ރައްޔިތުންނަށް ކޮށްދޭ ވެރިކަމަކީ ސާފުވާން ޖެހޭ އެއްޗެއް ކަމަށާއި އެމްޑީޕީއަކީ ގޮތުގައި ތިބޭ ބަޔަކަށް ވެފައި، އަމާޒުން ކައްސާލާ ބައެއް ނޫން ކަމަށް ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ޓިކެޓްގައި 19 ވަނަ ރައްޔިތުންގެ މަޖިލީހަށް ތުޅާދޫ ދާއިރާއިން ވާދަކުރައްވާ ހިސާން ހުސެއިންގެ ކެމްޕެއިންގައި ބައިވެރިވެވަޑައިގެންނެވުމަށް ބ. އަތޮޅަށް ކުރައްވަމުން ގެންދަވާ ދަތުރުފުޅުގައި އެއަތޮޅުގެ ގޮއިދޫގެ ރައްޔިތުންނާއި ބައްދަލުކުރައްވާ ވާހަކަދައްކަވަމުން ރައީސް ނަޝީދު ވިދާޅުވީ ރައްޔިތުންނަށް ކޮށްދޭ ވެރިކަމަކީ ސާފުވާން ޖެހޭއިރު، އެ ވެރިކަމަކީ ގިނަ ޕާޓީ އެކުލެވޭ ރިޔާސީ ނިޒާމެއް ކަމަށެވެ.
އެހެންކަމުން އެމްޑީޕީއަކީ އަބަދުވެސް ގޮތުގައި އޮންނަ ޕާޓީއެއް ކަމަށާއި އަމާޒުން ކައްސާލާ ބައެއް ނޫން ކަމަށް ރައީސް ނަޝީދު ވިދާޅުވިއެވެ.
ރައްޔިތުންނަށް ލިބޭ ތަރައްޤީއަކީ ލިބޭ އާމްދަނީ އިތުރުވުން ކަމަށާއި، ގައުމީ އުފެއްދުން ތެރިކަމަކީ ތިމާއަށް ލިބޭ ތަރައްޤީއަށްވާއިރު މިތަރައްޤީގެ އަސްލަކީ ސަރުކާރު އެކީގައި އާއިލާއެއްގެ ފަހަތުގައި ތިބުން ކަމަށްވެސް އެމަނިކުފާނު ވިދާޅުވިއެވެ.
ގައުމެއްގެ ތަރައްޤީ ލިބެނީ ވަކި ހާއްސަ ކަންތައްތައް ވަކި އިރެއްގައި ލިބިގެން ކަމަށްވާއިރު، އެޖެންޑާ 19 ރައްޔިތުންނަށް މި ގެނެސްދެނީ އެކަންތައްތައް ކަމަށް ފާހަގަކުރައްވަމުން ރައީސް ނަޝީދު ވިދާޅުވީ ރާއްޖޭގެ ތަރައްޤީ ރައްޔިތުންނަށް ފޯރުކޮށްދިނުމަށް މަސައްކަތް ކުރަނީ އެމްޑީޕީން ކަމަށެވެ.
ދިވެހިންނަށް އައިސްފައިވާ ބަދަލު އަބަދުވެސް އެމްޑީޕީއަށް އެނގޭ ކަމަށާއި އެގޮތުން ގޮއިދޫގެ ތަރައްޤީއަށް ކުރަން ހުރި ކަންކަން އޮޅުން ފިލުވާތާ އެތައް އަހަރެއް ވެއްޖެ ކަމަށާއި ރައްޔިތުންގެ ބޭނުންތައް އެމްޑީޕީއަށް ނޯޅޭ ކަމަށްވެސް އެމަނިކުފާނު ވިދާޅުވިއެވެ.
ކޮންމެ އިންތިހާބަކާއި ދިމާކޮށް އެމްޑީޕީން އަބަދުވެސް ރައްޔިތުންގެ ގާތަށް ގޮސް އެރައްޔިތުން ބޭނުންވަނީ ކޮންކަމެއްތޯ އޮޅުން ފިލުވާ ކަމަށާއި އެހެންކަމުން ގޮއިދޫގެ ރައްޔިތުންނަށް ބޭނުންވަނީ ފެނާއި ނަރުދާމާގެ ނިޒާމްގެ ޚިދުމަތް ކަމަށްވާއިރު، އެޖެންޑާ 19 ރައްޔިތުންނަށް މިގެނެސްދެނީ މިފަދަ ޙިދުމަތްތައް ރައްޔިތުންނަށް ވީހާވެސް އަވަހަށް ފޯރުކޮށްދިނުމަށް ކަމަށް ރައީސް ނަޝީދު ވިދާޅުވެއްޖެއެވެ.
މީގެ އިތުރުން ގެސްޓް ހައުސްގެ ވިޔަފާރި ފުޅާވެގެންދާއިރު، ރަށަށް ގިނަ ގުނަ ތަރައްޤީ ލިބިގެންދާނެ ކަމަށާއި މިވިޔަފާރި ފުޅާކުރުމަށް ގޮއިދޫއާއި ހުޅުލެއާއި ދެމެދު ދަތުރުފަތުރުގެ ނިޒާމުން ގުޅާލެވެން ޖެހޭ ކަމަށް އެމަނިކުފާނު ވިދާޅުވިއެވެ.
ގެސްޓް ހައުސްތަކަކީ މެދު އާމްދަނީގެ ތަންތަން ކަމަށްވާއިރު މިތަންތަނަށް ފަތުރުވެރިން އައިސް ފުރާލުމަކީ އެމްޑީޕީގެ ވިސްނުން ކަމަށްވާއިރު ރާއްޖެ މަޑުމަޑުން މިއަންނަނީ ކުރިއަށް ކަމަށް އެޖެންޑާ 19 އަކީ ތަރައްޤީގެ ވަސީލަތެއް ކަމަށްވެސް ވިދާޅުވިއެވެ.
"އެކަނިވެރި މައިންނަށް އެއްޗެއް ދެވުނު. ސްކޫލު ކުދިންނަށް ފޮތް ފަންސުރު ދެވުނު، ބޭސްފަރުވާގެ ޙިދުމަތް ދެވުނު. ކޮންމެވެސް ވަރެއްގެ ބޯހިޔާވަހިކަމެއް ދެވުނު. 2008 ވަނަ އަހަރު ގިނަ ހިދުމަތްތަކެއް ރައްޔިތުންނަށް ދެވުނު. ސަރުކާރުގެ އާމްދަނީއެއް ބޮޑު ބަދަލެއް ގެނައުމުން. މިއީ އެއް ނޫން ރައްޔިތުންނަށް އޮތް މިންވަރަކީ. ތަނަވަސް ރަނގަޅު ދިރިއުޅެއް ހޯދައިދޭން ޖެހޭ" ރައީސް ނަޝީދު ވިދާޅުވިއެވެ.
އެހެންކަމުން ކުރިއަށް އޮތް ރައްޔިތުންގެ މަޖިލީހުގައި އެމްޑީޕީގެ އެޖެންޑާ 19 އާއި އެކު އެ މަޖިލިސް ވެގެންދާނީ ވަގުން ހިފާ މަޖިލީހަކަށް ކަމަށާއި އެމްޑީޕީގެ އައުލަބިއްޔަތު އެމްޑީޕީއަށް ދޭން ޖެހޭ ކަމަށް ރައީސް ނަޝީދު ތަކުރާރުކޮށް ވިދާޅުވިއެވެ.
