އުރީދޫ މޯލްޑިވްސްގެ އާޓިފިޝަލް އިންޓެލިޖެންސް ބޭނުންކުރާ ޑިޖިޓަލް ޑިޖިޓަލް އެސިސްޓަންޓު "އެވީ" ދައްކާލައިފިއެވެ.
މިޚިދުމަތް ދައްކާލާފައިވަނީ މޮބައިލް ވޯލްޑް ކޮންގްރެސްގައެވެ.
އުރީދޫ މޯލްޑިވްސްގެ ސީއީއޯ، ނަޖީބް ޙާން ވިދާޅުވީ 5ޖީގެ ދުނިޔޭގައި ކަސްޓަމަރުންގެ ބަދަލުވަމުންދާ ބޭނުންތަކަށް އެކަށޭނެ ހައްލުތައް ހޯދައި، އާޓިފިޝަލް އިންޓެލިޖަންސް އަދި މެޝިން ލާނިންގގެ ސޮލިއުޝަންތައް ފޯރުކޮށްދިނުމަށް އުރީދޫ އިން ގިނަ މަސައްކަތްތަކެއް ކުރަމުންގެންދާ ކަމަށެވެ.
"ޓެކްނޮލޮޖީ ދާއިރާގެ އެންމެ ކުރިއަރާފައިވާ ލީޑަރުން ބައިވެރިވާ އެމް.ޑަބްލިއު.ސީ ބާސެލޯނާގައި، ދިވެހިރާއްޖެ ތަމްސީލުކޮށް، އުރީދޫ މޯލްޑިވްސްގެ ޑިވެލޮޕަރުންގެ އަމިއްލަ އުފެއްދުންތައް މިފަދަ ބާރުގަދަ ޕްލެޓްފޯމެއްގައި ދައްކާލެވުމަކީ އަޅުގަނޑުމެންނަށް ލިބިގެންދާ ނުހަނު ބޮޑު ޝަރަފެއް، އަދި އުފަލެއް." ނަޖީބް ޙާން ވިދާޅުވިއެވެ.
ތަފާތު ޗެނަލްތަކުގައި މަސައްކަތް ކުރާ "އެވީ"ގެ އެހީތެރިކަން ވޮއިސް ކޯލް އަދި އެސްއެމްއެސް މެދުވެރިކޮށް އަދި ފޭސްބުކް މެސެންޖަރ، ޓްވިޓަރ، ވައިބަރ، ޓެލެގްރާމް، ވަޓްސްއެޕް ފަދަ އެޕްތަކުންވެސް ލިބޭނެއެވެ.
އަދި އެލެކްސާ، ގޫގުލް އެސިސްޓަންޓު މެދުވެރިކޮށް ސްމާޓް ހޯމް ވަސީލަތަކުންވެސް "އެވީ" ގެ ޚިދުމަތްތައް ބޭނުންކުރެވޭނެއެވެ.
ކޯލް ސެންޓަރު ތަކަކީ ގިނަ ކަސްޓަމަރުންގެ ފަރާތުން އެއް ސުވާލުތަކަކަށް ޖަވާބު ފޯރުކޮށްދޭ ތަނަކަށްވެފައި، ޚިދުމަތުގެ ފެންވަރު ރަނގަޅުކޮށް އަވަސް ކުރުމަށްޓަކައި އާޓިފިޝަލް އިންޓެލިޖަންސް އަދި މެޝިން ލާނިންގެ ބޭނުންހިފުމަށް ރަނގަޅު ފުރުސަތުތަކެއް ލިބިގެންދާނެ ކަމަށް އުރީދޫއިން ބުންޏެވެ.
"އެވީ" މެދުވެރިކޮށް މައުލޫމާތު ހޯދުމުން ފެށިގެން، ޚިދުމަތް ޚިޔާރުކުރުމާއި، ފަސޭހަކަމާއިއެކު ބޭނުން ކުރުމުގައިވެސް ކަސްޓަމަރުންގެ ހުރިހާ ތަޖުރިބާތަކެއް އިތުރަށް ފުރިހަމަވެ، ބޭނުންވާ އެހީތެރިކަން ފަސޭހަކަމާއި އެކު ލިބިގެންދާނެ ކަމަށް އުރީދޫއިން ބުންޏެވެ.
މިޙިދުމަތް މިއަހަރުގެ މާރޗް މަހުގެ ތެރޭގައި ތަޢާރަފްކުރާނެއެވެ.
