ބޯން މެރޯ ސްޓެމް ސެލް ޓްރާންސް ޕްލާންޓް ކުރެވުނު ހިއުމަން އިމިއުނޯ ޑެފިޝެންސީ ވައިރަސް (އެޗްއައިވީ) ހުރި މީހެއްގެ ގައިން ބަލީގެ އުނދަގޫ ނުފެނި ޒަމާންތަކެއް ވުމުން އޭނާއަކީ އެ ބަލިން ފަސޭހަވާ ދެވަނަ މީހާއަށް ވެދާނެކަމުގެ އުއްމީދު ލިބިއްޖެއެވެ.
ބަލިމީހާގެ ގައިން ބަލީގެ އަލާމާތެއް ނުފެނި 18 މަސް ވެފައިވާކަމަށް އިނގިރޭސި ވިލާތުގެ ސައިންސް ޖާނަލް ނޭޗަރގައި އަންގާރަ ދުވަހު ޝާއިއުކުރި ލިއުމުގައިވެއެވެ. ނަމަވެސް ބަލި މުޅިން ފަސޭހަވީކަމަށް ބުނަން އަވަސްކަމަށް އެ ޖާނަލްގައި ބުނެފައިވެއެވެ.
"އަޅުގަނޑުމެންނަށް ވަޒަންކޮށްލެވޭނެ އެއްވެސް ވައިރަސްއެއް ނުފެނުނު. އަޅުގަނޑުމެންނަކަށް ވައިރަސްއެއް ނުފެނު" ބަލިމީހާއަށް ފަރުވާދިން ޓީމުގައި ދެވަނައަށް އިސްކޮށް ހުންނެވި އަދި އެޗްއައިވީ ބައޮލޮޖިސްޓެއްކަމަށްވާ ޕްރޮފެސަރ ރަވިންދްރަ ގުޕްތާ ވިދާޅުވިއެވެ.
މިހާތަނަށް އެޗްއައިވީ ޖެހިގެން ރަނގަޅުކުރެވިފައިވާކަމަށް ރެކޯޑްތަކުން ދައްކަނީ އެންމެ މީހެކެވެ. އެއީ މީގެ ބާރަ އަހަރުކުރިން ބޯން މެރޯ ސްޓެމް ސެލް ޓްރާންސް ޕްލާންޓްކޮށްގެން ރަނގަޅުކުރެވުނު ޖަރުމަނުގެ ރައްޔިތެކެވެ.
އޭނާއަށް ދެވުނު ފަރުވާ ދާއިމީ ގޮތެއްގައި ބޭނުންކުރަން ހުއްދަ ދެވުނު ނަމަވެސް އެ ފަރުވާ ނަކަލުކޮށްގެން މިހާތަނަށްވެސް އިތުރު މީހަކު ބަލިން ފަސޭހަވާގޮތްވެފައެއް ނުވެއެވެ.
