އެމިލިއާނޯ ސަލާ ދަތުރުކުރި ޖެޓު ދުއްވަން އިން ޕައިލެޓްގެ ލައިސެންސާ ބެހޭ މައުލޫމާތު ހާމަކޮށްފި

އެމިލިއާނޯ ސަލާ ދަތުރުކުރި ޖެޓު ދުއްވަން އިން ޕައިލެޓް ޑޭވިޑް އިބޮޓްސަންގެ ލައިސެންސްއަކީ "ކޯސްޓް ޝެއަރިން ބޭސިސް" ނުވަތަ ހަރަދު ދެ ފަރާތަށް ބަހާލެވިގެން ދަތުރު ކުރުން ހުއްދަ ލައިސެންސެއް ކަމަށް ކަމާ ބެހޭ އިދާރާތަކުން ހާމަކޮށްފިއެވެ.

ރިޕޯޓްތައް ބުނާ ގޮތުގައި އިބޮޓްސަން އަތުގައި އޮތީ ޕްރައިވެޓް ލައިސެންސެއް ކަމާއި، އެ ލައިސެންސް ހުއްދަ ކުރަނީ ހަމައެކަނި ޔޫރަޕްގެ އެތެރޭގެ އުދުހުންތަކަށެވެ. އަދި އެ ލައިސެންސް އޮންނަ ޕައިލެޓުން ދަތުރުކުރާނީ ދެ ފަރާތުން އެއްބަސްވާ ގޮތެއްގެ މަތިން ދަތުރަށް ދާ ހަރަދު ބަހާލައިގެން ކަމަށް ވެސް ވައިގެ އެކްސިޑެންޓްތައް ތަހުގީގުކުރާ އިދާރާ، އެއާ އެކްސިޑެންޓް އިންވެސްޓިގޭޝަން ބްރާންޗް (އޭ.އޭ.އައި.ބީ) އިން ހޯމަ ދުވަހު ވަނީ ބުނެފައެވެ.

އޭ.އޭ.އައި.ބީގެ ރިޕޯރޓް ބުނާ ގޮތުގައި ކާޑިފްސިޓީއަށް ބަދަލުވި ސަލާ އާއި އިބޮޓްސްންގެ މެދުގައި އެއްބަސްވެވުނީ ކިހިނެއް ކަމެއް އަދި ސާފުވެފައެއް ނުވެއެވެ. މި ރިޕޯރޓްގައި އިތުރަށް ބުނެފައި ވަނީ އިބޮޓްސްން މީގެ ކުރިން ވެސް މިފަދަ ދަތުރުތަކެއް ކޮށްފައިވާ ކަމަށެވެ.

ޑޭވިޑް އިބޮޓްސަންގެ ލައިސެންސާއި، ލޮގްބޮކް މި ހާދިސާގައި ގެއްލިފައިވުމުން އެންމެ ފަހުން އިބޮޓްސަން ޖެޓު ދުއްވާފައިވާ މިންވަރު ބެލުމުގައި ދަތިތަކެއް ހުރި ކަމަށް އޭ.އޭ.އައި.ބީގެ ރިޕޯރޓްގައި ވެއެވެ.

ނިމިގެންދިޔަ ޖެނުއަރީ މަހުގެ 21 ވަނަ ދުވަހު ގެއްލުނު ޕައިޕާ މަލިބޫ ނަމަކަށް ކިއުނު މި ޖެޓް ފެނިފައި ވަނީ 13 ދުވަސް ފަހުންނެވެ.

މި ޖެޓް ގެއްލުނީ ޗެނަލް އައިލެންޑްގެ ގޯންސީގެ ލައިޓް ހައުސް ކައިރިން ކަމަށްވާއިރު، ޖެޓު ހޯދުމުގެ މަސައްކަތް ތިން ދުވަސް ވަންދެން ވަރަށް ބާރަށް ކުރިޔަށް ގެންދިޔައެވެ. އެހެން ނަމަވެސް މޫސުން ތަން ނުދިނުމުގެ ސަބަބުން ގޯންސީ ޕޮލިހާއި ފްރާންސް އަދި އިންގްލެންޑްގެ ސިފައިން ގުޅިގެން ޖެޓު ހޯދުމަށް ކުރަމުންދިޔަ މަސައްކަތް ހުއްޓާލީ އެ ސަރަހައްދުގެ މޫސުން ހުރި ގޮތުންނެވެ. މަސައްކަތް ހުއްޓާލީ 1700 ސްކޮޔާ މައިލް ބެލުމަށް ފަހުއެވެ.

ފްރާންސްގެ ނެންޓެސްއަށް ކުޅެމުން އައި ސަލާ، ލީގުގައި ދަށް ނަތީޖާތަކެއް ނެރެމުން އަންނަ ކާޑިފް ރެލިގޭޝަނުން ސަލާމަތް ކުރުމަށް އެޓީމަށް ގެނެސްފައި ވަނީ މިދިޔަ ޖަނަވަރީ މަސްތެރޭގައެވެ.

މައުލޫމާތު ލިބިފައިވާ ގޮތުގައި ފްލައިޓްގައި ކާޑިފް އަށް ސަލާ ދަތުރު ކުރަމުން ދިޔައީ އެ ޓީމާ ގުޅުމަށެވެ.

ޖެޓުން ދަތުރުކުރި އާރޖެންޓީނާގެ ފޯވާޑް އެ މިލިއާނޯސަލާގެ ހަށިގަނޑު ފެނިފައިވާއިރު، ޕައިލެޓު ފެނިފައެއް ނުވެއެވެ.