މަޖިލިސް އިންތިޚާބުގެ ކެންޑިޑޭޓުން ރިޝްވަތުގެ ކުށެއް ނުކުރުމަށް އިލްތިމާސްކޮށްފި
26 ފެބުރުއަރީ 2019 | އަންގާރަ 17:54އިންތިޚާބުތަކާބެހޭ އާންމު ގާނޫނުއަށް އަމަލުކުރަން ޖެހޭ
އެންޓި ކޮރަޕްޝަން ކޮމިޝަން
ކުރިއަށް އޮތް ރައްޔިތުންގެ މަޖިލީހުގައި ވާދަކުރާ ކެންޑިޑޭޓުންނާއި، އިންތިޚާބަށް ކެންޕޭން ކުރަމުންދާ ފަރާތްތައް ރިޝްވަތުގެ ކުށެއް ނުވަތަ އެނޫން ވެސް ކޮރަޕްޝަންގެ އަމަލުތައް ނުހިންގުމަށް އެންޓި ކޮރަޕްޝަން ކޮމިޝަން (އޭސީސީ) އިން އިލްތިމާސްކޮށްފިއެވެ.
އޭސީސީން ނެރުނު ބަޔާނެއްގައި ބުނީ ހަ އޭޕްރީލްގައި ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބުގައި ވާދަކުރާ ކެންޑިޑޭޓުންނާއި، ކެންޑިޑޭޓުންގެ މަންދޫބުން އަދި ކެންޑިޑޭޓުންނަށް ތާއީދުކޮށް ކެންޕޭން ކުރަމުންދާ ފަރާތްތަކުން އިންތިޚާބުތަކާބެހޭ އާންމު ގާނޫނުއަށް އަމަލުކުރުމަށް އެދޭ ކަމަށެވެ.
އޭސީސީން ބުނީ އިންތިޚާބާ ގުޅިގެން ހަރަދު ކުރެވޭނެ އެންމެ މަތީ މިންވަރަކީ އިންތިޚާބީ ދާއިރާއެއްގައި ވޯޓު ދިނުމުގެ ހައްގު ލިބިގެންވާ ކޮންމެ މީހަކަށް 2000 ރުފިޔާގެ މަގުން ހިސާބުކުރުމުން ނުކުންނަ އަދަދު ކަނޑައެޅި ބަޔާންވެފައިވީ ނަމަވެސް މި ފައިސާއަކީ ގާނޫނު ހުއްދަ ކުރާ ގޮތުގެ މަތިން ހަރަދު ކުރުމަށް ހުއްދަދީފައިވާ ފައިސާ ކަމާއި، އަދި އެ ފައިސާ ބޭނުން ކުރަންވާނީ އިންތިޚާބީ ދާއިރާގެ މީހުންގެ ތާއީދު ހޯދުމަށް ކުރާ މަސައްކަތްތަކަށް ކަމަށެވެ. އަދި ގާނޫނު ހުއްދަ ނުކުރާ މިނޫން ބޭނުންތަކާއި، ވޯޓު ގަތުމަށާއި، ރިޝްވަތު ދިނުން ފަދަ ކަންކަމަށް ފައިސާ ބޭނުން ކުރުމަކީ ކަނޑައެޅިގެން ގާނޫނާ ހިލާފު ކަމެއް ކަމަށް ބަޔާނުގައި ބުނެފައިވެއެވެ.
އެގޮތުން އިންތިޚާބުތަކާ ބެހޭ އާންމު ގާނޫނަށް އެއް ވަނަ އިސްލާހު ގެނައުމުގެ ގާނޫނުގެ 74 ވަނަ މާއްދާގެ (މ)ގެ ދަށުން އިންތިޚާބުތަކާ ގުޅިގެން ހުށަހެޅޭ ރިޝްވަތާ ގުޅޭ މައްސަލަތައް ބަލައި ތަހުގީގު ކުރުން އެ ކޮމިޝަނުގެ މައްޗަށް ލާޒިމްކޮށްފައިވާ ކަމެއް ކަމަށާއި، އެފަދަ ކެންޑިޑޭޓުންނާއި ކެމްޕެއިންގައި އުޅޭ މީހުންނާ މެދު ފިޔަވަޅު އަޅާނެ ކަމަށް އޭސީސީން ބުންޏެވެ.
