އިންޑިއާގެ ޕައިލެޓް ޕާކިސްތާނުން މިނިވަންކޮށްފި

ޕާކިސްތަނުން ހައްޔަރުކުރި އިންޑިއަން އެއަރ ފޯސްގެ ވިންގް ކޮމާންޑަރު އަބީނަންދަން ވަރްތަމަން މިނިވަންކުރުމަށް ފަހު އިންޑިއާއާ ހަވާލުކޮށްފިއެވެ.

ޕާކިސްތާނުން ހުކުރު ދުވަހުގެ ރޭ އިންޑިއާގެ ޕައިލެޓް ހަވާލުކުރީ ދެ ގައުމު ގުޅޭ ސަރަހައްދީ ރޮނގުގައި އޮންނަ ވާގާ ބޯޑަރު ކްރޮސިންގ ސަރަހައްދުންނެވެ. އޭނާ އިންޑިއާ އަށް އެތެރެވުމާ އެކު އެ ގައުމުގެ ސިފައިން ވަނީ އެ ސަރަހައްދުން އޭނާ ގެންގޮސްފައެވެ. ޕައިލެޓު ގެންދިޔައީ މެޑިކަލް ޗެކްއަޕެއް ހެދުމަށް ކަމަށް އިންޑިއާ ސިފައިން ވަނީ މައުލޫމާތު ދީފައެވެ.

ޕައިލެޓު ދޫކޮށްލާ މަންޒަރު ބަލަން އިންޑިއާގެ ގިނަ އަދަދެއްގެ ރައްޔިތުން އެ ސަރަހައްދަށް އެއްވިއެވެ. މެންދުރުން ފެށިގެން އެއްވި މީހުން ވަނީ ޕައިލެޓު އައުމުގެ އުފާ ފާޅުކުރުމުގެ ގޮތުން އެ ސަރަހައްދުގައި އިންޑިއާ ދިދަ ހިފައިގެން ތިބެ ބެރު ޖަހާ ނަށާފައެވެ.

ޕައިލެޓް މިނިވަންވުމާ ގުޅިގެން ކުރެއްވި ޓްވީޓެއްގައި، އިންޑިއާގެ ބޮޑުވަޒީރު ނަރެންދުރަ މޯދީ ވަނީ އޭނާއަށް މަރުހަބާ ވިދާޅުވެ، އޭނާ ކުރި ހިތްވަރަށް މުޅި ގައުމު ފަހުރުވެރިވާ ކަމަށް ވިދާޅުވެފައެވެ.

ސުލްހައިގެ އަތެއް ދިއްކޮށްލުމުގެ ރަމްޒެއްގެ ގޮތުން ޕައިލެޓް މިނިވަން ކުރަން ނިންމެވީ ޕާކިސްތާނުގެ ބޮޑުވަޒީރު އިމްރާން ހާނެވެ. ނަމަވެސް އޭނާގެ އެ އަމަލު ބަލައިގަތުމުގެ ބަދަލުގައި އިންޑިއާ ސަރުކާރުން ވަނީ އެއީ ކުރަން ޖެހޭ ކަމެއްގެ ގޮތުގައި ސިފަކޮށްފައެވެ. އަދި މި ވަރަކުން ނުފުދޭ ކަމަށް ބުނެ، އިންޑިއާ ސަރުކާރުން ވަނީ ދެ ގައުމުގެ މެދުގައި ސުލްހަ ގާއިމްކުރުމަށް ޕާކިސްތާނުން އިތުރު މަސައްކަތްތަކެއް ކުރަންޖެހޭ ކަމަށް ބުނެފައެވެ.

ޕާކިސްތާނާއި އިންޑިއާގެ ގުޅުން ގޯސްވީ އިންޑިއާގެ ބެލުމުގެ ދަށުގައި އޮތް ކަޝްމީރުގެ ޕުލްވަމާގައި ދިން ޖާނުން ފިދާވުމުގެ ހަމަލާއެއްގައި އިންޑިއާ ޕެރަމިލިޓަރީ ސިފައިންގެ 42 މީހަކު މަރުވުމާ ގުޅިގެންނެވެ. އިންޑިއާ އިން ވަނީ މި ހަމަލާ ދިން ޖައޭޝް ޖަމާއަތަށް ޕާކިސްތާނު ސަރުކާރުން ހިމާޔަތްދޭ ކަމަށް ތުހުމަތުކޮށްފައެވެ. ނަމަވެސް ޕާކިސްތާނުން މި ވާހަކަތައް ދޮގުކުރެއެވެ.