ކޯލިޝަނަށް މަޖިލިސް މެޖޯރިޓީ އޮވެގެންވާ ފައިދާއެއް ނެތް: އެމްޑީޕީ
27 ފެބުރުއަރީ 2019 | ބުދަ 07:38އެމްޑީޕީއަށް މެޖޯރިޓީ ލިބެންޖެހޭ ކަމަށް ވިދާޅުވި
އެމްޑީޕީގެ ޑެޕިއުޓީ ސެކެޓްރީ ޖެނެރަލް އަފްޝަން ލަތީފް
ކޯލިޝަނަށް މަޖިލިސް މެޖޯރިޓީ އޮވެގެންވާ ފައިދާއެއް ނެތް ކަމަށް އެމްޑީޕީން ބުނެފިއެވެ.
ބުދަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ ޑެޕިއުޓީ ސެކްރެޓަރީ ޖެނެރަލް އަފްޝަން ލަތީފް ވިދާޅުވީ، މަޖިލީހަށް ކޯލިޝަންގެ މެޖޯރިޓީ ލިބިފައިވި ނަމަވެސް އެކަމުންވާ ފައިދާއެއް ނޯންނަ ކަމަށާއި، ރައްޔިތުންނާ ނުހަނު ގުޅުންހުރި ރިޔާސީ ކޮމިޝަންތަކަށް ބާރު ދިނުމުގެ ބިލް ފާސްނުވުމަކީ ހިތާމަހުރި ކަމެއް ކަމަށެވެ.
އަފްޝަން ވިދާޅުވީ، ރިޔާސީ ކޮމިޝަންތަކަށް ބާރު ދިނުމުގެ ބިލު ފާސްކުރުމަކީ ރައީސް އިބްރާހިމް މުހައްމަދު ސޯލިހުގެ ވަރަށް މުހިއްމު ވައުދުފުޅަކަށްވެފައި، 3 ފަހަރަށް އެޖެންޑާ ކޮށްގެން ވެސް އެ ބިލު ފާސްނުވެ އޮތުމަކީ ހިތާމަހުރި ކަމެއް ކަމަށާއި، އެއިން ދޭހަވަނީ ސަރުކާރުގެ ވައުދުތައް ފުއްދުމަށް އެމްޑީޕީއަށް މެޖޯރިޓީ ލިބެންޖެހޭކަން ކަމަށެވެ.
ސަރުކާރު ކޯލިޝަންގައި މެޖޯރިޓީ އޮންނައިރު، އަންގާރަ ދުވަހުގެ މަޖިލީހުގެ ޖަލްސާ އަށް ހާޒިރުވެވަޑައިގެންނެވީ 37 މެމްބަރުންނެވެ. ނަމަވެސް ވޯޓު ގަޑީގައި ޖުމްހޫރީ ޕާޓީގެ 10 މެމްބަރަކާއި އެމްޑީޕީގެ މެމްބަރެއް ވޯޓަށް ވަޑައިގެންފައެއް ނުވާއިރު، ޑިސެމްބަރު މަހުގެ ތެރޭގައި ބޭއްވި ތިން ވަނަ ދައުރުގެ ފަހު ޖަލްސާގައި ވޯޓު ނުނެގުނީ ހަތަރު މެމްބަރުން މަދުވުމުންނެވެ.
އަފްޝަން އެހެން ވިދާޅުވެފައިވާއިރު، ސަރުކާރުގެ އަޣުލަބިއްޔަތު އޮވެމެ، ބިލް ފާސް ނުވެ ދިގުލައިގެން ދިއުމަކީ ރައީސް އިބްރާހިމް މުހައްމަދު ސޯލިހް ކަންބޮޑުވެވަޑައިގަންނަވާ ކަމެއް ކަމަށާއި، ބިލް ފާސް ނުވެ ގިނަ ދުވަސްތަކެއް ވެފައިވާތީ އެކަމާ ރައީސް ހިތާމަ ކުރައްވާ ކަމަށް ރައީސް އޮފީހުގެ ތަރުޖަމާނު އިބްރާހިމް ހޫދު ވިދާޅުވެފައިވެއެވެ.
