. ސެންޓަރ ބެކުގައި އޭނާ ނެއްތަންކޮޅު ދައްކާނެ ކަމަށްވެސް އެރިކް ބުންޏެވެ.

ރާމޯސްއާއި ނުލައި ރިއަލް މެޑްރިޑް މިހާރަށް ވުރެން މޮޅު ޓީމަކަށް ނުވާނެ ކަމަށް ގަބޫލް ކުރާކަމަށްވެސް ކޯޗް އެރިކް ބުންޏެވެ.