ނޭޝަނަލް އެޗްއާރު ކޮންވެންޝަން އެންޑް އެކްސްޕޯ ފަށަނީ
2 މާރިޗު 2019 | ހޮނިހިރު 14:35އެކްސްޕޯގައި ރާއްޖެއާއި ރާއްޖޭން ބޭރުގެ 300 ފަރާތުން ބައިވެރިވޭ
މޯލްޑިވްސް އެސޯސިއޭޝަން އޮފް ހިއުމަން ރިސޯސް ޕްރޮފެޝަނަލް ( މާޕް)ގެ ރައީސް ހުސެން އަފީފް
މޯލްޑިވްސް އެސޯސިއޭޝަން އޮފް ހިއުމަން ރިސޯސް ޕްރޮފެޝަނަލް ( މާޕް) އިން ކުރިއަށް ގެންދިއުމަށް ހަމަޖެހިފައިވާ ނޭޝަނަލް އެޗްއާރު ކޮންވެންޝަން އެންޑް އެކްސްޕޯ ފެށުމަށް ހަމަޖެހިފައިވާ ކަމަށް އެ ޖަމުއިއްޔާގެ ރައީސް ހުސެން އަފީފް ވިދާޅުވެއްޖެ އެވެ.
އެކްސްޕޯ ބޭއްވުމުގެ މަގުސަދާއި ބެހޭގޮތުން ރާއްޖެ ޓީވީއާއި ވާހަކަ ދައްކަވަމުން ހުސެން އަފީފު ވިދާޅުވީ ރާއްޖޭގައި މީހުން ބިނާ ކުރުމަށް ކުރެވޭ މަސައްކަތް ތަކާއި ރާއްޖޭގެ އިގުތިސާދު ކުރިއަރަމުން ދާ މިންވަރަށް ބަލާއިރު ހުރިހާ ދާއިރާއަކުންވެސް މީހުން ބިނާ ކުރުމަކީ މުހިންމު ކަމެއްކަމަށް ފެންނާތީ އާއި އަދި މީހުން ބިނާ ކުރުމުގައި ދުނިޔޭގެ ކުރިއަރާފައިވާ ގައުމުތަކުގައި ކަންތައްތައް ކުރާ ގޮތްތަކުގެ މައުލޫމާތު މީހުންނަށް ފޯރުކޮށްދީ ހޭލުންތެރިކަން އިތުރު ކުރުން ކަމަށެވެ.
މި އެކްސްޕޯގައި ރާއްޖޭގެ ހުރިހާ އިންޑަސްޓްރީ ތަކަކުން ބައިވެރިވާއިރު ކީނޯޓް ސްޕީކާޒްގެ ގޮތުގައި ރާއްޖެއިން ބޭރުގެ 6 ފަރާތަކުން ބައިވެރިވާނެ ކަމަށް އަފީފު ވިދާޅުވިއެވެ.
އަދި ޕެރެލަލް ސެޝަން ތަކުގައި 4 ފަރާތަކުން ބައިވެރިވާއިރު އިވެންޓް ކުރިއަށް ދާނީ ތީމް ތަކަކަށް ބަހާކައިގެން ކަމަށް ވެސް އޭނާ ވިދާޅުވިއެވެ.
އެކްސްޕޯގައި ރާއްޖެއާއި ރާއްޖޭން ބޭރުގެ ޖުމްލަ 300 ފަރާތުން ބައިވެރިވާއިރު ކޮންވެންޝަންގެ 10 ޝީޓް އެންޖީއޯތަކަށް ޚާއްސަ ކޮށްފައިވާ ކަމަށް އޭނާ ވިދާޅުވިއެވެ.
މީ ރާއްޖޭގައި މިފަދަ އެކްސްޕޯއެއް ބާއްވާ ފުރަތަމަ ފަހަރު ނަމަވެސް ކުރިއަށް އޮތްތާގައި ކޮންމެ އަހަރަކުވެސް މި ފަދަ ކޮންވެންޝަންތައް ބޭއްވުމަށް ހަމަޖެހިފައިވާ ކަމަށް އަފީފު ވިދާޅުވިއެވެ.
މި އެކްސްޕޯ އޮންނާނީ ދަރުބާރުގޭގައި މާރޗްމަހުގެ 4 އަދި 5 މި ދެދުވަހުގެ ހެދުނު 9:00 އިން ހަވީރު 5:00 އަށެވެ.
މި އިވެންޓްގެ މެއިން ސްޕޮންސަރަކީ އުރީދޫ އެވެ.
