އެމްޑީޕީ މަސައްކަތް ކުރާނީ ސްޓައިލްގައި: ފައްޔާޒު
ސަރުކާރާމެދު ރައްޔިތުން ހިތްހަމަ ނުޖެހިފައި ތިބި މިންވަރު ވަރަށް ރަނގަޅަށް ވަނީ ފެނިފައި
ލ.ގަމުގައި އެމްޑީޕީން ދޮރުން ދޮރަށް ހިނގައި ރައްޔިތުންގެ ހިޔާލު ވަނީ ހޯދާފައި
އެމްޑީޕީން ލ އަތޮޅަށް މިހާރު ކުރަމުންދާ ދަތުރުގައި ދޮރުން ދޮރަށް ހިނގައި ރައްޔިތުންގެ ޝުއޫރު ހުރި ނެތްގޮތްބަލައި އޮޅުންފިލުވައިފިއެވެ.
އެމްޑީޕީގެ ރައީސް މުހައްމަދު ޝިފާޒް ވިދާޅވީ ލ.އަތޮޅަށް މި ކުރާ ދަތުރުގައި ލ.އަތޮޅުގެ ރައްޔިތުން ތިބި ގޮތް ވަރަށް ސާފުވެގެންދާނެކަމަށެވެ. އަދި ލ.އަތޮޅަކީ އިދިކޮޅު ކޯލިޝަނަށް ބޮޑު ތާއީދެއް އޮތް އަތޮޅެއް ކަމުން މެޖޯރިޓީ އެމްޑީޕީއަށް ލިބޭނޭކަމާމެދު ޝައްކު ނުކުރައްވާކަމަށް އޭނާ ވިދާޅުވިއެވެ.
ލ.ގަމުގެ އަވަށްތަކުގައި އެމްޑީޕީން ބުރާސްފަތި ދުވަހު މެންދުރުފަހު ދޮރަށް ހިނގީ އެމްޑީޕީގެ ލީޑަޝިޕްގެ ބޭފުޅުންނާއި ކްނޑިޑޭޓުން ހިމެނޭގޮތަށް 6ޓީމަކަށް ބަހާލައިގެންނެވެ.
މި ޓީމުތައް ވަނީގަމުގެ އެކި އަވަށްތަކަށް ޒިޔާރަތްކޮށް ރައްޔިތުންގެ ޝުއޫރު ހުރި ނެތްގޮތް ބަލާފައެވެ.
ދޮރުންދޮރަށް ހަރަކާތްތަކުގައި ބައިވެރިވެ ވަޑައިގެން ރާއްޖެއެމްވީއަށް މައުލޫމާތު ދެއްވަމުން ގަމު ދާއިރާއަށް ނިސްބަތްވެވަޑައިގަންނަވާ މަޖިލީހުގެ މެންބަރު ފައްޔާޒު އިސްމާއިލް ވިދާޅުވީ، މިހާރު މި ރާއްޖޭގެ ކަންކަން ހިނގަމުންދާ ގޮތް ރައްޔިތުންނަށް ވަރަށް ރަނގަޅަށް އެނގޭ ކަމަށެވެ. މި ސަރުކާރާއި އިދިކޮޅު ކެންޑިޑޭޓުންނަށް މި އިންތިޚާބު ކާމިޔާބު ކުރެވޭނެކަމުގެ ޔަގީންކަން ބޮޑުކަމުން މި އިންތިޚާބު ނުބޭއްވުމަށް ނުވަތަ އަދިވެސް ފަސްކުރުމަށް ސަރުކާރުން ކެނޑިނޭޅި މަސައްކަތް ކުރަމުންދާކަމަށް އޭނާ ވިދާޅުވި އެވެ. އެހެންނަމަވެސް މިނިވަން އިންސާފުވެރި އިންތިޚާބެއް ބޭއްވިއްޖެނަމަ ޔަގީނުންވެސް މި އިންތިޚާބު ކާމިޔާބު ކުރާނެ ބަޔަކީ އެމްޑީޕީ ނުވަތަ ގުޅިފައިވާ ކޯލިޝަންކަމަށް ފައްޔާޒު ވިދާޅުވިއެވެ.
ފައްޔާޒު ވިދާޅުވި ގޮތުގައި ރާއްޖޭގެ އެކި ހިސާބުތަކަށް ކުރާ ދަތުރުތަކުގައި މިސަރުކާރާމެދު ރައްޔިތުން ހިތްހަމަ ނުޖެހިފައި ތިބި މިންވަރު ވަރަށް ރަނގަޅަށް ވަނީ ފެނިގެންގޮސްފައެވެ.
"އެމްޑީޕީ އަކީ އަބަދުވެސް ސްޓައިލްގައި މަސައްކަތް ކުރާބައެއް. ރައްޔިތުންގެ ކައިރިއަށްގޮސް އަޅުގަނޑުމެން އެ ރައްޔިތުންގެ ޝުއޫރުތައް މިދަނީ ހޯދަމުން.ޕޮލިސީތައް ބައްޓަން ކުރަނީ އެ ޝުއޫރުތަކަށް ބަލައިގެން. އެމަސައްކަތް އަޅުގަނޑުމެން މި ކުރަނީ" ފައްޔާޒު ވިދާޅުވިއެވެ.
ފައްޔާޒު ވިދާޅުވީ، ސަރުކާރަށް ކުރިން ތާއީދުކުރަމުން ވަރުގަދަ ސިޔާސީ ފަރާތްތަކުން މި ސަރުކާރަށް އޮތް ތާއީދު އަނބުރާ ގެންގޮސްފައިވާއިރު، ރާއްޖެގެ އެކި ކަންކޮޅުތަކުން ފާޅުކުރަމުންދާ ޝުއޫރު ތަކާއިއެކު ރައްޔިތުންވެސް މި ސަރުކާރަށް ތާއީދު ނުކުރާކަން މި އިންތިޚާބުގައި ދައްކާނެއެވެ.
