ރިޔާސީ ކޮމިޝަނަށް ބާރުދޭ ބިލް 2019 ވަނައަހަރުގެ 5 ވަނަ ޖަލްސާއަށް ވެސް އެޖެންޑާއެއް ނުކުރި
4 މާރިޗު 2019 | ހޯމަ 08:05މިހާރު ކޮމެޓިގެ މުގައްރިރުކަން ކުރައްވަނީ ވިލިފުށީ ދާއިރާގެ މެމްބަރު ރިޔާޒު ރަޝީދު
ރައްޔިތުންގެ މަޖިލީސް | ޓްވިޓަރ
ކޮރަޕްޝަނާއި ފަސާދައިގެ އަމަލުތައް ތަހުގީގު ކުރުމަށް ރައީސުލްޖުމްހޫރިއްޔާ އުފައްދާފައިވާ ރިޔާސީ ކޮމިޝަނާއި މަރުތައް ބެލުމަށް އުފައްދާފައިވާ ރިޔާސީ ކޮމިޝަނަށް ބާރު ދިނުމަށް ހުށަހަޅާފައިވާ ބިލު މިދިޔަ ހަފްތާގެ ހުރިހާ ޖަލްސާއެއްގައި އެޖެންޑާ ކުރުމަށް ފަހު 2019 ވަނަ އަހަރުގެ 5 ވަނަ ޖަލްސާއަށް އެޖެންޑާ ނުކޮށް ކޮމެޓީގައި ބާއްވައިފިއެވެ.
ބިލު ދިރާސާ ކުރި ކޮމިޓީން ނިންމާފައިނުވާ ކަންތައްތަކެއް ބިލްގައި ހިމެނޭ ކަމަށް ބުނެ އެ ބިލް އަނބުރާ ކޮމިޓީ އަށް ފޮނުވާލައިފައި ވަނީ މިދިޔަ ހަފްތާގެ ބުދަ ދުވަހުގައެވެ. އެ ދުވަހުގެ ޖަލްސާގައި 60 އަށް ވުރެ ގިނަ މެންބަރުން ތިއްބެވި ނަމަވެސް މަޖިލީހުގެ ރިޔާސަތުގައި އިންނެވި މަޖިލީހުގެ ރައީސް ގާސިމް އިބްރާހީމް ވަނީ އެ ބިލް ދިރާސާ ކުރި ކޮމިޓީގެ މައްސަލައެއް ފާހަގަކުރެވިގެން އެ މައްސަލަ ބަލަމުން ދާތީ އެ ބިލަށް ވޯޓަށް ނާހަން ރިޔާސަތުން ނިންމާފައިވާ ކަމަށް ވިދާޅުވެފައެވެ.
މިނިވަން މުއައްސަސާތަކާ ބެހޭ ކޮމިޓީގެ މުގައްރިރު ކަމަށްވާ އައްޑޫ މީދޫ ދާއިރާގެ މެންބަރު ރޮޒައިނާ އާދަމް މުގައްރިރުކަމުން ދުރުކުރުމުގެ މައްސަލައެއް ހުށަހެޅުމާއި ގުޅިގެން ރޮޒެއިނާ ވަނީ ކޮމެޓީން އޭނާގެ ނަން ނަންގަވާފައެވެ. އެގޮތުން އެމްޑީޕީން ވަނީ ރޮޒެއިނާގެ ބަދަލުގައި މެދު ހެންވޭރު ދާއިރާގެ މެމްބަރު އަލީ އާޒިމް އެކޮމެޓީއަށް އައްޔަން ކުރައްވާފައެވެ. މިހާރު ކޮމެޓީގެ މުގައްރިރު ކަން ކުރައްވަނީ ވިލިފުށީ ދާއިރާގެ މެމްބަރު ރިޔާޒު ރަޝީދެވެ.
ރޮޒައިނާ ވަނީ ރިޔާސަތުން ފާހަގަކުރީ ދޮގު ވާހަކަތަކެއް ކަމަށާއި ކޮމިޓީން ނުނިންމާ އެއްވެސް ކަމެއް އެ ބިލްގައި ނުހިމެނޭނެ ކަމަށް މީގެކުރިން ވިދާޅުވެފައެވެ. އަދި ވޯޓަށް ނޭހުމަށް ނިންމީ މަޖިލީހުގެ ގަވާއިދާ ޚިލާފަށް ކަމަށާއި އެ ގޮތަށް އަމަލުނުކުރެއްވޭނެ ކަމަށް ވިދާޅުވެފައެވެ . އެ ބިލް ފާސްކުރަން ބޭނުން ނުވަނީ މަރުތަކާއި ކޮރަޕްޝަންގެ ކަންކަމުގައި ބައިވެރިވާ ބަޔަކު މަޖިލީހުގައި ތިބުމުން ކަމަށް ގަބޫލުކުރެއްވޭ ކަމަށް ވެސް ރޮޒައިނާ ވިދާޅުވިއެވެ.
ސަރުކާރުގެ ފަރާތުން ހުށަހެޅި އެ ބިލު ފާސްކުރަން އެންމެ ފުރަތަމަ އެޖެންޑާ ކުރީ މިދިޔަ އަހަރުގެ ޑިސެމްބަރު މަހުގެ 15 ވަނަ ދުވަހުއެވެ. އަދި މިދިޔަ ހަފުތާގެ ހޯމަ، އަންގާރަ އަދި ބުދަ ދުވަހުގެ ޖަލްސާއަށް އެޖެންޑާ ކުރުމުން ވެސް 43 މެންބަރުން ހަމަނުވުމުން އެ ބިލަށް ވޯޓަށް އަހާފައެއް ނުވެއެވެ. މެމްބަރުން ހާޒިރުނުވުމުގެ ސަބަބުން ތިން ދުވަހުގެ ޖަލްސާގައި ވެސް ބިލަށް ވޯޓަށް އެހިފައެއް ނުވެއެވެ. ގުޅިފައިވާ ޕާޓީތަކުގެ ޕާލަމެންޓްރީ ގްރޫޕުގެ މެމްބަރުންގެ އަދަދު 47 އަށް އަރައެވެ.
