އިރާގުގެ ކުރީގެ ރައީސް ސައްދާމް ހުސައިންއަށް އިވުނު މަރުގެ ހުކުމް ތަންފީޒު ކުރުމުގެ ކުރިން އޭނާ އެކަމުން ސަލާމަތްކުރުމަށް ލީބިއާގެ ލީޑަރު މުއައްމަރުލް ގައްޒާފީ މަސައްކަތް ކުރެއްވި ކަމަށް ސައްދާމްގެ ޝަރީއަތް ކުރިއަށް ގެންދެވި ފަނޑިޔާރަކު ވިދާޅުވެއްޖެއެވެ.
ދަންޖައްސާ އަވަހާރާކޮށްލެވުނު އިރާޤުގެ ރައީސް ސައްދާމް ހުސެއިންގެ މައްޗަށް ހިންގި ޝަރީއަތުގައި އިންނެވި އިސްފަނޑިޔާރު ކަމަށްވާ މުނީރު ހައްދާދު އަލް އަރަބިއާ ނޫހާއި ވާހަކަ ދައްކަވަމުން ވިދާޅުވީ ސައްދާމް އިއްވި މަރުގެ ހުކުމް ތަންފީޒް ކުރުމުގެ ކުރިން އޭނާ ސަލާމަތް ކުރެއްވުމަށް ގައްޒާފީ މަސައްކަތްކުރެއްވީ ސައްދާމްގެ ސެކިއުރިޓީ ބެލެހެއްޓެވި އެމެރިކާގެ އޮފިސަރުންނަށް ރިޝްވަތު ދީގެން ކަމަށެވެ.
ސައްދާމްއަށް އިއްވި މަރު ހުކުމް ތަންފިޒް ކުރަން ހަމަޖެހިފައިވާ ދުވަހަށްވުރެ ކުރިން އެ ހުކުމް އިރާޤުގެ ކަމާއިބެހޭ ފަރާތްތަކުން އަވަސް ކުރިއެވެ. ސައްދާމްގެ ހުކުމް ތަންފީޒްކޮށްފައިވަނީވެސް މަރުގެ އަދަބު ދިނުމަށް އިރާގުގެ ގާނޫނުތައް މަނާ ކުރާ ދުވަހެއްގައެވެ.
އިރާގުގެ ގާނޫނުތައް ބުޏާ ގޮތުން އެއްވެސް ޢީދު ދުވަހެއްގައި މަރުގެ ހުކުމެއް ތަންފީޒް ކުރުމަކީ ހުއްދަކަމެއް ނޫނެވެ.
ސައްދާމް ދަން ޖެއްސީ ދެހާސް ހަވަނަ އަހަރުގެ ޑިސެމްބަރު ތިރީސްވަނަ ދުވަހުއެވެ. އެދުވަހަކީ އިރާގުގައި އަޟުހާ އީދު ފާހަގަ ކުރަން ފެށި ދުވަހެވެ.
މުނީރު ހައްދާދު ވިދާޅުވީ ސައްދާމްގެ މައްޗަށް އިއްވުނު ހުކުމް ތަންފީޒް ކުރުން އަވަސްކުރީ ސައްދާމް ފިއްލަވާފާނެ ކަމުގެ ބިރު އޮތުމުންނާއި، ގައްޒާފީ ސައްދާމް ގެންދަވަން މަސައްކަތްކުރައްވާކަން އެނގުނު ހިސާބުންނެވެ.
އަނެއްކޮޅުން ސައްދާމަށް ކުރި ހުކުމުގެ އަދަބު ތަންފީޒު ކުރުން އެމެރިކާ އިން ލަސްކުރަމުން ދިޔުމަކީވެސް އެކަން އަވަސް ކުރަންޖެހުނު ސަބަބެއް ކަމަށް މުނީރު ހައްދާދު ވިދާޅުވިއެވެ.
މުނީރު ވިދާޅުވީ ސައްދާމުގެ ހުކުމް ތަންފީޒް ކުރުމުގެ ހުއްދަ އިރާގުގެ ކުރީގެ ރައީސް ޖަލާލް ތަލަބާނީ ދެއްވައިފައި އޮތުމުން ސައްދާމް ވަގަށް ނަގައިގެން ގެންގޮސްފާނެތީ އެކަން އަވަސް ކުރަންޖެހުނު ކަމަށެވެ.
ހައްދާދަކީ ސައްދާމުގެ ޝަރީއަތް ކުރިއަށް ގެންދިޔަ ސްޕެޝަލް ކްރިމިނަލް ކޯޓުގެ އިސް ފަނޑިޔާރެވެ. ސައްދާމުގެ ޝަރީއަތް ކުރިއަށް ގެންދިޔައީ މިނިވަންކޮށް ކަމަށް ހައްދާދު ވިދާޅުވެއެވެ.
އެއްވެސް ސުންނީ ލީޑަރެއް ނެތި ސައްދާމްގެ ހުކުމް ތަންފީޒް ކުރެވުނު އިރު، އެންމެ ފަހުގެ ވަސިއްޔަތަކީ ކޮބައިތޯ އެހުމުން " ފަނޑިޔާރަށް ފުރިހަމަ ސިއްހަތަކަށް އެދެން" ކަމަށް ސައްދާމް ވިދާޅުވި ކަމަށް ހައްދާދު ވިދާޅުވިއެވެ.