މީގެ އިތުރުން އޭސީސީން ބުނީ 74 ވަނަ މާއްދާގެ (ހ)ގެ (11) ގައި އެއްވެސް އިންތިޚާބީ ހައްގެއްގެ ފައިދާ ވަކި ފަރާތަކަށް ވަކި ގޮތަކަށް އެފަދަ ހައްގެއްގެ ބޭނުމެއް ކުރީތީވެ އެއްވެސް އެއްޗެއްގެ ޝުކުރެއްގެ ގޮތުން ނުވަތަ ހަދިޔާއެއްގެ ގޮތުން ވިޔަސް ނުވަތަ އެ ނޫން ގޮތަކަށް ވިޔަސް ދިނުން އަދި މިފަދައިން އެއްވެސް އެއްޗެއް ދިނުމަކީ ރިޝްވަތު ދިނުން ކަމުގައި ބެލެވޭނެ ކަމަށެވެ.
އަދި 74 ވަނަ މާއްދާގެ (ހ)ގެ (12) ގައި އިންތިޚާބަށް އިއުލާން ކުރާ ތާރީހުން ފެށިގެން އިންތިޚާބުގެ ދާއިމީ ނަތީޖާ އިއުލާން ކުރާތާ 30 ދުވަހުގެ ނިޔަލަށް، އިންތިޚާބާ ގުޅިގެން ކެންޑިޑޭޓަކު ތާއީދު ހޯދުމަށްޓަކައި ނުވަތަ އެހެން ކެންޑިޑޭޓެއްގެ އިންތިޚާބީ ހައްގަށް ނުރަނގަޅު އަސަރު ފޯރުވުމަށްޓަކައި ވަކި ފަރުދަކަށް ނުވަތަ ޖަމާއަތަކަށް ނުވަތަ އާންމު ފައިދާއަށްޓަކައި އެއްޗެއް ދިނުން ނުވަތަ ޚިދުމަތެއް ފޯރުކޮށްދިނުމަށް ނުވަތަ މި ނޫން ވެސް މަންފާއެއް ފޯރުކޮށްދިނުން ނުވަތަ މި އިން ކަމެއް ކޮށްދޭނެ ކަމަށް ބުނުން ނުވަތަ މިފަދައިން އަމަލުކުރުން ނުވަތަ ކުރަން އުޅުން އެއީ ވެސް ރިޝްވަތު ދިނުން ނުވަތަ ރިޝްވަތު ދޭންއުޅުން ކަމުގައި ބެލެވޭނެ ކަމަށް ބަޔާންކޮށްފައިވާ ކަމަށެވެ.
މިދުވަސްވަރަކީ ރައްޔިތުންގެ މަޖިލީސް އިންތިޚާބުގެ ދުވަސްވަރުކަން ފާހަގަ ކުރައްވައި އޭސީސީންގެ ބަޔާނުގައި ބުނެފައި ވަނީ އިންތިޚާބުގައި ވާދަކުރާ ކެންޑިޑޭޓުން ނުވަތަ އިންތިޚާބަށް ކެންޕޭންކުރަމުންދާ ފަރާތްތަކުން ނުވަތަ އެނޫން ފަރާތްތަކުން ވެސް އިންތިޚާބީ ދާއިރާއެއްގެ ވޯޓަށް އަސަރުކުރާނެފަދަ ގޮތަކަށް ކޮރަޕްޝަންގެ އަމަލެއް ނުވަތަ ނާޖާއިޒު ފައިދާ ހޯދުން ނުވަތަ ހޯދައިދިނުން، ދައުލަތަށް ފައިދާވާން އޮތްކަމެއްގައި އެނޫންގޮތަކަށް އަމަލުކުރުން، އަމިއްލަ ފައިދާ ލިބޭ ގޮތަށް ދައުލަތުގެ ތަކެތި ބޭނުން ކުރުން ހިންގުމަކީ ފިޔަވަޅު އެޅޭނެ ކަމެއް ކަމަށެވެ.
އެހެންކަމުން އިންތިޚާބުތަކާ ގުޅިގެން އިންތިޚާބުތަކާބެހޭ އާންމު ގާނޫނުއަށް 1 ވަނަ އިސްލާހު ގެނައުމުގެ ގާނޫނުގެ 74 ވަނަ މާއްދާގެ (ހ)ގެ 11 އަދި 12 ނަންބަރުގައި ބަޔާންކުރާފަދަ ރިޝްވަތުގެ ކުށެއް ނުވަތަ އެނޫން ވެސް ކޮރަޕްޝަންގެ އަމަލުތައް ނުހިންގުމަށް އިންތިޚާބުގައި ވާދަކުރާ ކުރާ ކެންޑިޑޭޓުންނަށްށާއި، އިންތިޚާބަށް ކެންޕޭން ކުރަމުންދާ ފަރާތްތަކަށް އިލްތިމާސްކުރާ ކަމަށެވެ.
