މަޝްވަރާ އިސްކުރުމަށް އިންޑިއާ އާއި ޕާކިސްތާނަށް ރާއްޖެއިން ގޮވާލައިފި
އަވަސް ހައްލެއް ހޯދުމަށް ދެ ގައުމަށް ގޮވާލާފައިވޭ
އިންޑިއާ އާއި ޕާކިސްތާނުގެ ދިދަ
މަޝްވަރާ އިސްކުރުމަށް އިންޑިއާ އާއި ޕާކިސްތާނަށް ރާއްޖެއިން ގޮވާލައިފިއެވެ.
ޕާކިސްތާނާއި އިންޑިއާގެ ގުޅުން ގޯސްވީ އިންޑިއާގެ ބެލުމުގެ ދަށުގައި އޮތް ކަޝްމީރުގެ ޕުލްވަމާގައި ދިން ބޮމުގެ ގޮއްވުމުގެ ހަމަލާއެއްގައި އިންޑިއާ ޕެރަމިލިޓަރީ ސިފައިންގެ 42 މީހަކު މަރުވުމާ ގުޅިގެންނެވެ. އިންޑިއާއިން ވަނީ މި ހަމަލާ ދިން ޖައީޝް ޖަމާއަތަށް ޕާކިސްތާނު ސަރުކާރުން ހިމާޔަތް ދޭ ކަމަށް ތުހުމަތު ކޮށްފައެވެ. ނަމަވެސް ޕާކިސްތާނުން މި ވާހަކަތައް ދޮގުކުރެއެވެ.
ރާއްޖޭގެ ފޮރިން މިނިސްޓްރީން ބުދަ ދުވަހު ނެރުނު ބަޔާނުގައި ވަނީ ޤައުމުތަކުގައި ޓެރަރިޒަމްގެ އަމަލުތައް ހިންގާ ޖަމާއަތްތަކާ ދެކޮޅަށް މާނަވީ ފިޔަވަޅުތަކެއް އެޅުމަށް ގޮވާލައި، ރާއްޖޭން ޓެރަރިޒަމްގެ އަމަލުތަކާ ދެކޮޅަށް ކުރާ ހަނގުރާމައިގައި އެއްބާރުލުން ދޭނެ ކަމަށް ބުނެފައެވެ. އަދި ރާއްޖެއިން ބައިނަލްއަޤްވަމީ މުޖުތަމައުއާ ގުޅިގެން މަސައްކަތް ކުރާނެ ކަމަށް އެ ބަޔާނުގައި ބުނެފައިވެއެވެ.
ރާއްޖެއިން ވަނީ ދެ ޤައުމަށް ވެސް ސަރަހައްދީ ހަމަޖެހުން ދަމަހައްޓަން ގޮވާލާފައެވެ. އަދި ޑިޕްލޮމެސީ އާއި މަޝްވަރާގެ ތެރެއިން މައްސަލައަށް އަވަސް ހައްލެއް ހޯދުމަށް އިންޑިއާ އާއި ޕާކިސްތާނަށް ވަނީ ގޮވާލާފައެވެ.
