އެމެރިކާއިން އެދިގެން ކެނެޑާއިން ހައްޔަރު ކުރި ވާވޭގެ ސީއެފްއޯ މެންގް ވަންޖޫ، ކެނެޑާގެ ބޯޑަރ އެޖެންސީއާ ފުލުހުންގެ މައްޗަށް އޭނާ ގަވައިދާ ހިލާފަށް ހައްޔަރު ކުރި ކަމަށް ތުހުމަތުކޮށް، މަދަނީ ދައުވާކުރަން ނިންމައިފިއެވެ.

މެންގްގެ ވަކީލުން ބުނެފައިވަނީ ދައުވާކުރަން ނިންމީ އޭނާ ފާސްކޮށް ތަހުގީގު ހިންގީ ހައްޔަރު ކުރި ކަމުގެ މައުލޫމާތު ދިނުމުގެ ކުރިން ކަމަށް ވުމުން ކަމަށެވެ. އެމެރިކާގެ އެދުމުގެ މަތިން ޑިސެމްބަރު 1 ވަނަ ދުވަހު މެންގް ހައްޔަރުކުރީ ކެނެޑާގެ ވެންކޫވަރ އިންޓަނޭޝަނަލް އެއަރޕޯޓުންނެވެ.

ދައުވާ ކުރި ފޯމުގައި ހިމަނާފައިވާ މައުލޫމާތަށް ބަލާއިރު، އޭގައި ވަނީ ކެނެޑާގެ ކަސްޓަމްސް އެޖެންޓުން މެންގް ތަހުގީގު ކުރީ ކަސްޓަމްސްއިން އަބަދުވެސް ސުވާލުކުރާ އުސޫލުގެ ދަށުން ބުނެ ކަމަށެވެ. އޭނާ އަސްލު ހައްޔަރު ކުރި ސަބަބެއް ބަޔާން ކުރުމެއް ނެތި، އޭނާގެ ފޯނާއި ލެޕްޓޮޕް އަދި ޕާސްވޯޑުތައް ވެސް ކަސްޓަމްސް އެޖެންޓުން އަތުލި ކަމަށް ވެސް މެންގްގެ ދައުވާގައި ވެއެވެ.

މެންގް ހައްޔަރު ކުރި އަސްލު ސަބަބު އޭނާއަށް އަންގާފައިވަނީ، ކަސްޓަމްސްގެ ބެލުމުގެ ދަށުގައި ހުންނަތާ ތިން ގަޑިއިރު ފަހުން ކަމަށް ވެސް ދައުވާގައި ވެއެވެ. އަދި އޭނާއަށް ލޯޔަރެއް އައްޔަނު ކުރުމުގެ ފުރުސަތު ދީފައި ވަނީ ވެސް ތިން ގަޑި ފަހުން ކަމަށް ވެސް ބުނެފައިވެއެވެ.

ކަފާލާތުގެ ދަށުން ގޭބަންދުގައި ހުރި މެންގް އެމެރިކާގެ އެދުމާއި އެއް ގޮތަށް އެ ގައުމުގެ ކޯޓަށް ހާޒިރުކުރަން ފެނޭތޯ ބަލަން އަޑުއެހުމެއް ބާއްވަން ހަމަޖެހިފައިވަނީ މާރިޗު މަހުގެ 6 ވަނަ ދުވަހުގައެވެ. އެމެރިކާއިން އޭނާގެ މައްޗަށް ތުހުމަތު ކުރަނީ އެ ގައުމުން އިރާނާއި ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާއި ހިލާފަށް މަސައްކަތް ކުރި ކަމަށެވެ.

މެންގް ހައްޔަރު ކުރުމާއި ގުޅިގެން ކެނެޑާއާއި ޗައިނާގެ ގުޅުން ގޯސްވެފައިވާ އިރު، ކެނެޑާގައި ހުންނަ ޗައިނާގެ އެމްބަސީން ބުނެފައިވަނީ އޭނާ ހައްޔަރު ކުރީ ސިޔާސީ ބޭނުމެއްގައި ކަމަށެވެ. އަދި މި ފަހުން އެމެރިކާގެ ރައީސް ޑޮނަލްޑް ޓްރަމްޕް، ޗައިނާއާއި އެކު ހެދޭ ވިޔަފާރި އެއްބަސްވުމެއްގެ ދަށުން މެންގް ދޫކޮށްލެވި ދާނެ ކަމަށް ވިދާޅުވެފައި ވުމުން މިކަމަށް ވަނީ އިތުރަށް ބާރު ލިބިފައެވެ.

ދުނިޔޭގެ މުއާސަލާތީ އާލާތްތައް އުފައްދާ އެއްމެ ބޮޑު އެއް ކުންފުނި ކަމުގައިވާ ވާވޭއަކީ ދުނިޔޭގެ 170 ގައުމެއްގައި ވިޔަފާރި ކުރަމުން އަންނަ ޗައިނާގެ ކުންފުންޏެކެވެ. ވާވޭއިން ދަނީ 2020ވަނަ އަހަރު ބޭނުންކުރަން ފަށަން ހަމަޖެހިފައިވާ 5ޖީ ނެޓްވޯކުތަކަށް ބޭނުންވާ ގިނަ އާލާތްތައް ވެސް އުފައްދަމުންނެވެ. ފާއިތުވެ ދިޔަ އަހަރުގެ ތެރޭގައި ވާވޭއިން ވަނީ ވާދަވެރި އެމެރިކާގެ އެޕަލް ފަހަތަށް ޖައްސާލުމަށް ފަހު ދުނިޔޭގެ ސްމާޓް ފޯނު ބާޒާރުގެ ދެވަނަ ދަރަޖަ ހޯދާފައެވެ.