ޕްރައިވެޓް ސެކްޓަރގައި ހަރަކާތަތެރިވާ ވިޔަފާރިތަކަށް ބޮޑެތި ގޮންޖެހުންތަކެއް އެބަހުރި ކަން ގަބޫލުކުރައްވާ ކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.

ބިޒްނަސް ކޮންވެންޝަން 2019 އިފްތިތާހު ކުރަން ދަރުބާރުގޭގައި ބޭއްވި ހަފުލާގައި ވާހަކަ ދައްކަވަމުން ފައްޔާޒު ވިދާޅުވީ ސަރުކާރުގެ ފަރާތުންނާއި، ޝަރުއީ ދާއިރާއިންނާއި އަދި ކަންކަން ރޭވިފައި ހުރި ގޮތުން ވެސް ގޮންޖެހުންތައް އެބަހުރި ކަމަށާއި، ވިޔަފާރިވެރިންނާ މަޝްވަރާކުރެވިގެން މިކަންކަން ހައްލު ކުރަން ސަރުކާރުން ބޭނުންވާ ކަމަށެވެ.

ކޮންވެންޝަންގައި ބައިވެރިވީ އުއްމީދު ކުރި ވަރަށް ވުރެ މަދު ވިޔަފާރިވެރިން ކަން ފާހަގަކުރައްވައި ފައްޔާޒް ވިދާޅުވީ ސަރުކާރުން ވިޔަފާރިވެރިންނަށް ކަންކަން ކޮށްދެވޭނީ "އެންގޭޖް" ވެގެން ކަމަށެވެ. އަދި މި ކަހަލަ ކޮންވެންޝަންތަކުގައި ދައްކާ ވާހަކައަކުން އެއްވެސް ވިޔަފާރިވެރިއަކަށް އިތުރު އުނދަގުލެއް ކުރިމަތިނުވާނެ ކަމަށް ވިދާޅުވަމުން ފައްޔާޒް ވަނީ ވިޔަފާރިވެރިންގެ ކަންބޮޑުވުންތައް ފާޅުކުރަން ބާރުއަޅުއްވާފައެވެ.

"މި މާހައުލުގައި ތިބޭފުޅުން ވާހަކަދެއްކުމުގައި ފުރިހަމަ މިނިވަންކަމާއި އެކީ ވާހަކަދެއްކުމުގެ ފުރުސަތު އޮންނާނެކަން ދަންނަވަން. ތިބޭފުޅުންނަށް ހުރި ގޮންޖެހުމެއް ނުވަތަ ދަތިކަމެއްގެ ވާހަކައެއް ދައްކައިގެން ތިބޭފުޅުންނަށް އިތުރު އުނދަގުލެއް ނުވާނެ ކަމުގެ ފުރިހަމަ ޔަގީންކަން އަޅުގަނޑުމެން މި ފުރުސަތުގަ އަރުވަން،" ފައްޔާޒް ވިދާޅުވިއެވެ.   

މީގެ އިތުރުން މި ފަހަރުގެ ކޮންވެންޝަންގައި މަޝްވަރާ ކުރެވޭ ކަންކަމަށް ސަރުކާރާއި ވިޔަފާރިވެރިން ގުޅިގެން ތައްޔާރު ކުރާ ކަރުދާހުގައި ހިމެނޭ ކަންކަމުގެ ތެރެއިން ވަގުތުން ވަގުތަށް ހައްލުކުރެވެން ހުރި ކަންކަން ހައްލު ކުރައްވާނެ ކަމަށާއި، ގާނޫނީ ހައްލެއް ހޯދައިދިނުމަށް މަސައްކަތް ކުރައްވާނެ ކަމަށް ވެސް ފައްޔާޒު ވިދާޅުވިއެވެ.

ދެ ދުވަހުގެ މުއްދަތައް ކުރިޔަށްދާ ބިޒްނަސް ކޮންވެންޝަންގައި 150 ފަރާތަކުން ބައިވެރިވެފައިވާ އިރު، ވާޗުއަލް ކޮންފަރެންސް މެދުވެރިކޮށް އަތޮޅުތެރޭގެ ވިޔަފާރިވެރިން ވެސް ބައިވެރިވެއެވެ. އަދި ކޮންވެންޝަންގެ ފުރަތަމަ ދުވަހު ތަފާތު އެކިއެކި ދާއިރާތަކުން ފަސް ކަރުދާހެއް ހުށައަޅައި، އެކަންކަމަށް މަޝްވަރާކުރަން ވަނީ ހަމަޖެހިފައެވެ.