އަޅުގަނޑަކީ ސިސްޓަމެއް ނޫން، އަޅުގަނޑު ސިސްޓަމެއް ގާއިމް ކުރާނަން: ޝިދާތާ

ފަސް އަހަރުގެ ދައުރު ފުރިހަމަ ވެގެންދާއިރު، އަންހެނުން ބާރުވެރިކުރުވުމުގެ ''ސިސްޓަމެއް'' ގާއިމް ކުރާނެ ކަމަށް ޖެންޑަރ މިނިސްޓަރު ޝިދާތާ ޝަރީފު ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި މިނިސްޓަރު ޝިދާތާ ވިދާޅުވީ ކޮންމެ ދުވަހަކު ވެސް އަންހެނުން ބާރުވެރިކުރުވުމުގެ އެކި މަސައްކަތްތައް ކުރާ ކަމަށާއި، ފަސް އަހަރުގެ ދައުރެއް ނިމިގެންދާއިރު، މި މަސައްކަތްތަކުގެ ނަތީޖާ ފެންނާނެ ކަމަށެވެ.

މިނިސްޓަރު ޝިދާތާ ވިދާޅުވީ އަންހެނުން ބާރުވެރިކުރުވުމުގެ ސިސްޓަމެއް ގާއިމް ކުރާނެ ކަމަށާއި، ފަސް އަހަރުގެ ދައުރު ނިންމުމަށްފަހު ވެސް، އެސިސްޓަމްގެ ތެރެއިން މަސައްކަތް ކުރިއަށްދާ ގޮތް ދެކެން ބޭނުންވާ ކަމަށެވެ.

"އަޅުގަނޑެއް ނޫން ސިސްޓަމަކީ. އަޅުގަނޑު ބަލާނަން ސިސްޓަމެއް ގާއިމް ކުރެވޭތޯ. އަޅުގަނޑު ނެތް ދުވަހަކުން ވެސް ދެކެން ބޭނުން އޭރުގަ އަޅުގަނޑު ގެނެސްފަ ހުރި ބަދަލުތައް ނަތީޖާގެ ގޮތުން މިއަދުވެސް މިކަންކަމަކީ ހިނގަހިނގާ ކަންކަން ގޮތުގައި ފެނިގެންދާން." ޝިދާތާ ވިދާޅުވިއެވެ.

މިނިސްޓަރު ވިދާޅުވީ ކުރެވޭ މަސައްކަތްތަކުގެ ތެރެއިން، އެކިއެކި އޯޑިއަންސްއަށް އަމާޒުކޮށް ހޭލުންތެރިކުރުމުގެ ޕްރޮގްރާމްތައް ހިންގާ ކަމަށެވެ.

ޝީދާތާ ވިދާޅުވީ ތައުލީމީ ދާއިރާގެ އިތުރުން މަސައްކަތުގެ ދާއިރާތަކުގައި އަންހެނުން ވަރަށް ޕްރޮގްރެސިވް ކަމަށެވެ. ނަމަވެސް އަދިވެސް އަންހެންނުން ކުރިމަތިވާ ތަފާތު މައްސަލަތަކުގެ ތެރެއިން އަޅާނުލާ ދޫކޮށްލާ ބައެއް މައްސަލަތައް އެބަ ހުރި ކަމަށް މިނިސްޓަރު ވިދާޅުވިއެވެ. މިނިސްޓަރު ޝިދާތާ ވިދާޅުވީ އެކި ދާއިރާތަކުން އަންހެނުން ކުރިއަރަމުން އަންނައިރު، އަދިވެސް އެތައް ގޮންޖެހުންތަކާ ކުރިމަތިވާ ކަމަށާއި، ވަރަށް ބޮޑަށް އަންހެނަކަށް ވީތީ ތަފާތު ކުރުންތައް ގެންގުޅޭ ކަމަށެވެ.

އެގޮތުން އިގްތިސާދީ ދާއިރާގައި އަންހެނުންނަށް ފިރިހެނުންނާއި، އެއްހަމައެއްގައި ފައިތިލަ ސާބިތު ކުރަން އުދަނގޫވާ ކަމަށް މިނިސްޓަރު ވިދާޅުވިއެވެ.

"އިގްތިސާދީ ގޮތުން އަންހެނުން ބާރުވެރިވެފައިވާ ނިސްބަތަށް ބަލާއިރު، ދިވެހިރާއްޖެއަކީ ޓޫރިޒަމަށް ބަރޯސާވެފައިވާ ގައުމެއް. އެކަމަކު ޓޫރިޒަމް ސެކްޓަރތައް ތެރޭގައި އެވިޔަފާރި އޯނާޝިޕް އޮންނާނީ ކިތައް އަންހެނުންތޯ؟ އަޅުގަނޑުމެންގެ ފަޅުރަށްތައް ބެހިފައި އޮންނަނީ. އެފަޅު ރަށްރަތަކުގެ އޯނަރޝިޕް އޮންނަނީ ކިތައް އަންހެނުންތޯ؟އެހެންވީމަ އަޅުގަނޑުމެންގެ ގުދަތުރަތީ ވަސީލަތްތައް ބެހެމުން ގޮސްފައިވާއިރު ވެސް އަޅުގަނޑުމެންނަށް ނުފެނޭ އީކުއަލް ޑިސްޓިބިއުޝަންއެއް." މިނިސްޓަރު ޝިދާތާ ވިދާޅުވިއެވެ.

މީގެ އިތުރުން ޝިދާތާ ވިދާޅުވީ ސިޔާސީ ގޮތުން ބާރުވެރިވުމާއި އިންތިޚާބުތަކުގަ ވާދަކުރުންފަދަ ކަންކަމަކީ ގުޅިލާމެހިފައި ހުންނަ ކަންކަން ކަމަށާއި، ފިރިހެނުން ގިނައިން މަޖިލިސް ފަދަ އިންތިޚާބީ މަގާމުތަކުގަ ތަމްސީލު ކުރަނީ އިއްތިފާގަކުން ނޫން ކަމަށެވެ. އަދި ގިނަ ފިރިހެނުންނަކީ އިގްތިސާދީ ގޮތުންނާއި، ފައިސާގެ ގޮތުން އެބާރުވެރި ބައެއް ކަމަށާއި، އެފަދަ ބާރުވެރިކަމެއް ގިނަ އަންހެނުންގެ ނެތް ކަމަށެވެ.

މިނިސްޓަރު ޝިދާތާ ވިދާޅުވީ މިފަދަ ކަންކަމަކީ ސިޔާސީ މައިދާނުގައި އަންހެނުން ކުރިއަށް ދިއުމަށް އެޅޭ ހުރަސްތައް ކަމަށާއި، ރައްޔިތުންގެ މަޖިލީހުގައި އަންހެނުން ފަސް ޕަސެންޓް ލިބުމުން އެތައް ވާހަކައެއް ކިޔައިދޭ ކަމަށެވެ.